ކޮންމެ އިންސާނަކަށްވެސް ލިބިފައިވަނީ ތަފާތު ސިފައެކެވެ. މީހާ ރީތި ވަނީ ވަކި ނަސްލަކުން ވަކި ކުލައަކުންނެއް ނޫނެވެ. އަދި މީހާ ރީތި ވަނީ ލޫޅާފަތިކަމާއި އެމީހެއްގެ ހުންނަ ބަނިޔާދަން ކަމަކުންވެސް ނޫނެވެ. އިންސާނާ ރީތިވާ އެތައް ގޮތްތަކެއް ހުރެއެވެ. އެމީހާގެ އުޅުމާއި އެމީހާގެ މިޒާޖަކީ ވެސް މުހިންމު އެއްޗެކެވެ. މީހާގެ ހިތް ސާފުވުމާއި ހިތްހެޔޮކަން ހުރެއްޖެނަމަވެސް އެމީހަކާމެދު ރަނގަޅަށް ދެކޭނެ މީހުން ގިނަވާނެއެވެ. މީހަކު މާބޮޑަށް ފަލަނަމަ އެމީހަކީ މުޖުތަމައުގައި ބާކީ ކޮށްލާނެ މީހެއް ކަމުގައި ނުހަދާށެވެ. ކޮންމެ އިންސާނަކީވެސް އެމީހެއްގެ ޒާތުގައި ރީތި މުހިއްމު އަދި ބޭނުންތެރި އިންސާނެކެވެ. ތިބާއަކީ ތިބާގެ އަމިއްލަ ސިފައަށް ލޯބިކުރާ މީހަކަށް ވެވޭތޯ ބެލުމަކީވެސް ވަރަށް މުހިއްމުކަމެކެވެ. ތިބާގެ ގެއްލިފައި ހުރި ހުނަރެއް އެހެން މީހަކަށް ނޭނގި އޮވެދާނެއެވެ. އެއީ ތިބާގެ އެސިފަ އެހެން މީހުންނަށް ހާމަނުކުރާތީކަމަށްވެސް ވެދާނެއެވެ.
މެލޭޝިއާގެ ލިޔާނާ އަކީ "އިންކްލޫސިވް ބިއުޓީ އެމްބަސަޑަރ" ގެ ނަމުން މަޝްހޫރުކަން ހޯދައިފައިވާ މީހެކެވެ. އޭނާއަކީ "ޕްލަސް ސައިޒު" މޮޑެލްއެއްގެ ގޮތުގައި އުޅެމުންދާ އަންހެނެކެވެ. މީނާ ބުނާގޮތުގައި ފުރާވަރަށް އަރައިގެން އައި ދުވަސްވަރުއްސުރެ " ޕޮލިސިސްޓިކް އޯވަރީ ސިންޑްރޯމް (ޕީސީއޯއެސް) އުދަގުލުގައި ދަނީ އުޅެމުންނެވެ. ޕީސީއޯއެސްގެ ސަބަބުން ހޯމޯން އިންބެލެސްވުމުން ހަށިގަނޑަށް ދިމާވާ އުދަގޫތައް ތަހައްމަލު ކުރަމުންދާ ލިޔާނާ ބުނަނީ މިބަލީގެ ސަބަބުން ޕީރިއަޑް ނުވުމާއި، މޫނުގައި އޮށާޅަ ނެގުމާއި، މޫނުގައި އިސްތަށި ގިނަވުމާއި އަދ ދަރިމައިވުމުގައި ދަތިތައް ދިމާވުން ކަހަލަ ކަންކަން ދިމާވާ ކަމަށެވެ. މިހުރިހާ ކަމެއް މިހެން ހުރުމުގެއިތުރަށް ހަށިގަނޑުގެ ބަރުދަން އިތުރުވެ މީހާ ފަލަވެއެވެ. މިއީ އިހްސާސްކުރަންވެސް ނޭނގޭހާ ވޭން ބޮޑު ކަމެކެވެ.
ޕީސީއޯއެސް ހުންނަކަން ދެނެގަނެވުނީ ހަށިގަނޑު އާދަޔާ ޚިލާފަށް ބަރުވާން ފެށުމުންނެވެ. ހަށިގަނޑުގެ ބަރުދަން އިތުރުވެ ފަލަވުމުގެ ސަބަބުން މީނާއަކީ ސްކޫލުގައިވެސް ކަންކަމުން އެކަހެރިކޮށްލާފައި ހުންނަ މީހެކެވެ. ޚާއްސަކޮށް ސްކޫލުގެ އިތުރު ހަރަކާތްތަކާއި ކުޅިވަރާއި ހެލިފެލިވެ އުޅެންޖެހޭ ކަހަލަ ކަންކަމުންނެވެ. ބައެއް ޓީޗަރުން އޭނާއާއި ދިމާލަށް ބުނާނެ "ލިޔާނާ އަށް ތިކަންވާނެތަ، ކުޅިވަރު ކުޅުނީމަ ނުވަތަ ދުވުނީމަ ވަރުބަލިވާނެއެއްނުދޯ، ހަމައެކަނި ޓީމަށް ޖޮއިންވެލާފަ ހުރެލާ އޭރުންވެސް އޯކޭވާނެ" މިކަހަލަ އެތައް ޖުމްލައަކުން އޭނާގެ ހިތުގައިޖެހި ހިތްމަރާލައެވެ. އޭނާގެ ހަށިގަނޑުގެ ސަބަބުން އޭނާއަކީ ކަންކަން ނުކުރެވޭނެ މީހެއްކަން އިހްސާސްކޮށްދިނުމުން އޭނާގެ ދުނިޔެއަކީ ތަފާތު އެއްޗެއްކަން އިހްސާސްވިއެވެ.
ސްކޫލުގެ ހުރިހާ ކަމެއްގައި ބާކީ ކުރަމުންގޮސް އޭނާއަކީ އެއްވެސް ކަމެއް ނުވާނެ މީހެއްކަން އަންގައިދިނެވެ. އެއްފަހަރެއްގައި ސްކޫލުގެ ބެޑްމިންޓަން މުބާރާތެއްގައި ބައިވެރިވާން ހުށަހެޅުމުން ކްލާސް ހުރިހާ ކުދިންގެ ކުރިމަތީގައި ސްޕޯޓްސް ޓީޗަރު އޭނާއާއި ދިމާލަށް ބުނީ ބައިވެރި ނުކުރާނެ ވާހަކައެވެ. އަދި ބުނީ އެއީ ވަރަށް ވަރުބަލިވާ ކަމެއްކަމަށާއި އެކަހަލަ ކަންކަން ކުރެވޭނީ ވަރަށް ހަކަތަ ހުރެގެން ކަމަށެވެ. އެދުވަސް އޭނާގެ ހަދާނުގައި އަބަދުވެސް ހުންނަ ކަމުގައި ބުންޏެވެ. މިހެންގޮސް ހުރިހާ ކަމަކުން ބާކީ ކޮށްލުމުން އޭނާ އަމިއްލައަށް ހިތްވަރު ހޯދަންވެސް އުދަގޫވިއެވެ. މީގެ އިތުރުން ވަޒީފާއަކަށް ކުރިމަތިލުމުންވެސް މީހުން އޭނާއަށް ހަޖޫޖަހާ ފަލަވުމުގެ ސަބަބުން މަސައްކަތް ކުރަން އުދަގޫވާނެ ކަމުގައި ބުނަމުންދިޔައެވެ. އަދި އޭނާގެ ބޮސް އޭނާއާއި ދިމާލަށް ބުނީ " ތިހާ ފަލަކޮށް ހުންނަންޏާ އެއްވެސް ތަނަކުން ވަޒީފާއެއް ނުލިބޭނެ" ކަމަށެވެ. އޭރު އޭނާ އަދާކުރަމުންދިޔަ ވަޒީފާއަކީ އޭނާގެ ހަށިގަނޑާއި އެއްވެސް ގުޅުމެއް ހުރި ވަޒީފާއެއްވެސް ނޫނެވެ.
ލިޔާނާ އަކީ އެހެން މީހުންނާއި ތަފާތު ހިތްވަރުގަދަ ކެރޭ މީހެއްކަން މިއަދު އަންގައިދިނެވެ. އޭނާ ބުނަމުންދިޔައީ ކޮންމެމީހަކުވެސް އަމިއްލަ ހަށިގަނޑު އެހެން މީހުންނާއި އަޅާނުކިޔުމަށެވެ. އޭރުން ހުރިހާ ކަމަކާއި ކުރިމަތިލާންވެސް ފަސޭހަވާނެއެވެ. މީނާ ދެކޭގޮތުގައި އިންސާނާ ރީތި ވަނީ ލޫޅާފަތި ހަށިގަނޑެއް ހުރުމަކުން ނޫނެވެ. އެއީ މިއަދުގެ ސޮސައިޓީ ދެކޭގޮތަށްވިއަސް ހެވެވެ. ހަގީގަތުގައި ބުނާނަމަ މީނާއަށް ދިމާވިފަދަ ގޮންޖެހުންތަކާއި ބުލީކުރުންތަކުން އަރައިގަންނަން އެންމެން މަސައްކަތް ނުކޮށްފާނެއެވެ. ލިޔާނާ ދެކޭގޮތުގައި އޭނާއަކީ އެއްވެސް ރީތި މީހެއް ނޫނެވެ. އަދި އެއްވެސް ބޭނުންތެރިވެސް މީހެއް ނޫނެވެ. މިއީ ސޮސައިޓީން އޭނާއަށް ދަސްކޮށްދިން ފިލާވަޅެވެ.
އިންސްޓަގްރާމްގައި އެކި މީހުންގެ ފޮޓޯ ނަގައިދީ އުޅޭ ފޮޓޯގްރާފަރު ލިޔާނާ ބުނިގޮތުގައި އެހެން މީހުންގެ ފޮޓޯ ނަގައިދީ އުޅޭއިރުވެސް އޭނާގެ އަމިއްލަ ފޮޓޯއެއް އޭނާ ނަގައި އަދި އަޕްލޯޑްކޮށްވެސް ނުހަދައެވެ. އަމިއްލަ ފޮޓޯއެއްލާން ހިތަށް އެރިއަސް 'ޕެނިކް އެޓޭކް' އައުމާއި 'އެންޒައިޓީ އެޓޭކް' އަންނަކަމުގައި ފާހަގަކުރިއެވެ. އެހެންނަމަވެސް އެއްދުވަހު މީނާގެ ހިތަށް އެރީ ސޮސައިޓީ ދެކޭގޮތް އަދި މީހުން އޭނާއާއި ދޭތެރޭ ދެކޭގޮތަށް ނުވިސްނައި މީހަކު ކިޔާފާނެ އެއްޗަކަށް ނުވިސްނާ އޭނާ ބޭނުންވާ ގޮތަށް އޭނާގެ ދިރިއުޅުން ބައްޓަން ކުރާށެވެ. ހަމަހުރެލާފައި އެއްދުވަހު އަމިއްލައަށް ރީތިވެލައިގެން ކެމެރާ ކުރިމައްޗަށް ހުއްޓިހުރެ މޮޑެލް ކުރަން ފެށިއެވެ. އަދި ފޮޓޯ ނެގުމަށްފަހު އިންސްޓަރގްރާމްގައި ޕޯސްޓްކުރިއެވެ. އެ ފޮޓޯއަށް މީހުންގެ ފަރާތުން ލިބުނު ކޮމެންޓުގެ ސަބަބުން މީނާ ހައިރާންކުރުވިއެވެ. " ހާދަ ރީއްޗޭ ހާދަ ލޯބި މޮޑެލްއެކޭ ތިއީ ހަމަ ޕްލައިސް ސައިޒުގެ ނަމޫނާ މޮޑެލްއެއް" މިކަހަލަ ކޮމެންޓްތަކުން ފީޑް ފުރާލިއެވެ. އެދުވަހަށްފަހު ލިޔާނާގެ ވިސްނުން މުޅިން ބަދަލުކޮށް އޭނާއަކީވެސް މީހުން ބަލައިގަންނަ ޕްލަސް ސައިޒުގެ މަޝްހޫރު މޮޑެލްއަކަށް ވިއެވެ. ތިމާގެ އަމިއްލަ ނަފްސުދެކެ ލޯބިވެއްޖެނަމަ އެމީހަކީ އެންމެ ރީތީ މީހާކަމުގައި ދެކިގެން އުޅެން ދަސްކުރުމަށް ލިޔާނާ ނަސޭހަތްތެރިވިއެވެ.
މައުލޫމާތާއި ފޮޓޯ: ލިޔާނާ/އިންސްޓަގްރާމް އެކައުންޓް
