އައްޑޫ ސިޓީއަށް އުފަން ޒާރިފާ އަހުމަދު (ޒާރީ) އަކީ 2010ވަނަ އަހަރު ދިމާވި ސިއްޙީ މައްސަލައަކާއި ގުޅިގެން ދާއިމީ ބޭހެއްގެ ގޮތުގައި ކަސްރަތު ހިޔާރު ކުރި ފަރާތެކެވެ. ދިއެފްއެމް އާއި ރާއްޖެޓީވީ އަދި އެންމެ ފަހުން ސަންޓީވީން ފެނުނު ޒާރީ އަކީ މިހާރު އެއްވެސް މީޑިއާއަކުން މީހުންނާ ބައްދަލު ނުކުރި ނަމަވެސް ގިނަ ބަޔަކަށް ކަސްރަތުން އުފާވެރިކަން ގެނެސްދީ ހިތްހަމަ ޖައްސައިދޭ ޔޯގާ އިންސްޓްރަކްޓަރެކެވެ.
ޒާރީ ބުނީ ދާއިމީކޮށް ކަސްރަތު ކުރަން ފެށީ މުޅި މީހާ ދުޅަވާން ފެށުމުންނާއި ނޭވާލާން އުނދަގޫވެގެން ކަމަށެވެ. ޑޮކްޓަރަށް ދައްކާ ހެދި ޓެސްޓުތަކުން އޭނާއަށް ދިމާވެގެން އުޅޭ މައްސަލަ އަކީ ހަކުރުބަލިކަން އެނގިގެންނެވެ. "ޑޮކްޓަރު ދިނީ ދެ އޮޕްޝަނެއް. ބޭސްކާނީތޯ ނުވަތަ ކަސްރަތު ކުރާނީތޯ. ޒާރީ އެހީ ޑޮކްޓަރު ކައިރި ބޭސް ނުކައި ރަނގަޅުވާނެތޯ. ބުނި ކަސްރަތު ކޮށްގެން މިހާރު ހުރި ސްޓޭޖުން ބަލި ރަނގަޅު ކުރެވިދާނެއޭ. ވަރަށްގިނަ ދަތި އުނދަގޫތަކާއި ދިމާވި ކެއުމުގެ އަހުލާގު ހިފަހައްޓަން ޖެހުނު. ކަސްރަތުން އިރާދުކުރެއްވީތީ މިހާރު މިހިރީ އާދައިގެ މީހަކަށް ބަދަލުވެފަ."
ޒާރީ ފުރަތަމަ ކަސްރަތު ކުރަން ފެށީ 30 މިނިޓުގެ މަޑު ދުވުމަކުންނެވެ. އޭގެ ފަހުން އެކުވެނި ދުވާ ޓްރެކުން ބައްދަލުވި ދުވާ ގުރޫޕަކާއެކު ދުވުމުގެ ޓްރޭނިންތައް ހަދާ އެކަމުގެ ވައްޓަފާޅި ދަސްކޮށްގެން ޒާރީ ވަނީ 5 ކިލޯ މީޓަރުގެ ދުވުމެއް ފުރިހަމަކޮށްފައެވެ. އެއަށްފަހު ދިގު ދުވުންތަކަށް ފަރިތަވެ 21 ކިލޯ މީޓަރަށް ދުވެ ހާފްމެރަތަން އެއް ނިންމާލުމުގެ އުފާވެރިކަންވެސް ޒާރީއަށް ހާސިލުވިއެވެ.
ޔޯގާގެ ތެރެއަށް ވަދެވުނީ ކިހިނެއްތޯ އަހާލުމުން ޒާރީ ބުނީ ޔޯގާ އަކީވެސް ހަކުރުބައްޔަށް ޝިފާ ލިބޭ ކަމެއް ކަމަށް މީހަކު ބުނެގެން އެކަން ތަޖުރިބާކުރުމަށް މާލޭގައި ޔޯގާ ދަސްކޮށްދޭ ތަންތަނަށް ދާން ފެށި ކަމަށެވެ. އަދި އެކަމުން ލުއިތަކެއް ލިބޭތީ އެކަން ހުއްޓާނުލާ ކުރިޔަށް ގެންދިޔައީއެވެ.
މިވަގުތު މާލެ ދޫކޮށް އެނބުރި ރަށަށް ދިރިއުޅުން ބަދަލުކޮށްފައިވާ ޒާރީ ކުރިންވެސް ނިންމައިގެން ހުރީ ދަރިން ކިޔަވާ ނިމުނީމަ އަމިއްލަ ވަޒަނަށް އުފަން ރަށަށް ދިރިއުޅުން ބަދަލުކޮށްލުމަށެވެ. އެ ވިސްނުމުގައި ޒާރީ އިންޑިއާއަށްގޮސް ޔޯގާ އިންސްޓްރަކްޓަރ ކޯހުގެ ދެ ލެވެލެއް ފުރިހަމަ ކުރިއެވެ. "2019ގައި ފުރަތަމަ ކޯސް ހެދީ އިންޑިއާގެ ގޯއާއަށް ގޮސްގެން. އޭގަ ޖެހުނު 200 ގަޑިއިރު ހަމަކުރަން. ވަަރަށް ގިނަ ޤަވާއިދުތަކެއްގެ ތެރެއިން ވަރަށް އެހެންކަހަލަ ތަޖުރިބާއެއް އެއީ. ދެން މާލެ އައިސް މަހެއް ވަންދެން ގޭގެއަށް ގޮސްގެން މީހުންނަށް ޔޯގާ ހަދައިދިނިން. އޭރު ހިތަށްއެރި އަދި މިވަރަކުން މާ ބޮޑު އެއްޗެއް ނޭނގެއޭ. އެޑްވާންސް ކޯހެއް ހަދައިިގެންނޭ ރަށަށްދާންވާނީ." މި ވިސްނުމުގައި ޒާރީ ވަނީ ދެވަނަ ފަހަރަށްވެސް އިންޑިއާއަށް ގޮސް ޔޯގާ އިންސްޓްރަކްޓަރ ކޯހުގެ އެޑްވާންސް ލެވެލް ފުރިހަމަ ކޮށްފައެވެ.
މީޑިއާއިން ޒާރީ ގެއްލުނީތަ؟
"ހަގީގަތުގައި މީޑިއާ އާއި ދުރުނުވަން. 2019ވަނަ އަހަރު ސަންޓީވީ އުވާލަން ޖެހުނު ހިސާބުން ފެށިގެން ވިސްނައިގެން ހުރީ ދަރިން ކިޔަވާ ނިމުނީމަ 2020ވަނަ އަހަރު އަމިއްލަ އުފަން ވަޒަނަށް އަންނަން. ދެން ސަންޓީވީ އުވާލުމުގެ ކުރިން ވިސްނީ ރަށުގައި ހުރެގެން ކުރާނީ ކޮން ކަމެއްބާއޭ. ރަށުގައި ނެތޭ ކުރާނެ ކަމެއް. ރަށުގައި ނެތޭ ޓީވީއެއް ރޭޑިއޯއެއް. ދެން ވަޒީފާގެ ދަތިކަން އެހާ ބޮޑޭ. އެހެންވީމަ ހިތަށް އެރީ ފިޓްނަސްގެ ދާއިރާއިން ތަމްރީނުތަކެއް ލިބިގެން ރަށަށް ގޮއްސިއްޔާ ހާއްސަކޮށް ޔޯގާ ރަށުގައި ތިބިމީހުންނަށް ދަސްކޮށްދީގެން ކޮންމެވެސް ކަހަލަ އާމްދަނީއެއް ލިބިދާނެއޭ. އެހެންވެ ޔޯގާ ދަސްކުރަން ފެށީ. މީޑިއާ ދާއިރާއަކީ ޕެޝަންއެއް" ކަމަށެވެ. އަދިވެސް ބްރޯޑްކާސްޓް މީޑިއާގެ ދާއިރާއިން ފުރުސަތެއް ލިބިއްޖެނަމަ ޒާރީ ހުރީ އަނެއްކާވެސް ބެލުންތެރިންގެ ޒާރީއަކަށްވާން ތައްޔާރަށެވެ.
"ޒާރީ ޒާރީއަކަށްވެގެން ދިޔައީ ދިއެފްއެމްގެ އެހުންތެރިން، ދިއެފްއެމް ވިޝުއަލް ރޭޑިއޯގެ ބެލުންތެރިން. ރާއްޖެޓީވީ އަދި ސަންޓީވީގެ އެހުންތެރިންނާއި ބެލުންތެރިންގެ ސަބަބުން. ޒާރީއަކީ ބެލުންތެރިންގެ މީހެއް. އަދިވެސް މިހިރީ އެ ދާއިރާއިން ފުރުސަތު ލިބުނު ވަރަކުން ކުރިއަށްދާން. އެހެންނަމަވެސް ފުލްޓައިމް ވަޒީފާއެއް ގޮތަކުން ނޫން." ޒާރީ ބުންޏެވެ.
ޔޯގާއިން ޒާރީއަށް ތަޖްރިބާ ކުރެވުނު ފައިދާތައް
ޒާރީ އަކީ 24 އަހަރުގެ ފިރިހެން ދަރިއަކާއި 17 އަހަރުގެ އަންހެން ދަރިއެއްގެ ހިތްވަރުގަދަ އަދި އެހާމެ މުރާލި މަންމައެކެވެ. ކިތަންމެ ބުރަކޮށް އުޅުނުކަމުގައިވިޔަސް އަމިއްލަ ހަށިގަނޑާދޭތެރޭ ވިސްނާ ޒާރީ ބަލާބެލުމަށް އަދިވެސް އުމުރަށްވުރެ ހަގުކަމަށް ދައްކަނީ ގަވާއިދުން ކަސްރަތު ކުރާތީ އެވެ.
"ބޭސް ނުކާންވެގެން ކަސްރަތު ކުރަން ފެށީ. މީ ބޭސް ނުކައި ކުރެވޭ ބޭހެއް. ދާއިމީ ގޮތެއްގައި ކަސްރަތު ކުރުމަކީ ވަރަށް މުހިންމު ކަމެއް. ކިތަންމެ ބުރަކޮށް މަސައްކަތް ކުރިނަމަވެސް ވަރަށް މުހިންމު ކަމެއް އަމިއްލަ ސެލްފަށްޓަކައި، ވެލްތަށްޓަކާ، ހެލްތަށްޓަކާ ކަސްރަތު ކުރުން. ނަފްސަށް ވަގުތު ކޮޅެއް ދީގެން އަމިއްލަ ނަފްސާ ދޭތެރޭ ވިސްނާލުން މުހިންމު. ތަޖުރިބާ ކޮށްފަ މިބުނަނީ." ޒާރީ ބުންޏެވެ.
ޒާރީއަށް ހަކުރުބަލިން އަރައިގަނެވުމުގެ އިތުރުން ލިބޭ އިތުރު ހިތްހަމަޖެހުމަކީ ޒާރީގެ ކްލަޔަންޓުންގެ ފަރާތުން ލިބޭ ފީޑްބެކާއި ކްލަޔަންޓުންގެ ހިނިތުންވުމެވެ. މާލޭގައި ޕްރައިވެޓް ޔޯގާ ސެޝަންތައް ނަގައިދިން އިރު އެންމެ ފުރަތަމަ ކްލަޔަންޓަކީ އާތްރައިޓިސް ހުރި ވަރަށް އުމުރުން ހަގު ފަރާތެކެވެ. އޭނާ ނަމާދު ކުރަނީ ގޮނޑީގައި އިނދެގެން ކަމަށް ޒާރީ ބުންޏެވެ. އަތުގެ އިނގިލިތައް ދުޅަވެ އަތުންވެސް ކަމެއް ނުކުރެވޭ މީހެކެވެ. "3 މަސް ވަންދެން ކަސްރަތުތައް ކުރުވީ ހަފްތާއަކު ތިން ދުވަހު. ވަރަށް އުފާވި ކަކޫ ލަންބައިގެން ސަޖިދައަށް ގޮސްގެން ނަމާދުކުރެވެއޭ ބުނީމަ." އެ ކްލަޔަންޓު ދޫކޮށްލާފަ އައްޑޫއަށް ދާން ޖެހުމުން ޒާރީ ހުރީ ވަރަށް ދެރަވެފައެވެ.
މީގެ އިތުރުން ޒާރީ ފާހަގަކުރީ ކަނދުރާގެ މައްސަލަ ހުރި މީހަކަށް ޒާރީ ކްލާސް ނަގައިދީގެން ލިބުނު ލުއިތަކެވެ. "އޭނާއަށް ހިނގާލަންވެސް ނުކެރޭ، ބޭސް ކައިގެން ނިދާކަމަށް ވަނީ. ޒާރީ ގޮސްގެން ޔޯގާގެ ހަރަކާތްތައް ކުރުވައިގެން އިރާދުކުރެއްވިޔާ ވަރަށް ރަނގަޅުވި. ބޭސް ނުކައި ނިދެއޭ ބުނި. އައްޑޫއަށް އައިއްސަވެސް އެންމެ ފުރަތަމަ އާތްރައިޓިސް ހުރި ފަރާތަކަށް ބުނެދިނީ. އަތުން އެއްވެސް ކަމެއް ނުކުރެވެއޭ ބުނި. އެކަމަކު މިހާރު ވަރަށް ބޮޑު ލުއިތަކެއް ލިބިއްޖެ އެ ކްލަޔަންޓަށްވެސް" ޒާރީ ބުނީ ޔޯގާއަކީ ވަރަށް އިފެކްޓިވް ކަސްރަތެއްކަން އޭނާ އަމިއްލައަށް ތަޖުރިބާ ކުރެވިއްޖެ ކަމަށެވެ. އެހެންނަމަވެސް ދެރަކަމަކީ ބައެއް މީހުން އުނދަގޫތަކަށް ލުޔެއް ލިބުނީމަ ކަސްރަތު ހުއްޓާލުމެވެ. ޒާރީގެ އިލްތިމާސަކީ ހުއްޓާނުލާ ގަވާއިދުން ކަސްރަތު ކުރުމެވެ.
ޒާރީ ބުނީ ޔޯގާއަކީ ބްރީތިން އެކްސަސައިޒެއް ކަމަށެވެ. ނޭވާލާން ދަސްކޮށްދޭ މިކަސްރަތަކީ ހަމައެކަނި ބޮޑެތިމީހުންގެ ކަސްރަތެއް ނޫން ކަމަށެވެ. "7-11 އަހަރާއި ދެމެދުގެ ކުދިންނަށް ކުޑަކުދިންގެ ލެވެލްގައި ކުރިޔަށް ގެންދަން ރަނގަޅު ކަސްރަތެއް. ވައިޑީޕީ ނޫނީ ކުޅިވަރުގެ ގްރާސްރޫޓު ލެވެލްގެ ހަރަކާތަތްތައް ގެންދާ އުސޫލުން ޔޯގާވެސް ގެންދެވޭނެ." ކަމަށެވެ.
ޓިވީތަކުން ގެއްލުނު ނަމަވެސް ޒާރީ އަދިވެސް ހުރީ މީހުންނާ ވަރަށް ގާތުގައެވެ. "ޔޯގާ ދަސްކޮށްދޭ މީހެއްގެ ގޮތުގައި މިހާރު މިހިރީ. ވަރަށް ހިތްހަމަޖެހޭ ކްލަޔަންޓުންގެ ފަރާތުން ލިބޭ ހިތްހަމަޖެހުން. އެގަޑިއަށް ކްލަޔަންޓުން ތައްޔާރުވެގެން ހުރުން. ކަމެއް ދަސްކޮށްގެން އައިސް އަދި އެހެންމީހުންނަށް އެކަން ދަސްކޮށްދިނުން އެއީ ވަރަށް އުފާވެރިކަން ލިބިގެންދާ ކަމެއް." މި ވަގުތު އެންމެ ހެޔޮ އަގުގައި ޔޯގާ ކުލާސްތައް ނަގައިދޭ ޒާރީއަށް އެންމެ އުފާވަނީ އެއްވެސް ކްލަޔަންޓެއްގެ ފަރާތުން ހިތްހަމަ ނުޖެހޭކަމެއް ފާހަގަ ކުރެވިގެން އެއްޗެއް ނުބުނާތީއެވެ. ލިބޭ ފީޑްބެކް ރަނގަޅުވީމައެވެ. ޒާރީ ބޭނުންވަނީ ލިބޭ އާމްދަނީއަށް ވުރެ ބޮޑަށް މިކަމުން ލިބޭ ފައިދާތައް މީހުންނަށް އިހްސާސް ކޮށްދިނުމެވެ.
