މިއަހަރުގެ ރޯދަމަސް އަންނަން ބާކީ މިއޮތީ ކުޑަދުވަސްކޮޅެކެވެ. ރޯދަމަހުގައި ކުޑަކުދިންނަށް ބޭނުންކުރެވިދާނެ މުހިންމު ފޮތްތަކެއް ލިބޭނެ އިންތިޒާމް މިވަނީ ހަމަޖެހިފައެވެ. މި 4 ފޮތް ލިޔުނު އާއިޝަތު ޝިފާ ވަނީ މި ފޮތްތަކާއި ގުޅޭގޮތުން 'ޒީޓައިމްސް' އަށް އިތުރު މައުލޫމާތު ހިއްސާކޮށްފައެވެ.
1- ރަމަޟާން މަހުގެ ތާވަލު
މި ފޮތަކީ 5 އަހަރުން މަތީގެ ކުޑަކުދިންނަށް ރަމަޟާންމަހުގެ ދުވަސްތައް އެންމެ ހެޔޮ ގޮތުގައި ބޭނުން ހިފުމަށް އެހީތެރިވުމުގެ ގޮތުން، އެކުދިންގެ ދުވަހުގެ ތާވަލް ރާވާލުމުގެ އެހީއެއްގެ ގޮތުން އެކުލަވާލާފައިވާ މަސައްކަތު ފޮތެކެވެ.
" ރޯދަމަހު ކޮންމެ ދުވަހަކު ކުރާ ކަންތައްތަކަށް އަލިއަޅުވާލާފަ ހުންނާނީ. ރޯދައަށް ހުންނަ ދުވަސްތަކުގައި ސްޓިކާ ތައްކުރެވޭނެ. މުޅި ދުވަހުގެ ތާވަލުގެ އިތުރަށް ތަފާތު ހަރަކާތް ހުންނާނެ" ޝިފާ މައުލޫމާތު ދެއްވިއެވެ.
2- ރޯދައާއި ސަވާބު
މި ފޮތަކީ 3 އަހަރުން މަތީގެ ކުޑަކުދިންނަށް ރަމަޟާންމަހުގެ މުހިންމު އަސާސްތައް އަންގައިދިނުމުގެ ގޮތުން ތައްޔާރު ކޮށްފައިވާ ފޮތެކެވެ.
" ރޯދަމަހަކީ ލިބިފައޮތް ވަރަށް ބޮޑު ނިއުމަތެއް. ރޯދަމަހުގެ މި ނިއުމަތުގައި ރޯދައިގެ ހުންނަ މުހިންމު އަސާސްތަކަށް ބަލާފަ ކުދިން ކިޔާހިތްވާނެ ގޮތަށް ފޮތް ލިޔެފައިވާނީ. ގުރުއާން، ނަމާދު، ތަރާވީހުގެ މުހިންމުކަން ބަޔާންކޮށްފައިވާނެ".
3- ރޯދަ މަހަށް 12 ދުޢާ
މި ފޮތަކީ 3 އަހަރުން މަތީގެ ކުޑަކުދިން ރަމަޟާންމަހުގައި ދުޢާ ކުރުމަށް އިތުރު އަހުމިއްޔަތުކަންދީ އެކަމަށް ޝައުގުވެރިކަން އުފެއްދުމުގެ ގޮތުން އެކުލަވާލާފައިވާ ދުޢާ ފޮތެކެވެ. ހަނދު ފެނުމުން ކިޔާ ދުޢާ، ރޯދަ ވީއްލާއިރު ކިޔާ ދުޢާ، މިގޮތަށް އާންމުކޮށް ބޭނުންކުރާނެ ދުޢާތައް ވަނީ ހިމަނާފައެވެ.
4- ލައިލަތުލްޤަދްރި: އެންމެ މާތް ރޭ
މިއީ ރަމަޟާންމަހުގައި އަންނަ އެންމެ މަތިވެރި ރޭ، ލައިލަތުލްޤަދްރި ލިބިގަތުމަށް ހެޔޮކަންތައް އިތުރުކޮށް އަޅުކަމުގައި ދެމިހުރުމުގެ މުހިންމުކަން އަންގައިދިނުމުގެ ގޮތުން ތައްޔާރުކޮށްފައިވާ ފޮތެކެވެ.
ރޯދަމަހަށް ޚާއްސަ އަގުތަކެއްގައި މި ފޮތްތައް ލިބޭނެ އިންތިޒާމް ވަނީ ހަމަޖެހިފައެވެ. މިގޮތުން ރަމަޟާންމަހުގެ ތާވަލު ފޮތް 150 ރުފިޔާ އަށް ލިބެން ހުރިއިރު ބާކީ ތިން ފޮތް، ފޮތެއް 100 ރުފިޔާ އަށް ވިއްކުމަށް ވަނީ ހަމަޖެހިފައެވެ. 4 ފޮތް އެކީގައި ގަންނަނަމަ 425 ރުފިޔާ އަށް ރޯދަމަހަށް ޚާއްސަ އަގެއްގެ ގޮތުގައި ލިބޭނެއެވެ.
ތަޢުލީމީ ދާއިރާގައި މަސައްކަތްކުރި އަދި މިދާއިރާއިން މާސްޓަރސް ފުރިހަމަކޮށްފައިވާ ޝިފާ ފާހަގަކުރިގޮތުގައި ފޮތް ލިޔުމަކީ އަބަދުވެސް ޝައުގުވެރިވާ ކަމެކެވެ.
" މިފޮތް އެކުލަވާލުމުގައި އެކި ބޭފުޅުންގެ ޚިޔާލު ހޯދުމުގެ އިތުރަށް މި ފޮތްތަކަކީ އިސްލާމިކް މިނިސްޓްރީގެ ހުއްދަ ލިބިގެން ވިއްކަމުންދާ ފޮތްތަކެއް. މިވަގުތު އޮންލައިންކޮށް ވިއްކަމުން ދަނީ އިންސްޓަގްރާމް vissaaradhuni ޕޭޖް މެދުވެރިކޮށް. ކުރިއަށް އޮތްތާގައި ބުކްޝޮޕްތަކުން ލިބެން ހުންނާނެ. ޕްރީ އޯޑަރ މިވަގުތު ނަގަނީ. އޯޑަރު ދިނުމަށް 7941989 މި ނަންބަރަށް މެސެޖު ކުރެވިދާނެ. 22 މާރިޗް ގައި ފޮތްތައް ލިބޭނެ". 3 ކުދިންގެ މަންމައެއް ކަމުގައިވާ ޝިފާގެ އުންމީދަކީ އިތުރު ފޮތްތައް ލިޔެ ބާޒާރަށް ނެރުމެވެ.
