ހަޔާތުން ދުވަހެއް ނުވަތަ އުމުރުން ދުވަހެއް ފާއިތުވެދާއިރު ދިރިއުޅުމުގައި ތިމާ ވާސިލުވާން ބޭނުންވާ ލަނޑުދަނޑިތަކެއް ހުންނާނެކަމީ ޝައްކެއް އޮތް ކަމެއް ނޫނެވެ. އެކި މީހުންގެ ވިސްނުމާއި ޚިޔާލު ތަފާތުއިރު ދިރިއުޅުން ބައްޓަންވެފައި އޮންނާނީ އެކި ގޮތްގޮތަށެވެ. ޒުވާން އުުމުރުގައި ކުރެވުނު ތަޖުރިބާތަކުގެ އަލީގައި ކަންކަން ބަދަލުކުރަން ބޭނުންވާ މީހުންވެސް އުޅެއެވެ. ހިތަކީ މުސްކުޅިވާނެ އެއްޗެއް ނޫނެވެ. މުސްކުޅިވަނީ އެމީހާގެ އުމުރެވެ. އެހެންނަމަވެސް އުމުރުން ދުވަސްވާވަރަކަށް ސިއްހީގޮތުންނާއި، ތިމާ ވިސްނާގޮތްވެސް މުޅިން ތަފާތުވެއެވެ. އާއްމުގޮތެއްގައި އުުރުން 40 އަހަރުވުމުން ވަރަށް ގިނަ މީހުންގެ ވިސްނުން ބަދަލުވެ ތަންކޮޅެއް ހަރުދަނާ ވިސްނުން ގެންގުޅެއެވެ. މީގެ މާނައަކީ 40 ގެ ކުރިން ހަރުދަނާ ވިސްނުން ނުގެންގުޅޭ ވާހަކައެއް ނޫނެވެ. އިހުނަށްވުރެ ބޮޑަށް ކަންކަން ބަދަލުވެ ދިރިއުޅުމާމެދު ބޮޑަށް ސީރިއަސްވާން ފަށާ އުމުރަކީ 40 ކަމުގައި ނުވަތަ އޭގެ ކުރި ކަމުގައިވެސް ބައެއް މީހުން ބަހުސްކުރެއެވެ. އެހެންނަމަވެސް 40 އަހަރުވުމުގެ ކުރިން ތިމާ ހާސިލުވާން ބޭނުންވާ ލަނޑުދަނޑިއަކީ ކޮބައިތޯ އާއި ބަދަލުކުރަން ބޭނުންވާ ކަންކަމަކީ ކޮބައިތޯ ބަލާލަމާހިގާށެވެ. މިއުމުރަށް ވާސިލުވުމުގެ ކުރިން ތިމާގެ ދިރިއުޅުން ގެންގުޅެން ބޭނުންވާނެ ގޮތުގެ ތާވަލެއްވެސް ގެންގުޅޭ މީހުން އުޅެއެވެ
ރަނގަޅު ތައުލީމަކާއި ހަމައަށް ވާސިލުވުން
ޅައުމުރުގައި މަޖާކޮށް އުޅުނު އުޅުން ނިމުމަކަށް ގެނެސް ތަންކޮޅެއް ސީރިއަސް ނަޒަރަކުން ވިސްނުން ގެންގުޅެން ވެއްޖެކަން އިހްސާސްކޮށްލާށެވެ. އެއަށްފަހު ވިސްނާލައި އަމިއްލަ މީހާގެ ދިރިއުޅުމާމެދު ކަންކަން ވެގެންދާ ގޮތާއި ކަންކަން ކުރަން ބޭނުންވާގޮތެއްވެސް ވިސްނާލާށެވެ. އެންމެންނަކީ ތައުލީމު އުނގެނުމުގެ ނަސީބު ލިބިފައިވާ މީހުންކަމުގައި ނުވިއަސް މިޒަމާނަކީ އަހަރެމެންގެ ރާއްޖޭގައި ހިލޭ ތައުލީމު ހާސިލް ކުރުމުގެ ފުރުސަތު ލިބިފައިވާ ޒަމާނެކެވެ. އެހެންކަމަށްވާނަމަ އެފުރުސަތު ގެއްލުވާނުލާ ކިޔެވުމައިގެން ކުރިއަށް ދާން ވިސްނަންވާނެއެވެ. އުމުރުން ދުވަސްވާނަމަ އެހިތްވަރު ނުހުރެދާނެއެވެ. ތައުލީމު އުނގެނުމަށް އަބަދުވެސް އެންމެ ފަސޭހަ ވާނީ ޅައުމުރުގައެވެ. ހަޔާތެއް ފަށައި ދަރިން ލިބުމަށްފަހު ދިރިއުޅުން ބިޒީވެގެން ދެއެވެ.. އޭގެ ފަހުގައި ތައުލީމު އުނގެނުމަށް އޮތް ފުރުސަތު ހަނިވެގެންދެއެވެ. އެއީ ދިރިއުޅުމުގެ ކަންކަން ކޮށްފައި ކިޔަވަން ވަގުތު ނެތިގެންނެވެ. އެހެންވީމާ އުމުރުގެ ވަކިހިސާބަކަށް ވާސިލުވުމުގެ ކުރިން ތައުލީމު އުނގެނި ތިމާގެ ދިރިއުޅުން އާރާސްތުކުރުމަށް މަސައްކަތްކުރަންވާނެއެވެ.
މަޢާފުކުރަން ދަސްކުރާށެވެ!
ދިރިއުޅުމުގައި ތަފާތު މައްސަލަތައް ދިމާވެ ކަންކަމުގައި ގޮންޖެހުންތައް ކުރިމަތިވެގެންދެއެވެ. މަސައްކަތުގެ މާހައުލުގައި ނަމަވެސް އަދި ދިރިއުޅުމުގައިނަމަވެސް މައްސަލަޖެހުމުުން މައްސަލަ ހައްލުކުރަން ދަސްކުރާށެވެ. ތިމާއަށް ކުށެއް ކުރެވިއްޖެނަމަ އަވަހަށް މާފަށް އެދޭށެވެ. ނުވަތަ މީހަކު މައާފަށް އެދިއްޖެނަމަ އެމީހަކަށް މާފުުކުުރުމުގެ ރީތި އާދަ ގެންގުޅޭށެވެ.
ދިރިއުޅުމުގެ ޚަރަދުތައް ހަމަޖައްސަން ދަސްކުރުން
މީހަކާ އިނުމުގެ ކުރިން ކުރަންޖެހޭ ޚަރަދު ބޮޑުނުވިނަމަވެސް ދިރިއުޅުމެއް ފަށައި ޒިންމާތަކެއް ބޮލުގައި އެޅުމަށްފަހު ކުރަންޖެހޭ ޚަރަދުވެސް ބޮޑުވާނެއެވެ. ރައްޓެހިންނާއެކު މަޖާކޮށް އަބަދު ބޭރަށްގޮސް ބޭކާރު ޚަރަދުތައް ކޮށްއުޅުމުގެ އާދަ ގެންގުޅޭނަމަ އެއާދަ ކޮންމެވެސް ވަރަކަށް މަދުކޮށްލުން މުހިއްމެވެ. ފައިސާ ރައްކާކުރަން އާދަކުރާށެވެ. ދިރިއުޅުމުގައި މައްސަލައެއް ޖެހި އެކަނިވެދާނެ ކަމަށްވެސް ވިސްނަންވާނެއެވެ. އެދުވަހަކުންވެސް ތިމާއަށް އެކަނި އުޅެވޭނެ ވަރުގެ ހަމަޖެހުމެއް ލިބޭނީ ފައިސާ އަތުގައި ހުރެގެންކަންވެސް ދަންނާށެވެ.
ކަންކަމުގައި ނޫނެކޭ ބުނަންވެސް ދަސްކުރާށެވެ!
ކައިރީގައި އުޅޭ ރައްޓެހިން ނުވަތަ ވަށައިގެންވާ މީހުން ބޭނުންވާ ހުރިހާ ގޮތަކަށް ކަންކަން ކޮށްދޭ މީހަކަށް ވީކަމުގައި ވީނަމަވެސް ތިމާގެ އަމިއްލަ ކަންކަމަށް ވަގުތު ނެތްނަމަ އެހެން މީހުންގެ ކަންކަމުގައި ނޫނެކޭ ބުނަންވާނެއެވެ. އެހެންނޫނީ އެހެންމީހުން ތިމާގެ ފައިދާ ނަގަން ފަށައިފާނެއެވެ. ހުރިހާ އެންމެން ރުއްސާ މީހަކަށް ނުވާށެވެ. ތިމާގެވެސް އަގެއް ނުވަތަ ވަކި ގޮތެއް ހުރި މީހަކަށް ވާންވާނެއެވެ.
އަމިއްލަމީހާގެ ހަށިގަނޑަށް އަޅާލުމާއި ލޯބި ދިނުން
އުމުރުން ދުވަސްވާވަރަކަށް ތިމާގެ ހަށިގަނޑަށްވެސް ބަދަލު އާދެއެވެ. އެހެންކަމަށްވާނަމަ ކުރިން އަޅާނުލާ ބޭނުން އެއްޗެއް ކާލައިގެން ހުރި ހުރުމަށް ބަދަލުތަކެއް ގެންނަން އެބަޖެހެއެވެ. ކަސްރަތު ކުރުމާއި ރަނގަޅު ކާނާ ކެއުމަށް ސަމާލުކަން ދޭންވާނެއެވެ. ތިމާގެ އަމިއްލަ ހަށިގަނޑު ދެކެ ތިމާ ނުވި ލޯތްބެއްް އެހެން މީހަކު ނުވާނެކަންވެސް ދަންނަންވާނެއެވެ. ސެލޫނަށްގޮސް އަމިއްލަ ހަށިގަނޑު ރީތިކުރުމަށް ބޭނުންވާ ކަންކަން ވެސް ކުރެވިދާނެއެވެ. މާބޮޑަށް މީހާ ސްޓްރެސްވާނަމަ ބަލިވެދާނެއެވެ. މިކަހަލަ ކަންކަމަށް ސަމާލުކަންދީ ތިމާގެ ސިއްހީ ހާލަތަށްވެސް ވިސްނާށެވެ.
