މޫނުން ހަންފޮޅި ހިރުވާކަހަލަ ކަންކަން ދިމާވާނަމަ ކަންބޮޑުވެއެވެ. އަވީގައި އުޅުމުގެ ސަބަބުންވެސް ހަންގަނޑު ހަލާކުވެއެވެ. ހަންގަނޑު ހަލާކުވުމުން ހިރުވައި ރަތްވެއެވެ. އަދި ފިއްނަގާފައި ހުންނަހެން ދުޅަވެފައިވެސް ހުރެއެވެ. މިހެންވުމުން ވަރަށް ތަދުވެސް ވެއެވެ. ހަންގަނޑު ހަލާކުވާވަރަށް ހިރުވުމުގެ ސަބަބުން ލޭއައިސް ބެކްޓީރިއާ އުފެދިގެންވެސް ހިގައިދާނެއެވެ. މިކަހަލަ ކަންކަމުގައި ގޭގައި ދެވިދާނެ ބައެއް ފަރުވާތައް ހިއްސާކޮށްލާނަމެވެ.
އެލޯވެރާ
އެލޯވެރާއަކީ ހަންގަނޑު ފިނިކޮށްދީ ކެހުންވެސް ދަށްކޮށްދޭ އެއްޗެކެވެ. އެލޯވެރާ ހާކާލުމަށްފަހު 20 މިނިޓް ވަންދެން ބަހައްޓާށެވެ. އެއަށްފަހު އައިސްފެންފޮދަކުން މޫނު ދޮވެލާށެވެ. މޫނަށް ފިނިކަން ލިބި އަރާމުވާނެއެވެ. މިގޮތަށް ހެދުމުން ފޮޅިފައި ހުންނަ ހަންތައް ނެއްޓި މޫނު ސާފުކޮށްދެއެވެ.
އޯޓްމީލް
އޯޓްމީލަކީ މިކަމަށް އެންމެ ރަނގަޅު ހައްލުކަމުގައި ވެދާނެއެވެ. އޯޓްމީލް ހޭކުމުން ހިރުވުން ހުއްޓެއެވެ. އޯޓްމީލްގެ ސަބަބުން ދުޅަވެފައި ހުރިނަމަ ދުޅަވެސް ތިރިކޮށްދެއެވެ. ކުޑަކުޑަ އޯޓްމީލްކޮޅެއް ތާފަނާ ފެންފޮދަކަށް އެޅުމަށްފަހު މަޑުވެލަންދެން ބަހައްޓާށެވެ. އެއަށްފަހު މޫނުގައި ހާކާލާށެވެ. އަދި އޭގެ ފެނުން މޫނު ދޮވެލާށެވެ. މިގޮތަށް ހެދުމުން ފޮޅިފައި ހުންނަ ހަންތައްވެސް ނެއްޓި މޫނުގައި ހުންނަ ވިހަތައް ފިލައިދިއުން އަވަސްވެގެންދެއެވެ.
މާމުއި
މާމުއި ބޭނުންކުރާނަމަ އެދެވިގެންވަނީ ރަނގަޅު ކޮލިޓީއެއްގެ މާމުއިއެވެ. މާމުއި އަކީ މޫނުގެ ހަންގަނޑަށް ވަރަށް ގިނަ ގޮތްގޮތުން ފައިދާކުރާ އެއްޗެކެވެ. މިގޮތަށް މޫނުގައި ހަންފޮޅި މޫނު ހިރުވާނަމަވެސް ބޭނުންކޮށްލުން ވަރަށް ރަނގަޅު އެއްޗެކެވެ.
އޮލިވް އޮއިލް
އޮލިވް އޮއިލް މޫނުގައި ހާކާލުމުން ނެއްޓިފައި ހުންނަ ހަންތައް ސާފުވެއެވެ. އަދި މޫނު ހިކިފައި ހުރިނަމަ އެކަންވެސް ހައްލުކޮށްދެއެވެ. މިގޮތަށް އޮލިވް އޮއިލް ބޭނުންކުރުމަށްފަހު 30 މިނިޓް ބަހައްޓާށެވެ. ތަފާތު ފެނިގެންދާނެއެވެ.
