ޓިއުޝަން ނެގުމަކީ ޒަމާނުއްސުރެ ދިވެހިންގެތެރޭގަ އޮންނަ އާދައެކެވެ. ގިނަ ބެލެނިވެރިން މަސައްކަތް ކުރަނީ ޓިއުޝަން ދީގެން ދަރިވަރުން އިތުރަށް މޮޅުކުރުމަށެވެ. އެބެލެނިވެރިން ބުނާގޮތުން ޓިއުޝަން ދޭންޖެހެނީ ސްކޫލުން ނަގައިދޭ ފިލާވަޅު ދަރިވަރަށް އިތުރަށް އުނގަންނައި ދިނުމަށެވެ.
ޓިއުޝަނަށް މަހަކު ހަތަރު ފަސްހާސް ރުފިޔާ ޚަރަދު ކުރާ ބެލެނިވެރިން ވެސް އެބަތިއްބެވެ.
ކުރިން އަޅުގަނޑުމެންގެތެރޭގަ އިންޓަނެޓް އެހާ އާންމެއް ނޫނެވެ. އެހެންނަމަވެސް ޓިއުޝަން ނެގުމެއް ނެތި ބޭނުންވާ މައުޟޫއަކަށް މައުލޫމާތު ހޯދުމުގެ މަގު އިންޓަނެޓް މެދުވެރިކޮށް މިވަނީ ފަހިވެފައެވެ. ޓިއުޝަނަށް ބޮޑު ޚަރަދެއް ކުރުމުގެ ބަދަލުގަ ސްކޫލުގަ ކިޔަވައިދޭ މުދައްރިސުންގެ އެހީ ހޯދާ ނޭނގޭ ފިލާވަޅުތައް އޮޅުންފިލުވިދާނެއެވެ. ނުވަތަ އިންޓަނެޓް މެދުވެރިކޮށް އިތުރު މައުލޫމާތު ހޯދިދާނެއެވެ.
މިނިސްޓްރީ އޮފް އެޑިޔުކޭޝަން އިން ދެކޭގޮތް
ވީޓީވީގެ 'ބޮޑު ފެންޑާ' ޕްރޮގްރާމްގަ ވާހަކަދައްކަވަމުން އެޑިޔުކޭޝަން މިނިސްޓްރީގެ ޑެޕިއުޓީ މިނިސްޓަރ އަޙުމަދު މުޖާހިދު ވިދާޅުވީ ޓިއުޝަން ނެގުމުގެ އާދައަކީ ރާއްޖޭގައި އޮތްކަމެއް ކަމަށެވެ.
" ރާއްޖޭގަ ޓިއުޝަން ނެގުމުގެ ސަގާފަތް މިއޮތީ ހަމައެކަނި ސަރުކާރު ސްކޫލުގަ ނުވަތަ އަމިއްލަ ސްކޫލުގައެއް ނޫން. ނުވަތަ އިންޓަނޭޝަނަލް ސްކޫލުގައެއް ނޫން. ވަކި ސްކޫލެއްވެގެނެއް ނޫން. އަޅުގަނޑުމެންގެ ތެރޭގަ އޮތްކަމެއް މިއީ. ހަގީގަތުގަ ހުއްޓާލަންޖެހޭކަމެއް މިއީ. ކުއްޖަކަށް އިތުރަށް އެއްޗެއް ބުނެދޭން ނުޖެހޭނެއެކޭ ނޫން މިދަންނަވަނީ. އެކި ކުދިން އެކިމާއްދާތަކަށް މޮޅުވާނީ. އެހީތެރިކަން ދޭން ނުޖެހޭ ވާހަކައެއް ނޫން". މާލޭގެ ސްކޫލެއްގައި ޕްރިންސިޕަލެއްގެ މަގާމްވެސް އަދާކުރެއްވި މުޖާހިދު ވިދާޅުވިއެވެ.
ކޮންމެ މާއްދާއަކުން ޓިއުޝަން ނަގާ އަދި ގުރޫޕުކޮށް ޓިއުޝަން ނަގާ އޭގެ އިތުރަށް ޓިއުޝަން ކުލާހަކަށް ފޮނުވުން މިއީ ބެލެނިވެރިން އެކުދިން އިތުރަށް މޮޅުވޭތޯ ކުރާ މަސައްކަތެއްގެ ގޮތުގަ ބެލެވޭކަމަށް ވަނީ ފާހަގަކުރައްވާފައެވެ.
" ހަގީގަތުގަ ކުއްޖާއަށް ވަރަށްގޯސް އާދަތަކެއް އެދަސްކޮށްދެވެނީ. ކުލާހުގަ ކިޔަވަދޭއިރު ފިލާވަޅުތައް އަޑުއަހާ ގެއަށް އައިސް މުތާލިއާކޮށް ފިލާވަޅުތައް ބަލާ، މިޒަމާނުގަ އެބަހުރި ބެލޭނެ އިތުރު ގޮތްތައްވެސް. މިނިސްޓްރީ އޮފް އެޑިޔުކޭޝަންގެ 'ފިލާ ޕޯޓަލް'ގަ އެބަހުރި ކޮވިޑްތެރޭގަ ރިކޯޑްކުރި އޮންލައިންކޮށް ކިޔަވަދިން ފިލާވަޅުތައް. އެހެން ގޮތްގޮތުންވެސް އެބަހުރި ރިފާކުރެވެން ޓެކްސްޓް ފޮތްތަކާއި ވީޑިއޯތައްވެސް. ހަގީގަތުގަ ޓިއުޝަނަކަށް ދާކަށް ނުޖެހޭ އެގޮތަށް".
ސްކޫލުތަކުން އިތުރުގަޑި ނަގައިދޭކަމަށާއި، ރަށްރަށުގެ ސްކޫލުތަކުގެވެސް ނަތީޖާ ދުވަހެއް ދުވަހަކަށް ރަނގަޅުވަމުން އަންނަ ކަމަށް ވަނީ ފާހަގަކުރައްވާފައެވެ. ވަކިވަކި މާއްދާތަކުން އެހީތެރިކަން ބޭނުންވާ ކުދިންނަށް އެއެހީތެރިކަން ޓީޗަރުން ފޯރުކޮށްދޭ ކަމަށާއި ޓިއުޝަން ނެގުމުގެ އާދަ ހުއްޓާލަން ޖެހޭ ކަމަށް ތަކުރާރުކޮށް މުޖާހިދު ވަނީ ވިދާޅުވެފައެވެ.
ރަށްރަށުގެ ސްކޫލުގަ ކިޔަވަދޭ ރާއްޖެއިން ބޭރުގެ ބައެއް ޓީޗަރުން ސްކޫލުގައި ރަނގަޅަށް ފިލާވަޅު ބުނެދިނުމުގެ ބަދަލުގަ ޓިއުޝަން ނަގައިދީ ބޮޑު އަދަދަކުން ރުފިޔާ ހޯދާކަމަށް ބައެއް ބެލެނިވެރިން ފާހަގަކުރާތީ، ޝަކުވާއެއް ލިބޭތޯ އާއި އެޓީޗަރުންގެ ފެންވަރު ބެލުމަށް ކުރެވެމުންދާ މަސައްކަތްތަކާ ގުޅޭގޮތުން ސުވާލު ދެންނެވުމުން އެޑިޔުކޭޝަން މިނިސްޓްރީގެ ޕަރމަނަންޓް ސެކްރެޓަރީ އަޙުމަދު ޢަލީ ވިދާޅުވީ ސްކޫލުތަކަށް ފޮނުވާ ޓީޗަރުންގެ ފެންވަރު ވަޒަންކުރުމުގަ ތަފާތެއް ނުގެންގުޅުއްވާ ކަމަށެވެ. ބައެއް މާއްދާތައް ކިޔަވައިދިނުމަށް ރާއްޖެއިން ބޭރުން ޓީޗަރުން ގެންނައިރު އެޓީޗަރުންގެ ވެސް ޕްރޮބޭޝަން މުއްދަތެއް އޮންނަކަމަށާއި، ފެންވަރު ބެލުމަށްފަހު ފޮނުވާލުމުގެ ބާރު މިނިސްޓްރީ އަށް އޮންނަކަމަށެވެ. އަދި ކަންބޮޑުވުމެއްގެ ގޮތުގަ ޓިއުޝަން ދިނުމުގެ ކަންތައް ހިއްސާކުރައްވާ ބެލެނިވެރިންތިބޭ ކަމަށް ވެސް ފާހަގަކުރެއްވިއެވެ.
" މިހާރު މިއޮންނަ ގޮތަށް ޓިއުޝަން ދިނުން މިއީ ހުއްޓާލަންޖެހޭ ކަމެއް. ސަރުކާރުގެ ސްކޫލުތަކުގަވެސް އަދި ޕްރައިވެޓް ސްކޫލުތަކުގަވެސް 'އިންޑިޕެންޑެންޓް ލާނިންގ' އަށް އެކުދިންނަށް ފުރުސަތު ހޯދައިދޭންޖެހޭ. އެކަމަށްޓަކައި ކުދިން ތަމްރީން ކުރަން އެބަޖެހޭ. އަޅުގަނޑުމެންގެ އާ ކަރިކިއުލަމްއާއެކު ބަދަލުވެގެން އައި އެއްކަމެއް އެއީ އެކުއްޖާ އަމިއްލައަށް ޒިންމާ ނަގައިގެން ކިޔެވުމުގެ ކަންތައް ކުރިއަށްގެންދިއުން. އަޅުގަނޑުމެން ޓީޗަރުން ވާންޖެހެނީ ގައިޑްކޮށްދޭ ބައަކަށް. ކުއްޖާ މީހަކަށް ހެދުމަށް އެހީތެރިވެދޭ ބައަކަށް. އެކަންކުރަން ޓިއުޝަން މުހިންމެއް ނޫން. ޓިއުޝަނާ ނުލާވެސް އެކަން ކުރެވޭނެ" ކުރިން ޕްރިންސިޕަލެއްގެ ގޮތުގަ ވެސް މަސައްކަތްކުރެއްވި އަޙުމަދު ޢަލީ ވިދާޅުވިއެވެ.
ޓިއުޝަން ނުނަގާ ރަނގަޅު ނަތީޖާ ހޯދާ ދަރިވަރުންވެސް އެބަތިއްބެވެ. ބޭނުންވަނީ ހިތްވަރާއެކު މަސައްކަތް ކުރުމެވެ. އަދި ސްކޫލުގަ ކިޔަވަދޭ ޓީޗަރުންގެ ފުރިހަމަ އެހީތެރިކަން ލިބުމެވެ. ފިލާވަޅު އެކި ވަރަށް ފަހުމްވާނެ ދަރިވަރުން ތިބޭނެކަން ގަބޫލުކޮށް އެފަދަ ދަރިވަރުންނަށް ޓިއުޝަނާ ނުލާ ފިލާވަޅު އުނގަންނައި ދިނުމަށް ޓީޗަރުންގެ އެހީތެރިކަމުގެ އިތުރަށް ޒަމާނީ ވަސީލަތްތައް ބޭނުންކުރެވިދާނެއެވެ. ޓިއުޝަން ނެގުމަކީ އިތުރުގޮތެއް ނެތިގެން ނޫނީ ނުކުރަންވީ ކަމެކެވެ.
ވީޑިއޯ: ބޮޑު ފެންޑާ ޕްރޮގްރާމްގައި ދެއްކެވި ވާހަކަ
ކިޔުންތެރިންގެ ހިޔާލު
Mujahid eve. Tuition nagan jeheygothah thauleemy feyran othy ministry in viyefa. Top 10 ge visnumaky mulhi gaumah fethurifa oiy bodu balimadu kameh. Huriha parents ge amaaz hury mifadhain. Ehn kamun miee moe in enme meeting akun hallu kurevidhaane kameh. Podium thakuga thihen kiaigen visnumeh badhaleh nukureveyne.
ކޮމެންޓްސް ބަންދުކުރެވިފައި