އަޅުގަނޑުމެން ކޮންމެ އިންސާނަކީވެސް ދުނިޔޭގައި ތަފާތު ކަންކަން ހާސިލުކުރަން ބޭނުންވާ ބައެކެވެ. ފައިސާގެ ގޮތުން އެތައް ޚަރަދެއް ހިނގާ ކަންކަމަކީ ޚާއްސަކޮށް މުއްސަދިންނަށް ނޫނީ ނުވާނެ ކަންކަމޭ ބުނުމަކީ ދޮގަކަށް ނުވާނެއެވެ. އެހެންނަމަވެސް ހިތްވަރާއެކު މަސައްކަތް ކުރާ މީހަކަށް ކަންކަން ހާސިލުކުރެވިދާނެއެވެ. މިކަމުގެ މިސާލެއްގެ ގޮތުން ބުނެދޭން މިއުޅެނީ އަވައްޓެރި އިންޑިއާގެ ކެރެލާ އަށް އުފަން އުމުރުން 71 އަހަރުގެ ކޭ.އާރް ވިޖަޔަން އާއި އުމުރުން 69 އަހަރުގެ އަންހެނުންގެ ހުވަފެން ހަގީގަތަކަށް ހަދައިދިން ދިރިއުޅުމުގެ ވާހަކައެވެ.
މި ދެމަފިރިންގެ ހުވަފެނަކީ ދުނިޔޭގެ ހުރިހާ ގައުމުތަކުގެ ރީތި މަންޒިލްތަކަށް ދަތުރުކުރުމެވެ. މި ދެމަފިރިންނަކީ މީގެ 27 އަހަރު ކުރިން ފެށި ވަރަށް އާދައިގެ ކުޑަކުޑަ ވިޔަފާރިއަކުން މިކަން ސާބިތުކޮށްދެމުންދާ ދެމަފިރިންނެވެ. މި މީހުން އާމްދަނީ ހޯދުމަށް ކުރާ މަސައްކަތަކީ ސައި ވިއްކުމެވެ. ވަރަށް އާދައިގެ ކުޑަ ސްޓޯލްއެއް ހުޅުވައިގެން ސައި ވިއްކަމުންދާއިރު މިހާތަނަށް މި ދެމަފިރިން ވަނީ ދުނިޔޭގެ 25 ގައުމަކަށް ދަތުރުކޮށް 26 ވަނަ ގައުމަށް ދަތުރު ކުރުމަށް ތައްޔާރުވެފައެވެ. 'ސްރީ ބަލާޖީ ކޮފީ ހައުސް'ގެ ނަމުން ނަންދެވިފައިވާ މި ދެމަފިރިންގެ މި ކުޑަ ރެސްޓޯރެންޓް ބިނާވެފައި ވަނީ މިމީހުންގެ މުޅި ދިރިއުޅުމުގެ ހުރިހާ ކަމަކަށެވެ. މިކަމުން ލިބޭ އެއްޗަކުން ފައިސާ ރައްކާކޮށްގެން މިއަދު މި މީހުން ބޭނުންވާ ހުރިހާ މަގްސަދެއް ހާސިލް ކުރެވިދާނެ ކަމަށް ދެކެއެވެ.
މި ދެމަފިރިން ދުނިޔޭގެ އެކި މަންޒިލް ތަކަށް ދަތުރު ކުރުމަށް ފުރަތަމަ ފަށައިފައިވަނީ 2007 ވަނަ އަހަރުގައެވެ. އެހާހިސާބަށް އަންނަންދެން ރައްކާކުރެވުނު ފައިސާ އިން އެމީހުންނަށް ވިސްނުނީ ދުނިޔޭގެ އެކި ގައުމުތަކަށް ދަތުރުކުރެވޭ ވަރަށް ފައިސާ އެއްކުރެވިއްޖެ ކަމެވެ. މިގޮތުން މި ދެމަފިރިންގެ ފުރަތަމަ މަންޒިލަކަށް ޚިޔާރުކޮށްފައި ވަނީ އިސްރާއީލެވެ. އަދި މީގެ އިތުރުން ބްރިޓެއިން، ފްރާންސް، އޮސްޓްރިއާ، އިޖިޕްޓް، ޔޫ.އޭ.އީ ފަދަ ގައުމުތައް ހިމެނެއެވެ. އަދި މީގެ އިތުރުން މި ދެމަފިރިންގެ ކާމިޔާބީގެ ވާހަކަ ފުރަތަމަ ފަހަރަށް އިންޑިއާގެ ނޫހަކަށް އަރާފައި ވަނީ 2019 ވަނަ އަހަރުއެވެ. އެއަށްފަހު ޚާއްސަކަމަކަށް ފާހަގަކޮށްލަން ބޭނުންވާ އެއްކަމަކީ އިންޑިއާގެ މަހިންދްރާ ގްރޫޕުގެ ޗެއާމަން މި ދެމަފިރިންނަށް ދީފައިވާ ސްޕޮންސަރ އެވެ.
ކޮވިޑްގެ ކުރިން 2019 ވަނަ އަހަރުގެ ޑިސެމްބަރ ގައި މި ދެމަފިރިން ދަތުރުކޮށްފައިވާ އެންމެ ފަހު މަންޒިލަކީ އޮސްޓްރޭލިއާ އަދި ނިއުޒިލެންޑެވެ. ކޮވިޑްގެ ނުރައްކާތެރި ހާލަތުން ދުނިޔެ އަރައިގަންނަމުންދާ މަންޒަރު ފެނި، މި ދެމަފިރިން މިހާރު ތައްޔާރުވަމުން ދަނީ ފޮށިތައްމަތި ބަދެގެން އަނެއްކާވެސް ދެން ހުރި މަންޒިލްތަކަށް ވާސިލް ވުމަށެވެ. މިގޮތުން މާދަމާ މިފަހަރުގެ މަންޒިލަށް ދިއުމަށް ފުރަން ހަމަޖެހިފައިވަނީ ރަޝިއާ އަށެވެ. އަދި މިދެމަފިރިން އުންމީދު ކުރަނީ މިދަތުރުގައި ރަޝިއާގެ ރައީސް އާއި ބައްދަލުކުރުމަށެވެ.
މި ދެމަފިރިން ދަތުރު ކުރުމުގެ ހުރިހާ ކަމެއްގައިވެސް އެހީތެރިވެދެނީ ދަތުރު ކުރާ އެޖެންސީ އިން ކަމުގައި އެ ދެމަފިރިން ވަނީ ބުނެފައެވެ. އެންމެބޮޑު އެއް ސަބަބެއްކަމުގައި ވަނީ އިނގިރޭސި ބަހަށް އެހާ ފަރިތަ ނުވުމެވެ. ކޮވިޑްގެ ހާލަތަށް ފަހު ދަތުރުފަތުރު ކުރެވޭނެ އިންތިޒާމް ހަމަޖެހިގެން ދިޔަކަން މިދެމަފަރިންނަށް އަންގައިދިނީ އެޖެންސީއިން ކަމުގައިވެސް ވަނީ ބުނެފައެވެ. މި ފަހަރުގެ ދަތުރުގައި ކާފަ ދަރިންވެސް ގެންދިއުމަށް ހަމަޖެހިފައިވާ ކަމަށް ވިޖަޔާން ހާމަކޮށްފައިވެއެވެ. ރަޝިއާއަކީ އަބަދުވެސް ވަރަށް ދާން ބޭނުންވާ މަންޒިލެއް ކަމުގައި ވިޖަޔާންގެ އަންހެނުން މޮހާނާ ވަނީ ބުނެފައެވެ. ދުނިޔޭގެ ގައުމުތަކަށް ދަތުރު ކުރުމުގެ ހިޔާލަކީ ވިޖަޔާން ބައްޕައާއި އެކު އިންޑިއާގެ ބައެއް ތަންތަން ބަލާލަން ދިއުމުގެ ތެރެއިން ގަޔާވި ކަމެއްކަމަށް ވަނީ ބުނެފައެވެ. ވިޖަޔާން އަކީ ވަރަށް ކުޑައިރުއްސުރެ އާއިލާގެ އެތައް ޒިންމާއެއް ނަމަގުން އައި މީހަކަށްވެފައި، އޭގެ 15 އަހަރު ފަހުން ބޭނުންވީ އޭނަ ދެކެމުން އައި ހުވަފެން ހަގީގަތަކަށް ހެދުމަށެވެ. މި ދެމަފިރިން ރައްކާކޮށްފައި ވަނީ ދުވާލަކު 300 ރުޕީސް އެވެ. އަދި މީގެ އިތުރަށް ކުދި ލޯނު ނަގައިފައިވެއެވެ. ދަތުރު ނިންމާލުމަށް ފަހު މާލަސްތަކެއް ނުވެ ލޯނު އަދާކޮށް ހިތްހަމަޖެހިލައިގެން މަސައްކަތް ކުރިއަށްގެންދާ ކަމަށް ވަނީ ބުނެފައެވެ.
މައުލޫމާތު އަދި ފޮޓޯ: އިންޑިއާ ޓައިމްސް، މީޑިއަމް
