ޒަމާނުއްސުރެ އަޅުގަނޑުމެން ދިވެހިންނަކީ ތަފާތު އެކި ކަންކަމުގައި ރާއްޖެއިން ބޭރަށް ދަތުރު ކުރަންޖެހޭ ބައެކެވެ. އާންމު ދިރިއުޅުމުގައި ބޭނުންކުރާ ގިނަ އެއްޗިއްސަކީ ރާއްޖެއިން ބޭރުން ގަންނަ އެއްޗިއްސެވެ. ތައުލީމު ހާސިލް ކުރުމަށާއި ބޭސްފަރުވާގެ އިތުރަށް ޒަރޫރީ އެކި ބޭނުމަށް ރާއްޖެއިން ބޭރަށް ދާންޖެހޭއިރު ފައިސާގެ މުއާމަލާތް ކުރުމަށް އެހީތެރިވެދޭ އެއް ބޭންކަކީ ބޭންކް އޮފް މޯލްޑިވްސް (ބީއެމްއެލް) އެވެ.
ރާއްޖެއިން ބޭރުގެ ވިޔަފާރި މުއާމަލާތްތަކުގައި މިދިޔަ އަހަރުގެ އޮކްޓޯބަރު މަހުން ފެށިގެން ބޭންކް އޮފް މޯލްޑިވްސްގެ ވިސާ ކާރޑުން، ބޭރުފައިސާ ނެގުމުގެ އަދަދު މަދުކުރެވިގެން ދިޔައީ ހީވެސް ނުކުރާފަދަ ބޮޑު އަދަދަކަށެވެ. މިކަމުގެ ސަބަބުން ރާއްޖެއިން ބޭރުގައި ދިރިއުޅޭ ދިވެހިންނަށް ދިމާވަމުންދާ ދަތިތައް ދެނެގަނެ އެކަމަށް ހައްލެއް ހޯދަން އާދޭސް ކުރި އެތައް ދިވެހި ދަރިންނެއް އެބަތިބިކަން ބޭންކް އަށް އެގިވަޑައިގަތް ބާވައެވެ. މިކަމަށް ހައްލެއް ލިބިގެން ދިޔަތޯ، މިއީ ބަލަން މުހިންމު ކަމެކެވެ. މިކަމުގެ ސަބަބުން ދިމާވި ދަތިކަންތައްތަކުގެ ވާހަކަ ހިއްސާކޮށްފައިވާ ފަރުދުންގެ ވާހަކަތައް ސޯޝަލް މީޑިއާއިން ފެނިގެންދިޔައެވެ.
އަޅުގަނޑަކީ ރާއްޖެއިން ބޭރުގައި ދިރިއުޅޭ މީހަކަށްވާތީ މިކަމުގައި އަޅުގަނޑުގެ ތަޖުރިބާވެސް ހިއްސާކޮށްލާނަމެވެ. ބޭންކް އަށް ގުޅަން މަސައްކަތް ކޮށް ވަރަށްގިނަ ފަހަރު ވަނީ އެކަން ނާކާމިޔާބު ވެފައެވެ. އިންޓަރނޭޝަނަލް މެސެޖް ކޮށްގެން އަދި އީމެއިލް ކޮށްގެންވެސް ޖަވާބު ނުލިބި އެތައް ދުވަހެއް ފާއިތުވެގެން ދިޔައެވެ. ހަމަ މިގޮތަށް އަޅުގަނޑުގެ ރަހުމަތްތެރިން މިކަން ތަޖުރިބާ ކުރަން ޖެހުނު އަދަދެއްވެސް ނޭނގެއެވެ. ގިނަ ފަހަރަށް ބޭންކާ މުއާމަލާތް ކުރަން މިޖެހެނީ ބޭންކުގައި އުޅޭ ކޮންމެވެސް ރައްޓެއްސެއް މެދުވެރިކޮށެވެ. ނުވަތަ ބޭންކަށް ނުގުޅިގެން ފޭސްބުކް އަދި ޓްވިޓަރ ގައި ލިޔެގެންނެވެ.
ރާއްޖެއިން ބޭރަށް ކިޔަވަންދިއުމަށް ހަމަޖެހުނު ސްޓޫޑެންޓް ލޯނަކީ ބޭންކް އޮފް މޯލްޑިވްސް މެދުވެރިކޮށް ދިވެހި ފައިސާއިން ލިބިފައިވާ ލޯނަކަށްވާއިރު، ލޯނު ދޫކުރެވިފައިވާ ދިވެހި ފައިސާގެ އަދަދަކީ ބޭންކް ރޭޓަށް ކަޑައެޅިފައިވާ އެއްޗެކެވެ. އެހެން ނަމަވެސް މިހާލަތުގައި ކިޔަވަންދާ ފަރާތުން މިޖެހެނީ އަގުބޮޑުކޮށް ޑޮލަރު ގަނެގެން އެތައް ފައިސާއެއް އަމިއްލަ ޖީބުން ހަރަދު ކޮށްގެން ކިޔަވާށެވެ. ޔުނިވަރސިޓީ ފީ ދެއްކުމުގެ 1 މަސް ކުރިން ބޭންކަށް އެންގި ނަމަވެސް ގިނަފަހަރު ބޭންކް މެދުވެރިކޮށް ފައިސާ ހަމަޖެހެނީ ދައްކަން އޮންނަ މުއްދަތު ފާއިތުވެގެންދާ ފަހުންނެވެ. މިކަމުގެ ސަބަބުން ކިޔަވާ ކުއްޖާ ފައިސާ ދައްކަން މިޖެހެނީ ޖޫރިމަނާ އާއި އެކުގައެވެ. ވިސާ ކާރޑް މެދުވެރިކޮށް ފައިސާ ދައްކައިފިނަމަ ކާޑުން އިތުރަށް ފައިސާ ކަޑައެވެ. މިއީ އަޅުގަނޑު އަމިއްލައަށް ތަޖުރިބާ ކުރަންޖެހުން ކަންތައްތަކެވެ. ބުރަ މަސައްކަތުން ރާއްޖެއިން ބޭރަށް ކިޔަވަން ދާން ފުރުސަތު ލިބިގެން ގޮސް މިކަހަލަ ދަތިތަކާއި ކުރިމަތިލާން ޖެހުން މިއީ ވަރަށްވެސް ހިތާމަހުރި ކަމެކެވެ.
ބޭންކް އޮފް މޯލްޑިވްސް ވިސާ ކާޑުން ކޮންމެ މަހަކު 750 ޔޫއެސް ޑޮލަރަށް ވާ ދިވެހި ފައިސާގެ އަދަދެއް ކަޑައެޅިފައިވާ އިރު، އެއީ އާއިލާއެއް ނަމަ މިޖެހެނީ އެތައް ދަތިތަކެއް ގިރާކުރާށެވެ. 750 ޔޫއެސް ޑޮލަރަކީ ކުލި ދައްކާފައި ކައިގެން ބޮއިގެން އުޅެވޭވަރުގެ އަދަދެއް ނޫނެވެ. އަދި މީގެ އިތުރުން ބަލި ވެއްޖެނަމަ ޑޮކްޓަރަށް ގޮސް ފައިސާ ދައްކަން ބަލާއިރު، ބޭންކުން ހަމަޖައްސަދީފައިވާ ވަގުތީ ލިމިޓަށް އެދިގެން ފައިސާ ދައްކާލެވެނީ 4 ނުވަތަ 5 ގަޑިއިރު ހޭދަކުރުމަށްފަހުގައެވެ. ބިލަށްވާ ފައިސާގެ އަދަދު އެގިގެންދަނީ ޑޮކްޓަރަށް ދައްކާ ނިމުމަށް ފަހުއެވެ. ޑޮކްޓަރަށް ދައްކަން ދިއުމުގެ ކުރިން ބޭންކަށް އަންގާފައި ދިޔަ ނަމަވެސް މިކަން އަވަސް ކުރެވިފައެއް ނުވެއެވެ. މިއީވެސް ހަމަ އަޅުގަނޑުގެ އަމިއްލަ ތަޖުރިބާ އެވެ. އަޅުގަނޑުގެ މަންމަ ބަލިވެގެން ޑޮކްޓަރަށް ދައްކަން ގޮސް ވަރަށްގިނަ ދަތިތަކާ ކުރިމަތިލާން ޖެހުނެވެ. ބަލިމީހަކު ގޮވައިގެން އެތައް ގަޑިއިރެއް ހޮސްޕިޓަލެއްގައި ހޭދަކުރުމަކީ އެހާ ފަސޭހަކަމަކަށް ނުވާނެތާއެވެ.
ކަސްޓަމަރުންގެ ކަންބޮޑުވުންތަކަށް ހައްލެއް ހޯދައިދިނުމަށް ބީއެމްއެލްއިން ކުރަމުންދާ މަސައްކަތްތަކަކީ ކޮބައިތޯ ބަލައިލުމަށް ކުރި މަސައްކަތުގައި 'ޒީޓައިމްސް' އިން ކުރި ސުވާލުތަކަށް ބޭންކް އޮފް މޯލްޑިވްސް އިން ދިން ޖަވާބު ތިރީގައި މިވަނީ އެވެ.
1- ކާޑުން ބޭރުގެ މުއާމަލާތް ކުރުމުގައި ބޭންކުން ލިމިޓެއް ކަނޑައެޅުނު ގޮތުގެ ތަފްސީލް؟
" ކޮރޯނާ ވައިރަހުގެ ބަލިމަޑުކަމާއި ގުޅިގެން އިގްތިސާދަށް ވަނީ ވަރަށް ބޮޑު ހީނަރުކަމަކާ ކުރިމަތިވެފަ. ރާއްޖެއަށް ބޭރު ފައިސާ ލިބޭ މިންވަރު ވަރަށް ބޮޑަށް ދަށްވުމާއެކު، ޒަރޫރީ ބޭނުންތަކަށް މުދާ އެތެރެ ކުރުމަށާއި ރާއްޖެއިން ބޭރުގައި ސިއްޙީ ހިދުމަތާއި ތައުލީމް ހޯދުމަށް ދައްކަންޖެހޭ ފައިސާ ނުހުއްޓި ލިބޭގޮތް ހަމަޖެއްސުމުގެ ގޮތުން 2020 ވަނަ އަހަރު ސެޕްޓެމްބަރު މަހު ބީއެމްއެލް އިން ވަނީ އަވަސް ފިޔަވަޅުތަކެއް އަޅާފަ. ރާއްޖޭން ބޭރުގައި ދިރިއުޅޭ ކަސްޓަމަރުންނަށް 750 ޑޮލަރުގެ ލިމިޓެއް ކަނޑައަޅާފަ ވިއަސް ސިއްޙީ އަދި ތަޢުލީމާ ގުޅުންހުރި ކަންކަމުގައި ލިމިޓް ވަނީ އިތުރުކޮށްފަ. އަދި މިއަހަރުގެ ޖުލައި މަހުގެ 17 ވަނަ ދުވަހުން ފެށިގެން ބީއެމްއެލް އިން ދޫކޮށްފައިވާ ކްރެޑިޓް ކާޑުގެ ތެރެއިން ކޮންމެ ކާޑަކުން މަހެއްގެ މައްޗަށް ރާއްޖޭން ބޭރުގެ މުއާމަލާތް ކުރެވޭ އަދަދު މިވަނީ 250 ޑޮލަރުން 500 ޑޮލަރަށް އިތުރުކޮށްދީފަ." ބޭންކުން މައުލޫމާތު ދިނެވެ.
2- ބޭސްފަރުވާ އަށާއި ތައުލީމީ ބޭނުންތަކަށް ކާޑުގެ ލިމިޓް އިތުރުކުރެވޭނެ ގޮތްތައް؟
" ކާޑުގެ ލިމިޓް އިތުރު ކުރުމަށް އިންޓަރނެޓް ބޭންކިންގ މެދުވެރިކޮށް ލިޔެކިޔުންތަކާއެކު ރިކުއެސްޓް ފޮނުވޭނެ. 'ސަރވިސް ޓައިޕް' މެނޫއިން 'ޓެމްޕޮރަރީ ކާޑް ލިމިޓް' ހިޔާރު ކުރޭ. މިގޮތަށް ހުށަހެޅުން ލިބޭތާ 24 ގަޑިއިރުތެރޭ ބޭންކުން ޕްރޮސެސް ކުރުމަށްފަހު ލިމިޓް ހަމަޖެހުމުން ކަސްޓަމަރަށް ގުޅާނެ."
ބޭންކުން މައުލޫމާތު ދިންގޮތުގައި ކާޑު ބޭނުންކުރަމުންދާ ކަސްޓަމަރުންނަށް ވިސާ/މާސްޓަރކާޑްގެ އިތުރު ޑެބިޓް ކާޑާއި އިތުރު ކްރެޑިޓް ކާޑު ދޫނުކުރުމަށް ވަނީ ނިންމާފައެވެ. ކާޑު ލިބިފައިވާ ކަސްޓަމަރުންނަށް އިތުރު ކާޑު ހަދައިދިނުން ހުއްޓާލާފައި ވަނީ ރާއްޖެއިން ބޭރަށްދާ ޑޮލަރު ހިފެހެއްޓުމުގެ ގޮތުން ކަމަށް ވަނީ ބުނެފައެވެ. އަދި މުއްދަތު ހަމަވާ ކާޑާއި ހަލާކުވާ ކާޑުގެ ބަދަލުގައި އައު ކާޑު ކުރިއެކޭ އެއްގޮތަށް ދޫކުރަމުން ދާނެ ކަމަށް ވަނީ ބުނެފައެވެ. ބޭންކުން ގެނެސްފައި މިވަނީ ވަގުތީ ބަދަލެއް ކަމަށާއި ހާލަތަށް ބަލައި އިތުރު ބަދަލު ގެނެވޭނެ ކަމަށް ވަނީ މައުލޫމާތު ދީފައެވެ.
