ކޮވިޑް-19ގެ ސަބަބުން ދިވެހިރާއްޖޭގައިވެސް ލޮކްޑައުންގެ ޙާލަތު އައުމުން ގިނައަދަދެއްގެ މީހުން ގޭގަ މަޑުކުރަންޖެހި ހުނަރުވެރިން ފެނިގެން ދިޔައެވެ. ދިވެހިންގެ ހަގީގީ ފަންނުވެރިކަން ފެނިގެން ދިޔައީ ގޭގައި ތިބެގެން އާމްދަނީ ހޯދުމަށް ގިނަ އަދަދެއްގެ ބަޔަކު އަދި ޚާއްސަކޮށް ޒުވާނުން އޮންލައިން ޕްލެޓްފޯމްތަކުގައި ފެށި އެކިވަރުގެ ވިޔަފާރިތަކުންނެވެ. އެގޮތުން ނ.މަނަދޫ ރަނައުރާމާގެ އައިމިނަތު ސުލްޠާނާ، އެކުވެރިންގެ ނަމުންނަމަ ތޯނާ އަކީ ކުރިއަރަމުން އަންނަ ޒުވާން ފަންނުވެރިއެކެވެ.
ތޯނާ އަކީ 'އާޓްސް އެންޑް ކްރާފްޓްސް'ގެ ދުނިޔޭގައި އުޅޭ ކްރިއޭޓިވް އާޓިސްޓެކޭ ބުނެވިދާނެއެވެ. ތޯނާގެ ފަންނުވެރިކަމުގެ ތެރެއިން އެންމެ އަޅައިގަންނަ އެއް މަސައްކަތަކީ އޭނާ އަމިއްލައަށް ފަހައިގެން ތައްޔާރުކުރާ ފޮތްތަކެކެވެ.
ތުއްތުކުދިންގެ ބިޒީބުކް ފެހުމާއި، ކައިވެނީގެ ރަން ޑިޒައިން ކޮށްދިނުމާއި، ފަށުފުލާއި، ތަޅުދަނޑީގައި ލައްވާ ކީޗޭން ޑިޒައިން ކުރުމާއި ވޯލް އާޓްގެ މަސައްކަތްކުރެއެވެ. ފޭސްބުކްގެ "ބީޓޫސް ކްރާފްޓް" ޕޭޖުގައި އޭނާގެ އުފެއްދުންތައް ހިއްސާކުރަމުން އަންނައިރު ތޯނާ ބުނީ ކުޑައިރުވެސް ފެހުމާއި ޑިޒައިން ކުރުމަށް ޝައުގުވެރިކަން ހުންނަ ކަމަށެވެ.
ފަންނުތައް ކުރިއަރުވާ ވިޔަފާރިއެއްގެ ގޮތުގައި މިކަން ކުރިޔަށްގެންދަން ފެށިގޮތް ޒީޓައިމްސް އާއި ހިއްސާކުރަމުން އޭނާ ބުނީ "ގޭގަ ފޫހިވެގެން އޮންނައިރު ޕިންޓްރަސްޓް ވަރަށް ބެލޭ. އެބަލާފަ އިންސްޕަޔަރ ވެގެން މީހަކު ހަދާފައިން ފޮތެއް ފެނިގެން އެގޮތަށް ހެދޭތޯ ބެލީ. އެއީ ބިޒީބުކް ހަދަން ފެށުނު ހިސާބަކީ. 4 ގަނޑު ހަދާފަ ބިޒީވެގެން ވަކި ހިސާބަކުން ދެން ބެހެއްޓީ."
އެހެންނަމަވެސް ކޮވިޑް ބަލިމަޑުކަމާއި ގުޅިގެން ގޭގައި ހުންނަން ޖެހުމުން އެފޮތް ނިންމާލަން ފުރުސަތު ލިބުނު ކަމަށް ތޯނާ ބުންޏެވެ. ތުއްތު ކުދިންނަށް އުގަންނައިދޭ އަކުރުތައް އިނގިރޭސި، ދިވެހި، ހިސާބު އަދި އަރަބި އަކުރުން ހުންނަ މި ބިޒީބުކް ތަކަކީ ތޯނާ ވަރަށް ގަޔާވެގެން ކުރާ ކަމެކެވެ. މި ފޮތްތަކުގައި ހުންނާނީ އެކި ކަހަލަ މަސައްކަތް ދަސްކުރާ ބައިތައް ހިމަނާފަކަމަށް ތޯނާ ބުންޏެވެ.
"މިގޮތަށް ތައްޔާރުކުރާ އެއްޗެހި ފެނުނީމަ މީހުން ބުނޭ ހާދަ ކްރިއޭޓިވްއޭ. ވަރަށް ރީއްޗޭ. ރައްޓެހިންވެސް ވަރަށް ސަޕޯޓްދޭނެ. އެކަމަކު މިކަން ކުރަން އިންދާ އާދެވޭ މީހަކުވިއްޔާ ބުނާނެ ކޫސަނި ކަމެކޭ. ކޮންމެ މީހެއްގެ ދުލަށް އެންމެ ފުރަތަމަ އަންނާނީ ކޫސަނި، އެބަސް" ތޯނާ ބުންޏެވެ. ނަމަވެސް އޭނާ ތައްޔާރުކުރާ ކުޑަކުދިންގެ އެކި ލެވެލްގެ ފޮތްތައް ގަންނަ ބެލެނިވެރިން ތޯނާގެ މަސައްކަތް ރަނގަޅުވެގެންނާއި ކުޑަކުދިން އެތަކެއްޗާ ގަޔާވެގެން އުޅޭކަމަށް ބުނާތީ ތޯނާ ވަރަށް ހިތްހަމަ ޖެހެއެވެ.
ތޯނާގެ އާޓްސް އެންޑް ކްރާފްޓްސް ވިޔަފާރީގައި ހިމެނޭ އެހެނިހެން މަސައްކަތަކަށް ބަލާއިރު އޭނާ ފަރުމާ ކޮށްފައިވާ އެކި ސައިޒުގެ އެކި ޑިޒައިންތަކުގެ ފަށުފޫތަކާއި، ކުރެހުންތަކާއި ކީޗޭނުތައް ފާހަގަކުރެވެއެވެ.
"ފޮތް ހަދަން ފެށީ 2020ގައި. 6 ސަފްހާގެ ފޮތެއް އެއީ. ފަހާ ފޮށިން ރޮދި ޖަހައިގެން މި ހަދަނީ. ރަށުން ގިނަ އެއްޗެހި ގަންނަން ނުލިބޭތީ އުނދަގޫ. ބޭނުންވާ ގިނަ އެއްޗެހި ގެންނަނީ މާލެއިން. ދެން ނުލިބޭ އެއްޗެހި އަލީއެކްސްޕްރެސް އިން އޯޑަރު ކޮށްގެން ގެންނަނީ".
މަނަދޫގައި ކައިވެނީގެ މޫސުމެއް އަންނަނަމަ ކައިވެނީގެ ރަން ޑިޒައިން ކުރުމަށް ތޯނާއަށް އޯޑަރު ލިބެއެވެ. އަތޮޅުގެ އެކި ރަށްރަށުންވެސް އޯޑަރު އާދެއެވެ. ތޯނާ ބުނީ ކައިވެނީގެ ރަން އެއްޗެއްސަކީ 700 ރުފިޔާ އާއި 2000 ރުފިޔާ ދެމެދުގެ އަގުތަކަށް އާންމުކޮށް އޭނާ ވިއްކާ އުޅުނު ޑިޒައިންތަކެއް ކަމަށެވެ. އެހެންނަމަވެސް އެ ޑިޒައިނެއްގައި ބޭނުންކުރާ ތަކެއްޗާއި ސައިޒާއި އޭގެ ޑިޒައިން ބަލާފައި އަގުތަކަށް ތަފާތު އާދެއެވެ.
ތޯނާގެ ހިތްވަރުގަދަ މި ބުރަ މަސައްކަތުގައި އެންމެބޮޑު އެހީތެރިކަމެއް ފޯރުކޮށްދޭ ފަރާތަކީ ފިރިމީހާ އިބްރާހިމް ރަޝީދު (އިއްބެ) އެވެ. މާލެ އާއި ރަށްރަށުން އަންނަ އޯޑަރުތަކަށް ތައްޔާރުކުރާ ހުރިހާ ސާމާނެއް ޑެލިވަރީ ކުރުމުގެ ކަންކަން ހަމަޖައްސައިދެނީ އިއްބެ ކަމަށް ތޯނާ ބުންޏެވެ. ކުޑަ ދެ ފިރިހެން ކުދިންނާއި ތޯނާގެ ދެމަފިރިންނަކީ ވަކިން ގެއެއްގައި އުޅޭ ކުޑަ އާއިލާއެއް ކަމުން މިފަދަ ފަންނެއްގައި މަސައްކަތް ކުރަން ވަގުތު ހޯދަނީ ކިހިނެއްތޯ އަހާލީމެވެ.
ނ.އަތޮޅު ހޮސްޕިޓަލްގެ މެޑިކަލް ރިކޯޑް އޮފިސަރެއްގެ މަޤާމު އަދާކުރާ ތޯނާ ބުނީ އޮފީސްގަޑި ނިންމުމަށްފަހު ރޭގަނޑު އޮންނަ އޮންލައިން ކުލާހެއްގައި އޭނާ ބައިވެރިވާން ޖެހޭ ކަމަށެވެ. އެއީ ބިޒްނަސް މެނޭޖްމެންޓް ކޯހެއް ކަމަށާއި، ކުލާސް ނިންމާފައި އޭނާގެ އާޓް މަސައްކަތަށް ލިބޭ ވަގުތަކީ ރޭގަނޑު 12ގެ ފަހެވެ.
"ވަގުތު ހޯދާކަށް އެހާ އުނދަގުލެއް ނޫން، ފިރިމީހާ ވަރަށް ސަޕޯޓްދޭނެ، ދެމީހުން ބަހާލައިގެން ހުރިހާ ކަމެއްވެސް ކުރަނީ. ދެން ކައިވެނީގެ ރަން ކަހަލަ އެއްޗެހި ޑިޒައިން ކުރާއިރު ލަކުނޑިކޮޅުތައް ކަފާލަދީ ޕޮލިޝްކޮށްދޭނެ އިއްބެ. އާއިލާގެ އެންމެންގެ ސަޕޯޓްވެސް ވަރަށް ލިބޭ"
ތޯނާގެ ބިޒީބުކްސް އާއި ކައިވެނީގެ ރަން ޑިޒައިން ކުރުމުގެ އިތުރުން ދެން އެންމެ ފާހަގަކޮށްލެވެނީ އޭނާ ހަދާފައި ހުންނަ ފަށުފޫތަކާއި ކީ ޗޭންތަކެވެ. އެކަން ފެށުނުގޮތް ކިޔައިދެމުން ތޯނާ ބުނީ "ރެސިން އެއްޗެހި ހަދަން ދަސްކުރީ މާލޭގައި އޮތް ދެ ދުވަހުގެ ވޯކްޝޯޕެއް ފޭސްބުކުން ފެނިގެން އެތަނަށް ގުޅީ. ދެން ދެ ދުވަހަށް މާލެ ގޮސްގެން އެ ކޯސް ހެދީ. ރެސިން އެއްޗެހި މާލެއިން ގަންނަނީ ވަރަށް އަގުބޮޑުކޮށް. އެހެން އެއްޗެހި އަލީއެކްސްޕްރެސްއިން އޯޑަރު ކޮށްގެން ގެންނެސްގެން މި ހަދަނީ".
ތޯނާ އިތުރަށް ބުނީ "އެކި ރަށްރަށުން އާދޭ އޯޑަރު. މާލެއިންވެސް އާދޭ. މި އެއްޗެހި ހަދާފަ މާލެ ފޮނުވަން. ދެން ބައެއް ފަހަރު ރީތި މަލެއް ގޭގައި އިންދާ ފެނިއްޖެއްޔާ މާ ހިއްކާލާފަވެސް ހަދަން. މޫދު ކައިރިން ފެންނަ ބޮލި އެއްޗެހި ބޭނުންކޮށްގެންވެސް ފަށުފޫ އެއްޗެހި ހަދަން."
ސްކޫލު ދުވަސްވަރުގައި ފެހުމަށް ޝައުގުވެރިކަން އުފެދުނީ ތޯނާގެ މައިންބަފައިންގެ ސަބަބުންނެވެ. އޭރު ހުންނަނީ ފައިން އަނބުރައިގެން ފަހާ އާދައިގެ ފަހާފޮށި ކަމުން އޭރު ފެހުމަކީ ވަރަށް އުނދަގޫ ކަމެއްކަމަށް ތޯނާ ބުންޏެވެ. އެހެންނަމަވެސް މަންމަ އާއި ބައްޕަ ފަހާތީ ހިތްވަރުކޮށްފައި ބައްޕަ އަދުނާން މޫސާ ކައިރިން ފަހަން ދަސްކުރިއެވެ.
ކިޔަން ފަށާ އުމުރުގެ ކުދިންނަށް ބޭނުންވާނެ ފޮތްތަކެއް މިހާރު ތައްޔާރުކުރަމުން އަންނަ ތޯނާ މިސްރާބު ޖަހާފައި ހުރީ އޭނާ އޮންލައިންކޮށް ކުރަމުން އަންނަ ވިޔަފާރި އިތުރަށް ފުޅާ ކުރުމަށެވެ. ތޯނާ ބުނީ ފިހާރައެއް ހުޅުވައިގެން ރަށުގައި މިކަން ފުޅާކުރުމުގެ ވިސްނުމުގައި މިހާރު މަސައްކަތްތަކެއް ކުރެވެމުން ދާ ކަމަށެވެ. އެގޮތުން މަސައްކަތަށް ބޭނުންވާ ސާމާނު އޭނާ އަންނަނީ ހޯދަމުންނެވެ.
ޒީ ޓައިމްސްއިން އެދެނީ ތޯނާގެ މިމަސައްކަތް އިތުރަށް ފުޅާވެ، ތޯނާގެ ފަރާތުން މި ހުނަރު ދަސްކޮށް މިކަމުގައި ދިވެހި ޒުވާނުންގެ ފަންނުވެރިކަން ކުރިއަރައިގެން ދިއުމެވެ.
