މަސައްކަތުގެ މާހައުލުގައި ގިނައިރު އިށީދެއިނުމުގެ ސަބަބުން ހީނުކުރާހާ ގެއްލުންތަކާ ކުރިމަތިލާންޖެހެއެވެ. ހަށިގަނޑަށް ބޭނުންވާ މިންވަރަށް ކާނާ ބޭނުންވާ ފަދައިން ހަށިގަނޑުގައި ހުންނަ ސަރުބީ ވިރުވާލުމަށްވެސް މަސައްކަތް ކުރަންޖެހެއެވެ. ނުވަތަ ހަށިގަނޑު ބައްޓަން ކުރެވިފައިވާ ގޮތަށް ބެހެއްޓުމަށްޓަކައި އިށީދެއިންނައިރު ވިސްނަންޖެހޭ ކަންކަންވެސް ހުރެއެވެ. ގައިގެ އެކި ތަންތަނުގައި ރިއްސުމާއި އުނަގަނޑުގައި ހުންނަ ތަދު ނުފިލާގޮސް އެތައް ދުވަހަކަށް ދެމިގެން ދިއުމުގެ ސަބަބުން ސިއްހީ އެތައް ނުރައްކަލަކާއި ކުރިމަތިލާންޖެހޭ މިހުންވެސް މިމުޖުތަމައުގައި މަދެއް ނޫނެވެ. ޑަބްލިއުއެޗްއޯގެ ރިސާޗްތަކުން ދައްކާގޮތުގައި 2030 ވަނަ އަހަރު އަންނަންވާއިރަށް 15 ޕަސެންޓް މީހުންނަކީ ހަރަކާތް މަދު ބައެއް ކަމަށް ލަފާކުރެވެއެވެ. 1975 އިން ފެށިގެން 2021 ވަނަ އަހަރާ ހަމައަށް އައިއިރު އާދަޔާޚިލާފަށް ފަލަ މީހުން ތިންގުނަ އިތުރުކަމަށްވެސް ސިއްހީ މާހިރުން ވިދާޅުވެއެވެ. ގިނައިރު އިށީދެއިނުމުގެ ސަބަބުން ދިމާވެދާނެ މައްސަލަތަކަކީ ކޮބައިތޯ ބަލާލާ އެކަމަށް ހޯދިދާނެ ހައްލުވެސް ބަލާލުން މުހިންމެވެ. ގިނައިރު އިށީދެގެންއިންނަނަމަ ދިމާވެދާނެ ސިއްހީ މައްސަލަތައް:
ހަށިގަނޑުގެ ބަރުދަން އިތުރުވުން
ގިނައިރު އިށީދެއިންނަނަމަ މަސައްކަތުގެ މާހައުލުގެ ސަބަބުންވިޔަސް އަދި އެހެން ސަބަބަކާހުރެ ވިޔަސް އެއީ އެންމެ ރައްކާތެރި ގޮތެއް ނޫނެވެ. އެމީހަކީ ގަވާއިދުން ކަސްރަތުކޮށް އުޅޭ މީހެއް ކަމުގައިވީނަމަވެސް، އިށީދެ އިންނަ ވަގުތު ގިނަނަމަ ބަރުދަން އިތުރުވާން ދިމާވެއެވެ. ހަށިގަނޑުގައި ހުންނަ ފެޓްސް އަދި ޝުގަރ ޑައިޖެސްޓް ނުވުމުގެ ސަބަބުން ބަރުދަން އިތުރުވެ ސިއްހީ އެހެން މައްސަލަވެސް ދިމާވެއެވެ. ޑައިޖެސްޓިވް ސިސްޓަމްއަށްވެސް އަސަރުކޮށް ބޮޑުކަމު ދިއުމުގެ މައްސަލަތައްވެސް ދިމާވެއެވެ. އޮފީހުގެ މޭޒު ކައިރީގައި އިދެ މަސައްކަތްކުރާއިރު ގަޑިއަކު އެއްފަހަރު ތެދުވެލާ ހިނގާލުމަކީ ރައްކާތެރިގޮތެވެ.
އުނަގަނޑާއި ފޫކޮޅުގެ މައްސަލަތައް ދިމާވުން
އިށީދެއިންނައިރު ހަށިގަނޑު ސީދާކޮށް ނުބެހެއްޓޭ ފަހަރު ވަރަށް ގިނައެވެ. ޚާއްސަކޮށް އިށީދެއިންނަ ގޮޑީގެ ސަބަބުންވެސް އުނަގަނޑާއި ފޫކޮޅުގެ މަސްތަކުގައި ރިއްސުމަށް މެދުވެރިވެއެވެ. ހަށިގަނޑު އިންނަންޖެހޭ ގޮތަށް ނުބެހެއްޓުމުގެ ސަބަބުން ނާރުތައް ފިތި ގޮތްގޮތްވެސް ދިމާވެއެވެ. މިގޮތަށް އިށީދެއިންނަނަމަ ތެދުވެލާ ކުޑަކޮށް ހަށިގަނޑު ދަމާލާ ކަންކަން ކުރަންވާނެއެވެ. މަސަލްސް ޕެއިން އާއްމުކޮށް ދިމާވަނީވެސް މީގެ ސަބަބުންނެވެ. ސްޕައިން އަށް އަސަރުކުރުމާއި މާބޮޑަށް ރިއްސުންވެސް ދިމާވެއެވެ. މިކަހަލަ ކަންކަން ގިނަ ދުވަހަށް ދެމިގެންދާނަމަ އާއްމު ބައްޔަކަށްވެ ނާރުތައް ފިތި ކަށިތައްވެސް ހުންނަންވާ ޕޮޒިޝަނުގައި ނުހުރެދެއެވެ.
އެންޒައިޓީ އަދި ޑިޕްރެޝަން
ގިނައިރު އިށީދެ މަސައްކަތް ކުރާ މީހުންގެ ވިސްނުމުގެ މައްސަލަތައް ދިމާވެ ޑިޕްރެޝަން ކަހަލަ ބަލިތައްވެސް ޖެހެން މެދުވެރިވެއެވެ. ގިނައިރު އިށީދެއިންނަ މީހާ މުޅި ދުވަހު އެއްވެސް ކަހަލަ ތާޒާ ކަމެއް ހަށިގަނޑަށް ނުލިބި ހަކަތަ މަދުވާން މެދުވެރިވެއެވެ. "ޕޮޒިޓިވް އެނާޖީ" ލިބުން މަދުވެއެވެ. އާއްމުކޮށް ގަވާއިދުން ކަސްރަތު ކުރާ މީހުންނަކީ އުފާވެރި ތާޒާ ބައެއްގެ ގޮތުގައި ސިފަކުރެއެވެ. މީހުންނާ ދިމާވެ ވާހަކަ ދައްކާލާ ކަސްރަތުކޮށް ނޫޅެ އަބަދު އެއްކަމަކަށް ސިކުނޑިގޮސް ހުސްވެ ގޮޑިން ތެދުވާއިރު ލިބޭ ވަރުބަލިކަން އިހްސާސްވެސް ނުކުރެވޭނެއެވެ. ދެން ކާއެއްޗެއް ކާލުމަށްފަހު ބަލާނީ އަރާމުކޮށްލެވޭތޯއެވެ. މިހާބޮޑަށް މީހާގެ ހަށިގަނޑު އެއްގޮތަކަށް ހޭނިއްޖެނަމަ ދެން ދިމާވާ އެހެނިހެން މައްސަލަތައްވެސް ހުރެއެވެ.
ކެންސަރ
ސިއްހީ މާހިރުން ވިދާލުވާ ގޮތުގައި "ލަންގް ކެންސަރ، ކޮލޯން ކެންސަރ" ކަހަލަ ކެންސަރ ތައް ޖެހުމަށްވެސް މަގުފަހިވަނީ ގިނައިރު އިށީދެ ތިބޭ މީހުންގެ ތެރެއިންނެވެ. މީގެ އަސްލު އަދި މިހާތަނަށް ހޯދިފައި ނުވެއެވެ.
އޮފީހެއްގައި މަސައްކަތްކުރާނަމަ އެންމެންވެގެން އެކުގައި ކަސްރަތު ޕްރޮގްރާމްތައް ރާވާލައި ކުޅެން ދިއުންފަދަ ކަންކަން ރާވާލުމުން އޮފީސް މާހައުލުގައި އެކުވެރިކަންވެސް ބަދަހިވެގެން ދެއެވެ.
މައުލޫމާތު: ފާސްޓް ކޮމްޕެނީ ޑޮޓް ކޮމް، ބެޓަރ ހެލްތް ޑޮޓް. ވީއައިސީ. ޖީއޯވީ. އޭޔޫ
