އެއީ ވަރަށްވެސް ތުއްތު ދެކުދިން ގަޔާލާ ބައްދާލައިގެން ހުރި މަންމައެކެވެ. ލަފާކުރެވޭ ގޮތުން އެއީ 2 އަހަރުގެ ތުއްތު ފިރިހެން ކުއްޖަކާއި 5 ވަރަކަށް މަހުގެ ތުއްތު ކުއްޖެކެވެ. އޭނާގެ މޫނުމަތިން ފެންނަމުން ދަނީ ބިރުވެރިކަން ވެރިވެފައިވާ އެ މާހައުލުދެކެ ގަނެފައިވާ ބިރެވެ. އެ ދެލޮލުން ފެންނަމުން ދަނީ އެތަނުގައި ތިބި ސިފައިންނާއި އާންމުން އޭނާއާއި އޭނާގެ ތުއްތު ދަރިފުޅު މަރާލާނެކަމުގެ ޔަޤީންކަމެވެ. މިއީ އެ ތިން މައިން ދުނިޔެއަށްލާނެ އެންމެ ފަހު ނޭވާކަމުގެ އިހްސާސެވެ. ތަނަކީ ހަނގުރާމައިގެ މައިދާނަކަށްވުމާއިއެކު ބިރުން، ރޮމުން، ހަޅޭއްލަވަމުން ކޮޅުކޮޅަށް ދުވާ މީހުންވެސް މަދެއް ނޫނެވެ.
މިއީ މިދިޔަ ހޮނިހިރު ދުވަހު ފަލަސްޠީނުގެ ޙަމާސް ޖަމާއަތުން އިސްރާއީލަށް ދިން ކުއްލި، ވަރުގަދަ ޙަމަލާތަކުގައި، އިސްރާއީލުގެ އަވަށްތަކުން ފަލަސްޠީނުގެ މުޖާހިދުންނަށް ކާމިޔާބު ކުރެވުނު އަވަށްތަކަށް ވަނުމަށްފަހު އެތަނުގައި ތިބި އާންމުންނާއި ޔަހޫދީ ސިފައިން އަސީރު ކުރަމުން ދިޔަ ދަނޑިވަޅެއްގައި ނަގާފައިވާ ވީޑިއޯއެކެވެ.
'ޕަލަސްޠީން އިންޓަރނޭޝަނަލް ބްރޯޑްކާސްޓިން'ގެ ފޭސްބުކް ޕޭޖުން ފެންނަމުން ދިޔަ މި ވީޑިއޯގައި ފެނުނު މަންޒަރުތައް ބަލާލަން ކިތަންމެ ހިތަށް އުނދަގުލަސް، މި ވީޑިއޯއިން ހިތަށް ހަމަޖެހުންވެސް ގެނުވައިފިއެވެ. އިސްރާއީލުން ފަލަސްޠީނުގެ އާންމުންނާމެދު ޢަމަލުކުރަމުންދާ ގޮތް، ނޭނގޭ މީހަކު ވަރަށް މަދުވާނެއެވެ. އެހާވެސް އިސްރާއީލުގެ އަނިޔާވެރިކަން ބޮޑެވެ. ނަމަވެސް އެ ހުރިހާކަމެއް އެއްފަރާތްކޮށްލުމަށްފަހު އިސްރާއީލުގައި މިހާރު ޙަރަކާތްތެރިވަމުންދާ ފަލަސްޠީނުގެ ހަނގުރާމަވެރިން ދެއްކީ އިސްލާމްދީނުގެ ރިވެތި ނަމޫނާއެވެ.
''އެމީހުންނަށް ދައްކައިދީ އަހަރެމެންގެ ކިބައިގައި އިންސާނިއްޔަތުކަން ހުރިކަން. އެމީހުން ގޮތަށް އަހަރެމެންނަކީ ލާއިންސާނީ ޢަމަލު ހިންގާބައެއް ނޫންކަން. އެއްވެސް މީހަކު (އެ އަންހެންމީހާއާއި ތުއްތުކުދިންނަށް) ގޯނާ ނުކުރާތި. އެމީހުންނަށް ދައްކައިދޭންވީ އެމީހުން ފަލަސްޠީން ރައްޔިތުންނަކީ ގޯސްބައެއްކަން ހާމަކޮށްދޭން ކުރާ މަސައްކަތަކީ ދޮގެއްކަން. އެގޮތަށް ނޫންކަން އަހަރެމެންގެ ޢަމަލުތައް ހުންނަނީ'' އެތަނުން ފަލަސްޠީނުގެ އެއް ހަނގުރާމަވެރިއަކު ބުންޏެވެ.
''އޭނާއެހެރީ ތުއްތު ކުދިންނާއެކީ. އޭނާއަށް ފުރިހަމަ ރައްކާތެރިކަންދީ'' އަނެއް ހަނގުރާމަވެރިޔާ ބުންޏެވެ.
މީގެ އެތައް ޒަމާނެއްކުރިން އިސްރާއީލުން ހިފާފައިވާ ފަލަސްޠީނުގެ ބިންތަކުގައި ހިންގަމުންދާ ލާއިންސާނީ ޢަމަލުތަކުގައި، ބޮމާއި ބަޑީގެ ޙަމަލާތަކުގައި ފަލަސްޠީނުގެ ކުށެއްނެތް ކުދިބޮޑު އެތައްހާސް ބަޔަކު ވަނީ ޝަހީދުކޮށްފައެވެ. އާންމުން ދިރިއުޅެމުންދާ ގެތަކަށް ވަކި ވަގުތެއް ނުބަލައި ވަދެ، ގޭގޭގެ ޙުރުމަތްކަނޑައި ކުޑަކުދިންނާއި އަންހެނުންނާއި މުސްކުޅިންނަށް ބިރުދައްކައި، ގޭގައި ތިބި ފިރިހެނުން ހައްޔަރުކޮށް ބިޑިއަޅުގައި، ލާއިންސާނީ އަނިޔާކޮށް ދަނީ ޝަހީދުކުރަމުންނެވެ. ސަބަބެއް ނެތި ދޭ ބޮމާއި ބަޑީގެ ޙަމަލާތަކުގެ ސަބަބުން ޒަރޫރީ ޚިދުމަތްތަކުންވެސް ފަލަސްޠީނުގެ ރައްޔިތުންވަނީ މަހްރޫމްވެފައެވެ.
ޔަހޫދީންގެ ނުބައިކަން ފެނިގެންދާ އަނެއް ޢަމަލަކީ ޙުރުމަތްތެރިވެގެންވާ އަޤްޞާ މިސްކިތަށް ވަދެ، މިސްކިތުގެ ޙުރުމަތްކަނޑައި ޖެހިލުމެއްނެތި އެ މިސްކިތުގައި އެމީހުން ހިންގި ޖަރީމާތަކެވެ. އާންމުންނަށް އެތައް ގޯނާއެއްކޮށްފައިވާއިރު ކުޑަކުއްޖެއް ބޮޑުމީހެއް ނުބަލައި، ލާއިންސާނީ ޖަރީމާތައް ދަނީ ހިންގަމުންނެވެ. ރޮމުން އާދޭސް ކުރަމުންދާއިރުވެސް ތުއްތު ފުރާނަަތަކާއި އަންހެނުންނާއި މުސްކުޅިންނަށްވެސް ހަދާލާގޮތް އެއީ މިހެން ލިޔުމަކުން ކިޔައިދެވޭނެ ވާހަކަތަކެއް ނޫނެވެ.
ނަމަވެސް އިސްލާމްދީނުގެ ރިވެތި އުސޫލުތަކުގައި ހިފަހައްޓައި، ފަލަސްޠީނުގެ ހަނގުރާމަވެރިން މި ޙައްސާސީ ދަނޑިވަޅުގައިވެސް ދައްކައިދިން ރިވެތި ނަމޫނާއަކީ އިސްލާމީ އުންމަތް ފަޚުރުވެރިވާފަދަ ނަމޫނާއެކެވެ. މުސްލިމުންނަކީ މިއީއެވެ. އިސްލާމްދީނުގެ މާތްކަމާއި މަތިވެރިކަން އަދި އެދީނުގައި އަންގަވާފައިވާ ކަންކަން އަންގައިދެވޭނީ މިފަދަ މުސްލިމުންނަށެވެ.
މިދިޔަ ހޮނިހިރު ދުވަހުން ފެށިގެން ފަލަސްޠީނުގެ ޙަމާސް ޖަމާޢަތުން އެއްގަމާއި ވައިގެ މަގުން އިސްރާއީލަށް ދެމުންދާ ޙަމާލާތަކަށް ހުއްޓުމެއް ނައިސް ކުރިއަށްދާއިރު، އިސްރާއީލް ސިފައިންގެ އިސް ބައެއް ފަރާތްތަކާއި އާންމުންވެސް ވަނީ އަސީރުންގެ ގޮތުގައި ޣައްޒާއަށް ގެންގޮސްފައެވެ. ހަމާސްއިން އިސްރާއީލަށް ދެމުންދާ ހަމަލާތަކުގައި މިއަދާއި ހަމައަށް 900 އަށް ވުރެ ގިނަ މީހުން މަރުވެ 2616 މީހުން ވަނީ ޒަޚަމްވެފައެވެ.
އިސްރާއީލުން ވެސް ފަލަސްތީނަށް ދަނީ ވަރުގަދަ ހަމަލާތަކެއް ދެމުންނެވެ. މިގޮތުން އިސްރާއީލުން ފަލަސްޠީނަށް ދެމުންދާ ހަމަލާތަކުގައި 687 މީހުން މަރުވެ 3800 މީހުން ވަނީ ޒަޚަމްވެފައެވެ. އިސްރާއީލުން ހިފާފައިވާ ޣައްޒާގެ ސަރަހައްދު އެއްކޮށް ބަންދުކޮށް އެ ސަރަހައްދަށް އެއްވެސް ވަރަކަށް ކާބޯތަކެތި ނުވެއްދޭގޮތަށް ހަދާފައިވާކަމަށް ރިޕޯޓްތައް ބުނެއެވެ. އަދި ގިނަބައެއްގެ ގެދޮރު ގެއްލި ވަނީ ހާލުގައިޖެހިފައެވެ.
