މޭ މަހުގެ 4 ވަނަ ދުވަހު ފެށި އޯލެވެލް އާއި އައިޖީސީއެސްއީ އަދި އެސްއެސްސީ އިމްތިހާނަށް ގްރޭޑް 10 އެއްގެ ދަރިވަރުން ތައްޔާރުކުރުމުގައި އަވަދިނެތި މަސައްކަތްކުރާ މުދަރިސުންނަށް އައްސަރިބަހާއި ސާބަހެވެ. މިއަދުވެސް ދަރިވަރުން ސުކޫލަށް ހާޒިރުކޮށްގެން އިތުރު ގަޑި ނަގައިދީ ޖެހިގެން އޮތް އިމްތިހާނަށް ކުދިން ތައްޔާރުކޮށްފިއެވެ. މައިންބަފައިންނަށް ވުރެ ގާތުން ކުދިންގެ ކިޔެވުމުގެ ކަންކަން ބަލާ މުދައްރިސުންވެސް އެބައުޅެއެވެ.

އިތުރު އެހީ ބޭނުންވަނީ ކޮން ކުދިންނެއްތޯ ދެނެގަނެ އެ ކުދިންނަށް ވަކިވަކިން ގުޅައިގެންވެސް ސުކޫލަށް ގެންދެއެވެ. އިމްތިހާނަށް ތައްޔާރުކުރުވަން ކުރީ އަހަރުތަކުގެ ސުވާލު ކަރުދާސްތައް ރިޕީޓްކޮށްވެސް މުތާލިއާ ކުރަމުން އެބަ ގެންދެއެވެ.

ސުކޫލުތަކަށް ކުދިން ގެންގޮސްގެން ޖެހިގެން އޮތް އިމްތިހާނަށް މުތާލިއާކުރަމުން ދާއިރު، ކުދިން ސުކޫލަށް ނުދާނަމަ ބެލެނިވެރިންނަށް ގުޅައިގެން ކުދިން ސުކޫލަށް ފޮނުވައި ދިނުމަށްވެސް އެދެއެވެ. މިއީ ޓީޗަރުން ކުދިންގެ މުސްތަގްބަލަށްޓަކައި ވާ ޤުރުބާނީއެކެވެ.

Advertisement

ދުވާލާއި ރޭގަނޑުވެސް ކުދިން ސުކޫލަށް ގެންގޮސްގެން އިމްތިހާނަށް ތައްޔާރު ކުރުމުގައި އުޅޭ މުދަރިއްސުން އެވާ ޤުރުބާނީ އާއި އެއްވަރަށް ބައެއް މައިންބަފައިން ނުވަތަ ބެލެނިވެރިންނަށްވެސް މަސައްކަތް ނުކުރެވެއޭ ބައެއް ފަހަރު ހިތަށް އަރައެވެ.

އިމްތިހާނަށް ތައްޔާރުވުމަށްޓަކައި ހުރިހާ ސުކޫލެއްގައި ދުރާލާ މަސައްކަތް ފެށިއެވެ. މިއަހަރުގެ އޯލެވެލް އިމްތިހާނުގައި ރާއްޖެއިން 5939 ދަރިވަރުން ބައިވެރިވެފައިވެއެވެ. ރާއްޖޭގެ އިތުރުން މެލޭޝިއާ އަދި ސްރީލަންކާގައިވެސް މިފަހަރު ބައެއް ދިވެހި ދަރިވަރުން އޯލެވް އިމްތިހާނު ހަދައެވެ.
އިމްތިހާނުން ކުދިން ފާސްވާ މިންވަރަށް މަސައްކަތް ކޮށްދިނުމަށް ސުކޫލުތަކުގެ މެނޭޖްމެންޓާއި ޓީޗަރުން ކުރާ ބުރަ މަސައްކަތަށް ބެލެނިވެރިންގެ އެއްބާރުލުން ވަރަށް މުހިންމެވެ. ބައެއް ފަހަރު ފެންނަނީ ސުކޫލަށް ދަރިވަރުން ފޮނުވުމުގައި ބެލެނިވެރިން އިހްމާލުވާ މަންޒަރެވެ. ސުކޫލުތަކުގެ ވައިބާ ގުރޫޕުތަކުގައި ޓީޗަރުން އާދޭހާއެކު އެދެނީ ކުދިން ސުކޫލަށް ފޮނުވައިދިނުމަށެވެ.

އޯލެވެލް އިމްތިހާނު ކައިރިވިއިރު ނިމިގެން މިދިޔަ ރޯދަމަހު ބައެއް ސުކޫލުތަކުގެ ހާޒިރީ ދަށްވިކަން ސުކޫލުތަކުން ފާހަގަ ކުރިއެވެ. ޚާއްސަކޮށް ގްރޭޑް 10 ގެ ދަރިވަރުން ސުކޫލަށް ނުދާ ދުވަސްތައް ގިނަވެގެން ބައެއް ސުކޫލުތަކުގެ ޕްރިންސިޕަލުން ވަނީ ބެލެނިވެރިންނާ ބައްދަލުކުރައްވާ އެ ބެލެނިވެރިންގެ ދަރިން ސުކޫލުގެ ހަތަރުފާރުން އެތެރެކޮށްދިނުމަށް އާދޭސް ދަންނަވާފައެވެ. އަދި ސުކޫލަށް ގަވާއިދުން ހާޒިރުވާނަމަ އެއިން ކޮންމެ ކުއްޖަކީވެސް އޯލެވެލްގައި ނަތީޖާ ރަނގަޅު ކުއްޖަކަށް ހަދައިދެވޭނެ ކަމުގެ ޔަގީންކަން ސުކޫލަށް އޮތްކަމަށް ބެލެނިވެރިންނަށް އަންގަމުން ގެންދިޔައެވެ.
ބައެއް ބެލެނިވެރިން ބުނަނީ އެމީހުންގެ ދަރިންގާތު ސުކޫލަށްދާން ކިތަންމެ ވަރަށް ބުންޏަސް ބައެއް ދުވަސްދުވަހު ސުކޫލަށް ނުދާ ކަމަށެވެ. އަދި ބައެއް ދަރިވަރުން ސުކޫލަށްދާން ނުހޭލާ ކަމަށާއި ރޭގަނޑު ލަސްވަންދެން ހޭލާ އުޅޭ ކަމަށެވެ. މިފަދަ ކަންކަން ބެލެނިވެރިންގެ ކޮންޓްރޯލުން ނައްޓައިގެން ދިއުމުގެ ކުރިން ހުރިހާ ބެލެނިވެރިންވެސް ކުދިންނަށް ރަނގަޅު މަގު ދައްކައިދީ ގަވާއިދުން ސުކޫލަށްދާ ކުދިބަޔަކަށް ދަރިން ހެދުން ވަރަށް މުހިންމެވެ.

ބޮޑު ޚަރަދުކޮށްގެން ބޭރު ގައުމެއްގެ އިމްތިހާނެއްގައި ދަރިވަރުން ބައިވެރިކޮށްދޭއިރު އެ ދަރިވަރުން އިމްތިހާނަށް ތައްޔާރު ނުވާނަމަ އެއީ ގައުމަށް ލިބޭ ދެރައެކެވެ. އިލްމީ ޖީލެއް ބިނާކުރުމަށް ކުރާ މަސައްކަތަށް ލިބޭ ވަރަށް ބޮޑު ހީނަރުކަމެކެވެ.
ވީމާ ޓީޗަރުން އެ ކުރާ ބުރަ މަސައްކަތަށް ބެލެނިވެރިން އެއްބާރުލުން ދިނުން މުހިންމެވެ. ކުދިންނަށް ރަނގަޅު ނަތީޖާއެއް ހޯދައިދޭން ގަދައަޅާ މަސައްކަތް ކުރާށެވެ. ނަމަވެސް ކުދިންނަށް ޕްރެޝަރ ކުރުން ފަދަ ކަންކަން ނުކޮށް ކުދިން އިމްތިހާނަށް ހާޒިރުވާއިރު އެކުދިންގެ މޫޑް ރަނގަޅުކޮށްދެވޭތޯ ބެލުން މުހިންމެވެ. ރޯދައަށް ނުހުންނަނަމަ އިމްތިހާނަށް ދިއުމުގެކުރިން ކުދިންނަށް ރަނގަޅު ކެއުމެއް ތައްޔާރުކޮށްދިނުމާއި ކުދިންނަށް ހިތްވަރުދިނުން ފަދަ ކަންތައް ބެލެނިވެރިން ކުރުން މުހިންމެވެ.

މިއަދު އިމްތިހާނު ހަދަމުން އެދާ ދަރިވަރުން 10 އަހަރުވަންދެން ސުކޫލު މާހައުލުގައި އެކުރި ބުރަ މަސައްކަތުގެ ނަތީޖާ ފޮނިކޮށް ދިނުމަށް ޓީޗަރުންނެކޭ އެއްފަދައިން ބެލެނިވެރިން ކުރާ މަސައްކަތަށްވެސް 'ސެލިއުޓް' ހައްގެވެ. ކުދިންނަށް ޓިއުޝަން ނަގައިދިނުމާއި ގަޑިން ގަޑިއަށް ކުދިން ގޮވައިގެން ސުކޫލަށް ހިނގާ ހިނގުންތަކާއި އެކުދިންނަށްޓަކައި ރެއާ ދުވާލު އަރާމެއް ނެތި ބުރަކޮށް މަސައްކަތްކޮށްދޭ ބެލެނިވެރިންވެސް ވަރަށް ގިނައެވެ. އެގޮތުގައި ފާއިތުވި 10 އަހަރު ހޭދަކުރުމަށްފަހު ސުކޫލުން ދަރިފުޅު ވަކިވެގެންދާއިރު އޯލެވެލް އިމްތިހާނުން ރަނގަޅު ފާހެއް ނުލިބިއްޖެނަމަ އެ ހިނގުންތަކާއި އެ ގުރުބާނީތަކުގެ ނިމުން އެ އަންނަނީ ވަރަށް ދެރަވަރުކޮށްނެވެ.

ވީމާ ދަރިވަރުންގެ އަޒުމަކަށްވާންވާނީ އޯލެވެލް އިމްތިހާނުން ފާސްވެ މުދައްރިސުންނާ މައިންބަފައިން އެކޮށްދޭ ބުރަ މަސައްކަތް އަދި އަމިއްލައަށް ފާއިތުވި 10 އަހަރު ކުރަމުން އައި މަސައްކަތުގެ ނިމުން އުފާވެރިކުރުމަށް ގަދައަޅާ މަސައްކަތް ކުރުމެވެ. މި އަހަރު އޯލެވެލް އިމްތިހާނު ހަދަމުން އަންނަ ހުރިހާ ދަރިވަރުންނަށް ކާމީޔާބީއަށް އެދެމެވެ.