މިއަދުގެ މަޢުޟޫއެއްގެ ގޮތުގައި ލިޔެލަން ގަސްދުކުރީ އަހަރުމެން އެންމެން ކަންކަމާއިމެދު ދެކޭގޮތް ނުވަތަ ނަޒަރިއްޔާތުތަކަކީ ދިރިއުޅުމުގެ ކަންކަމާއި ހާލަތުތަކާއި ގުޅުންތަކުގެ ބަދަހިކަން ނުވަތަ ހީނަރުކަން ދިމާވާ ކަންކަމުގެ މައްޗަށެވެ. ސްޓެރެސް، އެންޒައިޓީ އަދި ޑިޕްރެޝަންއަށް ދިއުމަށް މަގުފަހިވާ ސަބަބުތަކުގެ ތެރެއިން ދެކޭގޮތް ނުވަތަ ނަޒަރިއްޔާތު ހިމެނެއެވެ. އެހެންކަމުން މިކަމަށް ސަމާލުކަން ދިނުމަކީ މުހިއްމުކަމެއްކަން ފާހަގަ ކޮށްލަމެވެ.
ދެކޭގޮތް ނުވަތަ ނަޒަރިއްޔާތު:
އާއްމުގޮތެއްގައި އަހަރުމެންގެ ވިސްނުމާއި ޚިޔާލާއި ފިކުރުތަށް ތަރުތީބުކޮށް ރާވާލާއިރު ލިބިފައިވާ ތަޢުލީމާއި، ތަޖްރިބާއާއި އުޅޭ މާހައުލާއި ކަންކަމަށް އަހުލުވެރިވެފައިވާ މިންވަރުން ކަންކަމާއިމެދު ދެކޭގޮތް ނުވަތަ ނަޒަރިއްޔާތު ކުރާގޮތައް ބަދަލުތަކެއް އާދައެވެ. ދެކޭގޮތް ނުވަތަ ނަޒަރިއްޔާތު މިއީ އަހަރުމެންގެ ދިރިއުޅުމުގެ ކަންކަން ބައްޓަންކޮށް މުހިއްމު ނިންމުންތައް ނިންމަން ބޭނުންކުރާގޮތެކެވެ. އަދި މިކަމުގެ ނަތީޖާ ދިރިއުޅުން އާރާސްތުކޮށް ބިނާކޮށްދޭއިރު ވިއްސިވިހާލިވެގެން ދިއުމަކީވެސް އެކަށީގެންވާ ކަމެކެވެ. ކަންމިހެން އޮތްއިރު އަހަރުމެން އެންމެން މިކަމުގައި އަހުލުވެރިވާންޖެހޭ މުހިއްމު ކަންތައްތަކެއްވެއެވެ.
ދެކޭގޮތުން ނުވަތަ ނަޒަރިއްޔާތުން ވިސްނާލަންޖެހޭ ކަންކަން:
ފިކުރު ހިންގާލަންޖެހޭ މުހިއްމު އެއް އަސާސަކީ އެއްކަހަލަ ހާލަތެއް ނުވަތަ ކަމެއް ދިމާވެފައިވީނަމަވެސް ދެމީހެއްގެ ނަޒަރިއްޔާތު ނުވަތަ ދެކޭގޮތް އެއްގޮތް ނުވެދާނެކަމެވެ. އަދި އޭގެ މާނައަކީ އެކަކު ދެކޭގޮތް ގޯސްވެ އަނެކަކު ދެކޭގޮތް ރަނގަޅުވުމެއްވެސް ނޫނެވެ. އަހަރުމެން ވިސްނާލަންޖެހޭ ކަމަކީ ކޮންމެ މީހަކުވެސް ކޮންމެ ކަމެއްގައިވެސް ދެކޭގޮތް ނުވަތަ ނަޒަރިއްޔާތު ކުރާނީ އޭނައަށް ލިބިފައިވާ ތަޖްރިބާގެ އަލީގައި އޭނައަށް ޤަބޫލުކުރެވޭ އެންމެ ރަނގަޅު ގޮތައް ކަމެވެ.
ހަރުދަނާ ދިރިއުޅުމަކަށް ދެކޭގޮތް ބައްޓަންކުރާނެ ގޮތްތައް:
ދިރިއުޅުން އާރާސްތުކޮށް ހަރުދަނާ ހަމަޖެހޭ ދިރިއުޅުމެއް ހޯދަން ވިސްނާއިރު ދެކޭގޮތް ވަކިމިންގަނޑުތަކެއްގައި ބެހެއްޓުމަށް އަހުލުވެރިވާންޖެހެއެވެ. އެގޮތުން އެންމެ ފުރަތަމަ ކަމަކަށް ތިމާ ދެކޭގޮތް އަދި އެއީ އެންމެ ރަނގަޅުގޮތަށް ނުވެދާނެ ހާލަތެއް އައިސްދާނެކަން ބަލައިގަނެ ގަބޫލުކުރަން ދަސްކުރުމެވެ. ކަންކަމުގައި ތިމާއަށް ލިބިފައިވާ ހުނަރާއި ތަޖްރިބާއާއި މަޢުލޫމާތާއި މާހައުލުން ދެކޭގޮތް އުފެދުނަސް އެއްހާލަތެއް މެދުވެރިވާ ދެމީހެއް ދެކޭތޮތާއި ނަޒަރިއްޔާތު އެއްގޮތް ނުވެދާނެކަން ބަލައިގަތުމެވެ.
އަނެކާދެކޭ ގޮތައް އިޙްތިރާމްކޮށް އޭގެން ޢިބްރަތް ޙާސިލްކޮށް ތިމާގެ ދިރިއުޅުމަށް އެކަމުން ގެނެވިދާނެ ރަނގަޅު ބަދަލަކީ ނުވަތަ ދެކޭގޮތް ހަރުދަނާކުރެވޭނެ ދާއިރާއެއް އިންތޯ ބަލާ އެކަމަށް އަމަލީ ސިފައެއް ގެނައުމަށް މަސައްކަތްކުރުމެވެ. ކަންކަމުގައި ދެކޭގޮތް ހުރިހާ އެންގަލްއަކުން ވިސްނާ އެކަމަށް އޮތް އެންމެ ރަނގަޅުގޮތައް ދެކޭގޮތް ބައްޓަންކުރަން މަސައްކަތްކޮށް ޕްރެކްޓިސް ކުރުމެވެ. ދެކޭގޮތް ތަފާތުވެ ޚިޔާލުތަފާތުވުން އުފެދޭ ވަގުތުތަކުގައި ތިމާ ރިއާޔަތް ކުރާގޮތް ނުވަތަ އަމަލުކުރާގޮތް މިހާރަށްވުރެ ހަރުދަނާކުރުމެވެ. މިސާލަކަށް އެވަގުތު ރުޅި އިސްނުކޮށް ނުވަތަ ހިތްހަމަނުޖެހި ވާހަކަދައްކާ އަމިއްލަ މަސްލަހަތު އިސްކުރުމުގެ ބަދަލުގައި އަނެކާ ކިޔާއެއްޗެއް ނިމެންދެން ކަނުލައި އަޑުއަހާ ޤާބިލްމީހަކަށް ވުމެވެ. ނުވަތަ ތިމާ ބުނީ ހަމަ އެންމެ ރަނގަޅަށްކަން އަނެކާއަށް ޤަބޫލުކޮށްދީ ނުވަތަ އެކަމުގެ ދިފާޢުގައި ވަކާލާތުކުރުމުގެ ބަދަލުގައި ހަމަހިމޭންވެ ހަމަޖެހިގެން ވާހަކަދެއްކުމެވެ. މިކަހަލަ ވަގުތު އަމިއްލަ ނަފްސް ކޮންޓްރޯލް ކުރުމަށްޓަކައި ތަފާތު ކަންކަން ކުރެވިދާނެއެވެ.
ދެކޭގޮތް ތަފާތުވުމުން އަމިއްލަ ނަފްސު ކޮންޓުރޯލް ކުރުމަށް ކުރެވިދާނެ ކަންކަން:
އަހަރުމެން ދެކޭގޮތް އެހެންމީހުން ބަލައިނުގަތުން ނުވަތަ ފާޑުކިއުން މިއީ ވަރަށް ގިނައިން އަހަރުމެންނަށް އަމިއްލަ ނަފްސު ކޮންޓުރޯލްކޮށް ހަމަޖެހެން އުދަގޫ ޙާލަތެކެވެ. އެގޮތުން ފުރަތަމަކަމަކަށް ހަމަޖެހިލުމަށްޓަކައި އެކަހެރިވެލާ ހަމަހިމޭން މާހައުލަކަށް ޖެހިލާށެވެ. އެއަށްފަހު ހިގާދިޔަ ކަންކަމަށް އަލިއަޅުވާލާ އެކަމުގަ ހުރި ރަނގަޅު އަދި ޚިޔާލުތަފާތުވުން އުފެދެން ދިމާވި ކަންކަމަށް ވިސްނާ ފިކުރުކޮށްލާށެވެ. އަދި އަމިއްލަ ނަޒަރިއްޔާތުން ރަނގަޅުގޮތް އިޙްތިޔާރު ކުރާށެވެ. މިގޮތް އިޚްތިޔާރުކޮށް ނިންމުމުގައި އަމިއްލަ ކޮންޓުރޯލްގައި ހުރިކަންކަމަށް ވިސްނާށެވެ. އެއަށްފަހު ދެމެހެއްޓެނިވި ގޮތެއްގައި އެކަންކަން އެގޮތައް ކުރެވޭތޯ ބަލާށެވެ. މީގެ އިތުރުން އަމިއްލަ މީހާ ހިތްހަމަޖެހޭ ކަމެއް ކޮށްލުމުންވެސް ހިތަށް ފަސޭހަވެ ލުއިވެއެވެ. މިސާލަކަށް ހިނގާލުން، ފޮތެއް ކިއުން، ޤުރުޢާން ކިޔެވުން، ދުޢާކުރުން ފަދަ ކަންކަން ކުރެވިދާނެއެވެ.
އަދި މިނޫނަސް ދެކޭގޮތް ބަދަލުކުރުމަށް ތަފާތު ގޮތްތަކާއި އުކުޅުތައް ބޭނުންކުރެވޭނެއެވެ. މިކަންކަން ކުރުމުގައި އަނެއްކާވެސް އަޅުގަނޑު ދެކޭގޮތާއި އެހެންމީހުން ދެކޭގޮތާއި ބޭނުންވާގޮތާއި ކަންކަންވެސް ތަފާތުވާނެކަން އަލިއަޅުވާލަމުން މިލިޔުމުންވެސް ކިޔުންތެރިންނަށް ދެކޭގޮތް ރަނގަޅުކޮށް އިތުރަށް ފުރިހަމަކޮށްލުމަށް މައުލޫމާތުކޮޅެއް ލިބުނުކަމަށް އުއްމީދުކުރަމެވެ.
ހަރުދަނާ ދިރިއުޅުމަކަށް ދެކޭގޮތް ނުވަތަ ނަޒަރިއްޔާތު ބައްޓަންކުރާނެ ގޮތްތައް:
- ތިމާ ދެކޭގޮތް އަދި އެއީ އެންމެ ރަނގަޅުގޮތަށް ނުވެދާނެ ހާލަތެއް އައިސްދާނެކަން ބަލައިގަނެ ގަބޫލުކުރަން ދަސްކުރުން
- ކަންކަމުގައި ތިމާއަށް ލިބިފައިވާ ހުނަރާއި ތަޖްރިބާއާއި މަޢުލޫމާތާއި މާހައުލުން ދެކޭގޮތް އުފެދުނަސް އެއްހާލަތެއް މެދުވެރިވާ ދެމީހެއް ދެކޭގޮތާއި ނަޒަރިއްޔާތު އެއްގޮތް ނުވެދާނެކަން
- އަނެކާދެކޭ ގޮތައް އިޙްތިރާމްކޮށް އޭގެން ޢިބްރަތް ޙާސިލްކޮށް ތިމާގެ ދިރިއުޅުމަށް އެކަމުން ގެނެވިދާނެ ރަނގަޅު ބަދަލަކީ ނުވަތަ ދެކޭގޮތް ހަރުދަނާ ކުރެވޭނެ ދާއިރާއެއް އިންތޯ ބަލާ އެކަމަށް އަމަލީ ސިފައެއް ގެނައުމަށް މަސައްކަތްކުރުން
- ކަންކަމުގައި ދެކޭގޮތް ހުރިހާ އެންގަލްއަކުން ވިސްނާ އެކަމަށްއޮތް އެންމެ ރަނގަޅުގޮތައް ދެކޭގޮތް ބައްޓަންކުރަން މަސައްކަތްކޮށް ޕްރެކްޓިސް ކުރުން
- ދެކޭގޮތް ތަފާތުވެ ޚިޔާލުތަފާތުވުން އުފެދޭ ވަގުތުތަކުގައި ތިމާ ރިއާޔަތް ކުރާގޮތް ނުވަތަ އަމަލުކުރާގޮތް މިހާރަށްވުރެ ހަރުދަނާކުރުން
- މިސާލަކަށް އެވަގުތު ރުޅިއިސްނުކޮށް ނުވަތަ ހިތްހަމަނުޖެހި ވާހަކަ ދައްކާ އަމިއްލަ މަސްލަޙަތު އިސްކުރުމުގެ ބަދަލުގައި އަނެކާއަށް ކިޔާއެއްޗެއް ނިމެންދެން ކަނުލައި އަޑުއަހާ ޤާބިލު މީހަކަށް ވުން
- ތިމާ ބުނީ ހަމަ އެންމެ ރަނގަޅަށްކަން އަނެކާއަށް ޤަބޫލުކޮށްދީ ނުވަތަ އެކަމުގެ ދިފާޢުގައި ވަކާލާތުކުރުމުގެ ބަދަލުގައި ހަމަހިމޭންވެ ހަމަޖެހިގެން ވާހަކަދެއްކުން
- އަމިއްލަ ނަފްސު ކޮންޓުރޯލް ކުރަން ދަސްކުރުން
- ހަމަޖެހިލުމަށްޓަކައި އެކަހެރިވެލާ ހަމަހިމޭން މާހައުލަކަށް ޖެހިލާ ހިގާދިޔަ ކަންކަމަށް އަލިއަޅުވާލާ އެކަމުގަ ހުރި ރަނގަޅު އަދި ޚިޔާލުތަފާތުވުން އުފެދެން ދިމާވި ކަންކަމަށް ވިސްނާ ފިކުރުކޮށްލުން
- ގޮތް އިޚްތިޔާރުކޮށް ނިންމުމުގައި އަމިއްލަ ކޮންޓުރޯލުގައި ހުރިކަންކަމަށް ވިސްނާ
- މީހާ ހިތްހަމަޖެހޭކަމެއް ކޮށްލުން: މިސާލަކަށް ހިނގާލުން، ފޮތެއް ކިއުން، ޤުރުޢާން ކިޔެވުން، ދުޢާކުރުން ފަދަކަންކަން ކުރެވިދާނެ
އެޑިޓަރުގެ ނޯޓް: މިއީ ސޯޝަލް އިމޯޝަނަލް އިންޓެލިޖެންސް ކޯޗެއް އަދި ގައިޑަންސް އެންޑް ކައުންސެލަރ އެއްގެ ގޮތުގައި މަސައްކަތްކުރައްވާ ސަމާ އިބްރާހީމް ދީދީ "ޒީޓައިމްސް" އަށް ހަދިޔާ ކޮށްފައިވާ ލިޔުމެކެވެ. މި ލިޔުމުގެ ބޭނުމަކީ ކިޔުންތެރިންނަށް ދިރިއުޅުމުގެ ހުނަރުތަކާއި ހަރުދަނާ ބަދަހި ގުޅުންތަކެއް ދެމެހެއްޓުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރުމެވެ.
