ސްކޫލުގެ ކިޔެވުން ފެށެނީއެވެ. މައިންބަފައިން އަވަދިނެތި ތައްޔާރު ވަމުން ދަނީ ކުދިން ސްކޫލަށް ފޮނުވުމަށް ބޭނުންވާ ސާމާނު ހަމަކުރުމުގައެވެ ޔުނީފޯމު އިސްތިރިކޮށް ފޮތްތައް ހަމަކޮށްދިނުމުގައެވެ. މިކަންކަމަށް ތައްޔާރުވާއިރު، އަޅުގަނޑުމެންގެ ޅަދަރިންނަށް ވިސްނައިދޭންޖެހޭ ވަރަށް މުހިންމުކަމެއް އެބައޮތެވެ.
ކުޑަ ދަރިފުޅު ކައިރީގަ ބުނީމެވެ. ދަރިފުޅާއެވެ. ސްކޫލަށް ދާއިރު ކުލާހުގައި ތަފާތު ކުދިން އުޅޭނެކަން ވިސްނާށެވެ. އޭގެތެރޭގައި ޚާއްސަ އެހީތެރިކަމަށް ބޭނުންވާ ކުދިންވެސް އުޅޭނެއެވެ. ވާހަކަ ދައްކަން އެހާބޮޑަށް ނޭނގޭ ކުދިން ވެސް އުޅޭނެއެވެ. ބޭނުންވާކަމެއް ނުވެއްޖެނަމަ އަޑުގަދަކޮށް ރޯކުދިންވެސް އުޅެދާނެއެވެ. ކުއްޖެއްގެ ފަރާތުން ހިތްހަމަނުޖެހޭ ކަމެއް ދިމާވެއްޖެނަމަ ޓީޗަރ ކައިރީގަ ބުނާށެވެ. ބަދަލުގަ ގޯސްކަމެއް ނުކުރާށެވެ. އަދި ގޯސް ކަންތައްތަކަކީ ކޮބައިކަން ވެސް ކިޔައިދިނީމެވެ.
ވަރަށް ފަހުން ދިމާވިކަމެކެވެ. ފަޔަށް ދިމާވި މައްސަލައަކާއި ގުޅިގެން މީހަކު މަގުމަތިން ހިނގާފަ ދިޔައީ ކޮރުޖަހަމުން ކަހަލަ ގޮތަކަށެވެ. ވަގުތުން ދަރިފުޅު ސުވާލު ކުރިއެވެ. އެމީހާ އަރައިގެން ހުރި ބޫޓުގެ އުސްމިން ތަފާތީ ކީއްވެތޯ އެވެ. އަދި އެމީހާ އެގޮތަށް ހިނގަނީ ކީއްވެތޯ އެވެ. ނަސީބަކުން އެދުވަހު އެމީހާއަށް އަޑު ނީވެއެވެ. ޖަވާބުގައި ބުނީމެވެ. ދުނިޔޭގައި އެކި މީހުންނަށް ދިމާވާނީ އެކި ގޮތެވެ. ބައެއް މީހުންނަށް ހިނގުމުގެ ނަސީބެއް ނުލިބެއެވެ. އެމީހާއަށް އެގޮތަށް ހިނގުމަކީވެސް އެއްގޮތަކަށް ނުހިނގި ގޭގަ ހުންނަންޖެހުމަށްވުރެ ލިބުނު ނަސީބެއް ނޫންހެއްޔެވެ. ދަރިފުޅުގެ ކާފައަށް ބަލާބަލާށެވެ. އެއްގޮތަކަށްވެސް ނުހިނގި އެގޮތަށް އޮންނަތާ 4 އަހަރު ވަނީ ނޫންހެއްޔެވެ. މިގޮތަށް ކިޔައި ދިނުމުން ދަރިފުޅަށް ވިސްނުނެވެ. އަދި ނުކުޅެދުންތެރިކަމެއް ހުއްޓަސް އެކަން އެމީހަކަށް އަޑުއިވޭ ވަރަށް ބުނުމުން ދެރަވާނެކަން ވެސް ވިސްނުނެވެ. އަދި އެފަދަ ކުދިންނާއި މީހުންނަށް އިހްތިރާމް ކުރަންވެސް ދަސްވިއެވެ. މީގެއިތުރުން މާތް ﷲ ދެއްވާފައިވާ ނިޢުމަތްތަކަށް ޝުކުރުވެރިވާން ވެސް ދަސްވިއެވެ.
ކޮވިޑްގެ ބަލިމަޑުކަމަށްފަހު ވަރަށްގިނަ އާއިލާތަކަށް ލިބޭ އާމްދަނީ ވަނީ މަދުވެފައެވެ. ބައެއް ދަރިވަރުން އެންމެ އަގުބޮޑު ދަބަސް ފަދަ ތަކެތި ސްކޫލަށް ގެންދާއިރު އެންމެންނަށް އެފަދަ ތަކެތި ހޯދަ ނުދެވޭނެއެވެ. ވީމާ ފާޑުނުކިޔުމަށް ދަރިންނަށް ދަސްކޮށްދޭން ޖެހެއެވެ. އާދައިގެ ދަބަހާއި ފުޅި ފަދަ ތަކެތި ގެންދިޔުމަކީ މައްސަލައެއް ނޫންކަމާއި، ބެލެނިވެރިން ތަކެތި ހޯދައިދޭނީ ލިބޭމިންވަރަކުން ކަން ބުނެދޭންޖެހެއެވެ.
އޯޓިޒަމް އަށް ފަރުވާ ހޯދަމުންދާ ކުއްޖެއްގެ ބެލެނިވެރިއަކު ބުންޏެވެ. "ވަރަށް ދެރަވެއެވެ. ޕްރީ ސްކޫލުގެ ގުރެޖުއޭޝަން ހަފްލާގައިވެސް ރިހާސަލް އަށް ގޮސް އެއްވެސް ހަރަކާތެއް ނުކޮށް ދަރިފުޅު ހުއްޓި ހުރިގޮތުން ޓީޗަރ އެހާ ބައިވެރިކުރާ ހިތް ނުވާކަން އިހުސާސްވިއެވެ. އެކަމަކު އެ ދަރިފުޅު ގުރެޖުއޭޓް ވުމަކީ އަޅުގަނޑަށް އަދި ދަރިފުޅަށްވެސް ލިބޭ ބޮޑު އުފަލަކަށް ވާތީ ބައިވެރިކުރަން ނިންމީއެވެ. ގުރޭޖުއޭޝަން ހަފްލާ އޮތް ދުވަހު ދަރިފުޅު ކައިރީގަ ސަފުގަ ހުރުމުގެ ފުރުސަތު ދޭތޯ އެދުމުން އެފުރުސަތެއް ވެސް ނުލިބުނެވެ. އެއީ އެހެން ކުދިންގެ ބެލެނިވެރިން ގޮނޑީގައި އިށީދެ ތިބުމުންނެވެ. އެކަމަކު މިއީ ތަފާތު ކުއްޖެއްކަމާއި އެކުއްޖާއާއި މެދު ތަފާތުކޮށް އަމަލުކުރިއަސް އެހެން ބެލެނިވެރިން ޝަކުވާ ނުކުރާނެކަން ނުވިސްނެނީ ކީއްވެބާއެވެ." ވަރަށް ދެރަވެ ހުރެ އެ ބެލެނިވެރިއާ އެހިއްސާ ކުރި މައުލޫމާތުންވެސް އަޅުގަނޑުމެންގެ މުޖުތަމައު މިފަދަ ކުދިންނާމެދު ދެކޭގޮތް ބަދަލުކުރަންޖެހޭ ކަން އިހުސާސްވިއެވެ.
ހަގީގަތުގައި ނުކުޅެދުންތެރިކަން ހުރުމަކީ ބާކީ ކުރަންޖެހޭ ކަމެއް ނޫނެވެ. ހުރިހާ ކުދިންނަށްވެސް ދަސްކޮށްދޭންވީ އެފަދަ ކުދިންނާއެކު އުޅޭނެގޮތެވެ. އެފަދަ ކުދިންނަށް އިހުތިރާމް ކުރުމަށެވެ. އެފަދަ ކުދިން ބުލީގެ ޝިކާރައަކަށް ނުވެ ސަލާމަތްވާނީ އަޅުގަނޑުމެން އެންމެން މިކަމަށް ހޭލުންތެރިކުރުވައިގެންނެވެ. ސްކޫލުތަކުގައި ވަރަށް ރަނގަޅު ޓީޗަރުން އުޅޭ ފަދައިން ވަރަށް ރަނގަޅު ކުދިންނާއި ބެލެނިވެރިންވެސް އުޅެއެވެ. އެހެންނަމަވެސް މަދު ކުއްޖެއްގެ ފަރާތުން ދިމާވާ ނޭދެވޭ ކަންތައްތަކުގެ ސަބަބުން ޚާއްސަ އެހީތެރިކަމަށް ބޭނުންވާ ކުދިން ކިޔެވުން މަތިން ފޫހިވެ ސްކޫލަށް ދާން ބޭނުން ނުވުމަކީ ވެދާނެކަމެކެވެ. އެންމެން އެކީ ގުޅިގެން އެއްވެސް ކުއްޖަކު ބާކީނުކޮށް، ހަމަހަމަކަމާއެކު ތައުލީމު އުނގެނުމުގެ ފުރުސަތު ހޯދައިދެމާތޯއެވެ. 'ޒީޓައިމްސް' އިން އެދެނީ މި ފެށޭ ދިރާސީ އައު އަހަރަކީ ދަރިވަރުންނަށް ފާގަތި އަހަރަކަށް ވުމެވެ.
