ހަމަހިމޭން ވަގުތުކޮޅެއް ހޭދަކުރުމަށް ދަރިންނަށް ދަސްކޮށްދީ އެއާދަ އަށަގަންނުވާށެވެ. އަދި ކޮންމެ ދުވަހަކުވެސް ވަކި ވަގުތެއް އެކަމަށް ކަނޑައަޅާ ގަވާއިދުން އެކަން ކުރާށެވެ.
މިކަމުގެ ސަބަބުން ދަރިންގެ ވިސްނުން ތަރައްގީވުމަށް ވަރަށް ބޮޑަށް އެހީވެދެއެވެ. އަވަސް އަވަހަށް ކަންކަން ބަދަލުވެގެން އަންނަ އިޖްތިމާއީ ވެއްޓެއްގައި ދަރިން އަންނާނީ ކޮންމެ ދުވަހަކުވެސް އާ މައުލޫމާތެއް ލިބިގަންނަމުންނެވެ. އެ މައުލޫމާތަކީ ބުއްދި ހަމަޖެހޭ ގަބޫލުކުރެވޭ މައުލޫމާތެއްކަން ދެނެގަތުމަށް ކުދިންނަށް އެ މައުލޫމާތު ފަހުމުވާން ޖެހެއެވެ. އެކަން އެކުދިން ކުރާނީ އަޑުމަޑު މާހައުލެއްގައެވެ.
ހަމަހިމޭން ވަގުތުކޮޅޭ މިކިޔަނީ ކޮން ވަގުތަކަށް؟
އަޑުމަޑު ހަމަހިމޭން ވަގުތުކޮޅެކޭ މި ބުނަނީ ކޮންމެ ދުވަހަކުވެސް ތާވަލުކޮށްގެން ދަރިންނަށް ދެވޭ އަމިއްލަ ވަގުތުކޮޅަށެވެ. އެ ކުދިން އެކަނި ތިބެގެން މިނިވަންކަމާއެކު ހޭދަކޮށްލަންދޭ އެ ވަގުތުކޮޅު ވާންވާނީ އިލެކްޓްރޯނިކް ޑިވައިސްތަކާއި ދުރު ވަގުތުކޮޅަކަށެވެ. ރައްކާތެރި މާހައުލެއްގައި ދަރިން އަމިއްލައަށް ކުޅެލާ ހިތްހަމަޖައްސާލަން ދެވޭ މި ވަގުތު ކޮޅު ކޮޓަރީގައިވެސް ހޭދަކޮށްލެވިދާނެއެވެ. ގޭގައި މައިންބަފައިން ފިޔަވާ އިތުރު މީހަކު ނޫޅޭނަމަ ސިޓިންރޫމުގައިވެސް އެވަގުތުކޮޅު ހޭދަކުރެވިދާނެއެވެ.
ކުޑަކުދިންނަށް ދެވޭ އެ ހަމަހިމޭން ވަގުތުކޮޅު ނިމުނުކަން އަންގައިދޭން ޓައިމާއެއް ސެޓްކުރުމުން އެކުދިންނަށް ފަސޭހަވާނެއެވެ. އާންމުގޮތެއްގައި ހަމަހިމޭން ވަގުތުކޮޅަކަށް ކަނޑައަޅަނީ 30 މިނިޓެވެ. ބައެއް ބެލެނިވެރިން އެއްގަޑިއިރަށްވެސް ދަންމާލައެވެ.
ދަރިންނަށް ބޭނުންވާ ވަރަކަށް ހަމަހިމޭން ވަގުތު ކަނޑައަޅާ ޓައިމާ ސެޓް ކުރެވިދާނެއެވެ. ކައިރި ކައިރީގައި ލިބިފައިވާ ދެކުދިންނަމަ އެ ދެކުދިންނަށް ހަމަހިމޭން ވަގުތުކޮޅު ހޭދަކުރުމަށް ދެތަނެއް ކަނޑައަޅަން ވާނެއެވެ. ތުއްތު ކުދިން ދުވާލު ކުޑަވަގުތުކޮޅަކަށް އާންމުކޮށް ނިދާނެއެވެ. އެހެން ނިދާ ނިދުން ހުއްޓާލާ އުމުރުން ފެށިގެން ހަމަހިމޭން ވަގުތުކޮޅެއް އެކުދިންނަށް ދިނުން ވަރަށް މުހިންމެވެ.
ހަމަހިމޭން ވަގުތުކޮޅެއް ތައާރަފް ކުރާނީ ކިހިނެތް؟
ޝެޑިއުލެއް އޮތުމަކީ ކުޑަކުދިންނަށް ވަރަށް ފައިދާ ކުރާނެ ކަމެކެވެ. ގަވާއިދުން ކޮންމެ ދުވަހަކުވެސް އަމަލުކުރަންޖެހޭ ޝެޑިއުލެއް އޮތުމުން ކުދިންނަށް ކަނބޮޑުވުންތަކެއް ކުރިމަތިނުވެ ދުވަހުގެ ހުރިހާ ވަގުތެއްގައިވެސް ހިތްހަމަޖެހުން ލިއްބައިދެއެވެ.
އެހެންކަމުން ޝެޑިއުލެއް ތައްޔާރުކޮށް ކޮންމެ ދުވަހަކުވެސް ހަމަހިމޭން ވަގުތުކޮޅެއް ހޭދަކުރުމަށް އެއްގަޑިއެއް ކަނޑައަޅާފައި ކުދިން އެ ޝެޑިއުލާއި އެއްގޮތަށް ހޭނުވުން މުހިންމެވެ. މިއީ 2 އަހަރުން ފެށިގެން 18 އަހަރާއި ދެމެދުގެ ހުރިހާ އުމުރެއްގެ ކުދިންނަށްވެސް ފައިދާހުރި ގޮތެކެވެ.
ހަމަހިމޭން ވަގުތުކޮޅު ހޭދަކުރުމަށް ކުދިން އެކަނި ބައިތިއްބާއިރު އެތަނުގައި ހުންނަ ތަކެއްޗަކީ އެކުދިން ބޭނުން ކުރަން ރައްކާތެރި އެއްޗެހިކަން ކަށަވަރު ކުރަންވާނެއެވެ.
އަދި ވަކި ގަވާއިދުތަކެއް ހަދާފައި އެއަށް އަމަލުކުރުވަން ވާނެއެވެ. މިސާލަކަށް ހަމަހިމޭން ވަގުތުކޮޅުގެ ތެރޭގައި އިލެކްޓްރޯނިކް ވަސީލަތެއް ބޭނުން ކުރާނަމަ އެކަމަށްވެސް ވަކި ގަވާއިދުތަކެއް ހެދިފައި އޮންނަން ޖެހޭނެއެވެ. އޭރުން އެ ވަގުތުކޮޅުގެ ބޭނުން އެންމެ ފައިދާހުރި ގޮތުގައި ކުދިންނަށް ލިބޭނެއެވެ.
ގަވާއިދުތައް ހަދާއިރު ޓައިމާ ނިމުމުން އެތަނުން ދާންޖެހޭނެ ކަމަށާއި، އެއްޗެހި ހަލާކު ނުކުރުމަށާއި، މާ އަޑުގަދަނުކުރުމަށް އެކުދިންނަށް ބުނެދޭން ވާނެއެވެ. އެ ގަވާއިދުތަކަށް އެކުދިން އަމަލުކުރޭތޯވެސް ބަލަންވާނެއެވެ.
ކުދިންނަށް ލިބޭ މައުލޫމާތު ޕްރޮސެސް ކުރުމަށް އެހީވެދޭ
ހަމަހިމޭން ވަގުތުކޮޅަކީ ކުދިންނަށް ލިބޭ އާ މައުލޫމާތާއި ކުރީގެ މައުލޫމާތު އާ ގޮތަކަށް ބޭނުން ކުރުމަށް އެ މައުލޫމާތު އިތުރަށް ދެނެގަތުމަށް 'ޕްރޮސެސް' ކުރުމަށް އެހީވެދޭ ވަގުތުކޮޅެކެވެ. ކޮންމެ ދުވަހަކުވެސް ކުދިންނަށް އެތައްބައިވަރު އާ މައުލޫމާތެއް ލިބޭއިރު އެ މައުލޫމާތާއި މެދު ވިސްނާ އެއީ ހަމަޖެހޭ ކަމެއްތޯ ދެނެގަންނަށް ޖެހޭނެއެވެ.
ހަމަހިމޭން ވަގުތުކޮޅަކީ އެ މައުލޫމާތާއި މެދު ވިސްނާ ފިކުރުކޮށްލަން ކުދިންނަށް ލިބޭ ވަގުތެވެ. އަދި އެ ދަސްވާ އެއްޗެއް ޕްރޮސެސް ކުރުމަށްފަހު ތަރުތީބުކޮށްލަން ލިބޭ ވަގުތުކޮޅެކެވެ.
އުފެއްދުންތެރިކަން ނުވަތަ ކްރިއޭޓިވިޓީ އިތުރުވުން
ޝެޑިއުލްކޮށްގެން ދެވޭ ހަމަހިމޭން ވަގުތުކޮޅަކީ ކުދިން ހިޔާލީ ކަންކަމުގެ ތެރޭގައި މަޝްއޫލުވެގެން އުޅޭ ވަގުތުކޮޅެކެވެ. އެ ހިޔާލުތައް މުއްސަނދިވުމަށް އެ ވަގުތުކޮޅު އެހީވެދެއެވެ. އަދި އޭގެ ސަބަބުން ކުދިންގެ ކިބައިގައިވާ އުފެއްދުތެރިކަން ތަރައްޤީވެއެވެ.
ހަމަހިމޭން ވަގުތުކޮޅަކީ ތިމާގެ ސިކުނޑި ހުއްޓޭ ވަގުތެއް ނޫނެވެ. އެވަގުތު ސިކުނޑި ވަރަށް ބީޒީ ކަމާއެކު މަސައްކަތް ކުރަމުންދާނީ ކަންކަމާމެދު ފިކުރުކޮށް އެކަންކަން ވަނީ ކީއްވެތޯ ދެނެގަނެ އާ މައުލޫމާތުތައް ހަމަޖެހޭ އުސޫލަކުން ސިނކުޑީގައި ރައްކާކުރުމަށެވެ. ބޭރުން އަންނަ އަޑުތަކާއި އެހެންމީހުންގެ ހިޔާލުތައް ނާހާ އެކަނިމާ އެކަނި އިނދެގެން ވިސްނާއިރު ކުދިންނަށް އެކުދިންގެ ކިބައިގައި ހުންނަ އުފެއްދުންތެރިކަން ބޭނުން ކުރެވޭނެއެވެ. އަދި އެވަގުތުކޮޅު ކުދިންގެ ހިޔާލީ ކަންކަން ކުރިޔަށް ނެރެ އެކުދިންގެ ކްރިއޭޓިވިޓީ އިތުރުވުމަށް އެހީވެދޭނެއެވެ.
ކުދިންނަށް ރީޗާޖްވުމަށް އެހީވެދޭ
ހަމަހިމޭން ވަގުތުކޮޅަކީ ކުދިންނަށް ރީޗާޖް ވެލަން ލިބޭ ފުރުސަތެކެވެ. އެހެންމީހުންގެ ފަރާތުން އަންނަ ފާޑުކިއުންތަކާއި ދުރުގައި އެކަނި ވަގުތުކޮޅެއް ހޭދަކޮށްލުމުން ކުދިންނަށް އެހެން ކުދިންނާއެކު އުޅޭއިރު ތަހައްމަލުކުރަން ދަސްވެއެވެ. އެހެންގޮތަކަށް ބުނާނަމަ އެހެން ކުދިންނާއެކު އުޅޭއިރު ކެތްތެރިކަން ބަހައްޓައިގެން އުޅުމަށް ދަސްވެއެވެ.
ޝެޑިއުލްކުރެވިގެން ދެވޭ ހަމަހިމޭން ވަގުތުކޮޅުގެ ސަބަބުން ކުދިން އިތުރަށް ތާޒާވެ ރީޖާޗްވުމުގެ ސަބަބުން ކުދިންގެ ކިބައިގައި ހުންނަ ރުޅިވެރިކަމާއި ހިތްހަމަނުޖެހުންތައް ދަށްކޮށްދެއެވެ.
ކުދިން ރީޗާޖްވެ ހިތްހަމަޖެހިފައި ތިބޭއިރު އެކުދިންނާއިއެކު ވަގުތު ހޭދަކުރުމަށް ބެލެނިވެރިންނަށްވެސް ފަސޭހަވެގެންދާނެއެވެ.
އިހުސާސްތައް ރަނގަޅަށް ދަސްވުން
ކުޑަކުދިން އެކަނި ތިބެ އެ ހޭދަކުރާ ހަމަހިމޭން ވަގުތުކޮޅުގެ ސަބަބުން އެކުދިންނަށް ކުރެވޭ އިހުސާސަތް މާ ރަނގަޅަށް ދަސްވެއެވެ. އެކަނި އިނދެގެން އަމިއްލައަށް ކުރެވޭ އިހުސާސްތައް އިހްސާސް ކުރުމުގެ ފުރުސަތު ކުދިންނަށް ލިބެން ޖެހެއެވެ. އަދި އެކުދިންގެ އަމިއްލަ އިހުސާސްތަކުގެ އަގުވަޒަންކުރެވި އެކި އެކި އިހްސާސްތަކުގެ ތަފާތު ދަސްވުމަށް އެވަގުތުކޮޅު އެހީވެދެއެވެ. މީގެ ސަބަބުން އެންޒައިޓީ އާއި ޑިޕްރެޝަންގެ އަލާމާތްތައް އަށަގަތުމުން ދުރުކޮށްދީ ކުދިންގެ ނަފްސާނީ ދުޅަހެޔޮކަން އިތުރުކޮށްދެއެވެ.
ނަފްސަށް ހަމަޖެހުން ގެނެސްދޭ
އަމިއްލަ ނަފްސަށް އަމިއްލައަށް ހަމަޖެހުން ހޯދުމަށް ކުދިން ދަސްކުރުމަކީ މުހިންމު ކަމެކެވެ. ހަމަހިމޭން ވަގުތުކޮޅެއް ހޭދަކޮށްލުމުން ފޫހިކަން މެނޭޖްކުރުމާއި އެކު އަމިއްލަ ނަފްސަށް ހިތްހަމަޖެހުން ހޯދުމަށް ކުދިންނަށް ފުރުސަތު ލިބެއެވެ. އަދި ކަންކަމާއި ދިމާވުމުން ހާސްވެ ރުޅިގަދަވުމުގެ ބަދަލުގައި މަޑުމައިތިރިވެ ހަމަޖެހުމަށް އަދި އިމޯޝަނަލް ރައްދުދިނުމުގައި އަމަލުކުރަންވީ ރަނގަޅުގޮތް ދަސްވެއެވެ.
ހިތްހަމަނުޖޭ ކަންކަން ދިމާވުމުން އަމިއްލައަށް ނަފްސަށް ހަމަޖެހުން ގެނެވޭ ކުދިންނަނީ އާންމުކޮށް އާ ކަންކަން ތަޖްރިބާ ކުރުމުގެ ހިތްވަރު ހުންނަ އަދި އެފަދަ ކަންކަމަށް ބޭނުންވާ ކުދިންނެވެ. މީގެ ސަބަބުން ކަމަކާއި ކުރިމަތިލާއިރު ކުއްޖާގެ އަމިއްލަ ނަފްސަށް އޮންނަ އިތުބާރާއި އަމިއްލަ ނަފްސަށް އޮންނަ ޔަގީންކަން ބޮޑުވެއެވެ.
ކަންކަމަށް ހުށިޔާރުވެ ސަމާލުކަންދެވޭ މިންވަރު އިތުރުން
ހަމަހިމޭން ވަގުތުކޮޅެއް ހޭދަކުރުމުން ކުދިންނަށް ކަންކަމަށް ހުޝިޔާރުވެ ސަމާލުކަން ދިނުމަށް ފުރުސަތު ލިބެއެވެ. ސަމާލުވެ ހުރުމަށް ފަރިތަކުރުމަކީ އިމޯޝަނަލް ދުޅަހެޔޮކަން އިތުރުކޮށްދޭ ކަމެކެވެ. އަދި ހިތްހަމަޖެހުމާއި މަޑުމައިތިކަން އަމިއްލަ ނަފްސަށް އިހްސާސްކޮށްދޭ ކަމެކެވެ. ހާއްސަކޮށް ފުރާވަރުގެ ކުދިން ސަމާލުވެ ހުރުމަށް ފަރިތަކުރުން ވަރަށް މުހިންމެވެ.
މިއީ ކުޑަކުދިންނަށް އަމިއްލައަށް ހަމަހިމޭން ވަގުތުކޮޅެއް ހޭދަކޮށްލަން ދިނުމުން ލިބޭ ފައިދާތަކެވެ. ގަވާއިދުން ކޮންމެ ދުވަހަކުވެސް ހަމަހިމޭން ވަގުތުކޮޅެއް ހޭދަކުރުމަށް ދަރިންނަށް ފުރުސަތުދިނުމުން އެކަމުގެ ފައިދާ މުޅި އުމުރަށްވެސް ކުރާނެއެވެ. އަދި ހިތްހަމަ ނުޖެހޭ ހާލަތްތަކުގައިވެސް މަޑުމައިތިރިވެ ހަމަޖެހެން އަމިއްލައަށްވެސް ކުދިންނަށް ދަސްވާނެއެވެ. ކުދިން ބޮޑުވަމުން އަންނައިރު އެކުދިންގެ ނަފްސާނީ ދުޅަހެޔޮކަންވެސް އިތުރުކޮށްދެއެވެ.
މައުލޫމާތު ނަގައިފައިވަނީ: ހެލްތް ސަފިސިއެންޓް ކިޑްސް
