ވާދަ ކުރާ މުބާރާތަކުން އެއްވަނަ ހޯދަން ބޭނުންވާ ވާހަކަ، ހަށިގަނޑުގެ ބަރުދަން ލުއި ކުރަން ބޭނުންވާ ވާހަކަ ނުވަތަ ގައުމެއްގެ ވެރިކަންފަދަ އާދަޔާ ހިލާފު ބޮޑުކަމެއް ހާސިލު ކުރަން ބޭނުންވާ ވާހަކަ، ނުވަތަ އެފަދަ އެހެން ކަމަކުން ކުރި ހޯދަން ބޭނުންވާ ވާހަކަތައް އާންމު ކުރުމަކީ ކޮންކަހަލަ ކަމެއްބާއޭ ހިތަށް އަރާ ހެއްޔެވެ؟ ކާމިޔާބީއެއް ހާސިލުކުރަން ނިޔަތް ގަނެ އެވާހަކަ އާންމު ކުރުމަކީ އަޅުގަނޑުމެންގެ ތެރެއިންވެސް ވަރަށް ގިނައިން ފެންނަ ކަމެކެވެ. ވަކިން ހާއްސަކޮށް މީހަކު ކޮންމެވެސް ދާއިރާއަކުން ހޯދަން ބޭނުންވާ ކުރިއެރުމެއް ނުވަތަ ހާސިލު ކުރަން ބޭނުންވާ ކަމެއްގެ ވާހަކަ މިދުވަސްވަރު ސޯޝަލް މީޑިއާ ފަދަ ތަންތަނުގައި ހާމަކޮށް ތިމާއަށް ހެޔޮއެދޭ މީހުންގެ ރުހުމާއި އަދި އެއްބާރުލުން އެކަމުގައި ހޯދަން މަސައްކަތް ކުރުމަކީވެސް އާންމު ކަމެކެވެ. އެހެންނަމަވެސް، ބޮޑު ކަމެއް ހާސިލު ކުރަން އުޅޭ ވާހަކަ ދުރާލާ ހާމަކުރުމަކީ ރަނގަޅު ކަމެއް ބާވައެވެ؟ ސައެންސުގެ އަލީގައި ހާމަވާ ގޮތުގައި އެއީ އަދި އެހާ ބުއްދިވެރި ކަމެއް ނޫނެވެ.
މިމައުޟޫއަށް 1933 ވަނަ އަހަރުން ފެށިގެން ސައެންސްވެރިން ކުރަމުން އަންނަ ދިރާސާތަކުން މިއާ ގުޅޭ ތަފާތު މައުލޫމާތުތައް ހާމަވެފައި އެބަހުއްޓެވެ. މިގޮތުން، ކަމާބެހޭ ތަޖުރިބާކާރުން ހާމަ ކުރާގޮތުގައި ކަމެއް ހާސިލުކުރަން ނިޔަތްގަނެ އެވާހަކަ އެހެން މީހުންނާ ހިއްސާކުރުމުން އެމީހުންގެ ފަރާތުން ލިބޭ ހިތްވަރުދިނުމުގެ ބަސްތަކަކީ އެމީހަކަށް އެކަމެއް ހާސިލުކުރުމަށް އެޅޭ ވަރަށް ބޮޑު ހުރަހެކެވެ. މިކަން މިގޮތަށް ދިމާވާން ޖެހޭ ސަބަބަކީ ކޮބައި ހެއްޔެވެ؟
އެއީ، ކަމެއް ހާސިލު ކުރެވުމަކީ ނުވަތަ ކަމެއް ހާސިލު ކުރުމުގެ ހަގީގީ ބޭނުމަކީ ތިމާއަށް އެކަމެއް ހާސިލުވުމުން ތިމާގެ ސިކުނޑިއަށް ލިބިދޭ ފިނި ކަމެވެ. މިސާލަކަށް، މީހަކު އެނާގެ ހަށިގަނޑުގެ ބަރުދަނުން ދިހަ ކިލޯ ކުރިއަށް އޮތް ތިންމަސް ދުވަސް ތެރޭގައި ލުއި ކުރާނެކަމަށް ނިޔަތްގަނެ މަސައްކަތް ފަށައި ތިންމަސް ދުވަސް ފަހުން އެކަން ހާސިލުވުމުން އެލިބުނު ކާމިޔާބީގެ ސަބަބުން އޭނާގެ ސިކުނޑިއަށް ފިނިކަން ގެނެސްދޭނެ އެވެ.
އެހެންކަމުން، އިންސާނާއަށް ކަމެއް ހާސިލު ކުރުމަށް މަސައްކަތް ކުރުމަށް ލިބޭ އެންމެ ބޮޑު ހިތްވަރަކީ އާހިރުގައި އެކަމެއް ކާމިޔާބުވުމުން ލިބޭ ހިތްހަމަޖެހުމެވެ. އަދި އެހެންމީހުންގެ ފަރާތުން ލިބޭ ތައުރީފެވެ. އެހެންނަމަވެސް، ހާސިލު ކުރަން އުޅޭ ކަމެއްގެ ވާހަކަ އާންމު ކުރުމުން އެކަމާ ވިއްދައިގެން ހެޔޮ އެދޭ ފަރާތްތަކުން ލިބޭ ހިތްވަރު ދިނުމުގެ ބަސްތައް ސިކުނޑިއަށް މާނަ ކުރެވެނީ ކުށް ގޮތަކަށެވެ. އެހެން ގޮތަކަށް ދަންނަވަނީނަމަ އެކަމެއް ކަމިޔާބުވުމުން ސިކުނޑިއަށް ލިބެން ޖެހޭ އުފަލުގެ ބޮޑު ބައެއް އެކަމެއް ހާސިލު ކުރަން ފެށުމުގެ މާކުރިން ލިބި ނިމެއެވެ. އަދި ކަންކުރަން ނުފަށަނީސް ތިމާއަށް އެކަން ކާމިޔާބު ވީކަމުގެ ފެހި ސިގްނަލް ލިބެން ފަށައެވެ. ނަތީޖާއަކަށް ވަނީ ތިމާ އެކަން ހާސިލު ކުރަން ކުރަން ޖެހޭ މިންނެތް މަސައްކަތަށް ކެނޑިނޭޅި ބޭނުންވާނެ ހިތްވަރުގެ މިންވަރު ނިސްބަތުން ކުޑަ ވުމެވެ.
އަދި ވަރަށް އާދައިގެ ގޮތަކަށް މިކަމާ ވިސްނާލުމުންވެސް ކަމެއް ހާސިލު ކުރުމުގެ ކުރިން ގިނަ ބައެއްގެ ގާތު އެވާހަކަ ދައްކައި އެމީހުންގެ ރުހުމާއި ސަޕޯޓު އެކަމުގައި ހޯދުމުގެ މާބޮޑު މާނައެއް ނެތްކަންވެސް ހާމަވެ އެވެ. އެހެނީ، ކަމެއް ހާސިލު ކުރުމަށް އަސާސީ ގޮތެއްގައި ބޭނުންވަނީ އެކަމެއް ހާސިލު ކުރުމަށް ގަދައަޅާ ކުރެވޭ މަސައްކަތެވެ. އެކަން ކުރަން އުޅޭ ކަމުގެ ވާހަކަ އެހެން މީހުންގާތު ދެއްކުމުގައި ބޭކާރު ގޮތުގައި ވަގުތު ނަގާލުމެއްއްވެސް ނޫނެވެ.
މިމައުޟޫއާ ވިއްދައިގެން ވާހަކަ ދެކެވޭއިރު ހާމަކޮށްލަން ބޭނުންވާ އެހެން ނުކުތާއެއްވެސް އެބަ އޮތެވެ. އެއީ، ކަމެއް ހާސިލު ކުރަން ބޭނުންވާ ހަގީގީ މަގުސަދު އެކަމެއް ހާސިލުކުރުމުގައި ވަރަށް ބޮޑު ރޯލެއް ކުޅެއެވެ. މިސާލަކަށް، ދުނިޔޭގެ މިވަގުތު ތިބި މަހުޖަނުންގެ ލިސްޓުގެ މަތީ ވަނައެއްގައި ހިމެނޭ ބިލް ގޭޓްސް އާމެދު ވިސްނަމާ ހެއްޔެވެ؟ އޭނާ މުއްސަނދި ވުމުގެ ކުރިން އޭނާގެ ނިޔަތަކަށް ވެފައި އޮތީ އޭނާގެ އަމިއްލަ ވިސްނުމާއި އެއްގޮތަށް އިންސާނުން ކޮމްޕިއުޓަރުގެ ބޭނުން ހިފާގޮތަށް ބޮޑު އިންގިލާބީއެއް ގެނައުމެވެ. އަދި އޭނާގެ އަމިއްލަ ކުންފުނި މައިކްރޯސޮފްޓް އެއީ ދުނިޔޭގައި ނަން ހިނގާ ކުންފުންޏެއް ގޮތުގައި ވުމެވެ. ބިލް ގޭޓްސްއަކީ އެއް އިރެއްގައިވެސް ބައިވަރު ފައިސާ ހޯދައި މަހުޖަނަކަށްވާން ނިޔަތްގަނެ މަސައްކަތް ކުރި މީހެއް ނޫނެވެ.
ކޮންމެއަކަސް، މިދެކެވުނު ވާހާކައިގެ މާނައަކީ ބޮޑު ކަމެއް ތިމާ ހާސިލު ކުރަން ބޭނުންނަމަ އެކަމަށް ތިމާ ހިތާ ހިތުން ނިޔަތް ގަންނަން ނުޖެހޭ ވާހަކައެއް ނޫނެވެ. އެފަދަ ކަމަކަށް ބޭނުންވާ ތައްޔާރީތަކުން ދުރުހެލިވެ ހުންނަން ޖެހޭ ވާހަކައެއްވެސް ނޫނެވެ. އަދި އެފަދަ ކަމެއް ހާސިލުކުރުމަށް އެހެން މީހުންގެ ފަރާތުން ބޭނުން ވެދާނެ އެހީތެރިކަމަކަށް މަގުފަހި ކުރަން މަސައްކަތް ކުރަން ނުޖެހޭ ވާހަކައެއްވެސް ނޫނެވެ. މިއީ ކަމެއްގައި ކާމިޔާބީގެ މަރުހަލާއަށް ވާސިލު ވުމުގައި ވަރަށްވެސް ބޭނުންތެރި އަދި ވިސްނަންޖެހޭ ނުކުތާތައްކަން ކަށަވަރެވެ. ހަމައެހެންމެ، ކަންކަމުގައި ކާމިޔާބު ހޯދުމުގައި ބަސް މަދުކޮށް އަމަލު ގިނަ ކުރުމަކީވެސް ބުއްދިވެރިންގެ އާދައެކެވެ.
ނޯޓް: މިއީ ޕްރޮފެސަރ ޑރ.ހަސަން އުގެއިލް ލިޔުއްވުމަށްފަހު 'ޒީޓައިމްސް' އަށް ހަދިޔާކޮށްދެއްވި ލިޔުމެކެވެ.
