އުފާވެރި ހަމަޖެހޭ ބިނާކުރަނިވި ދިރިއުޅުމުގެ އެއް އަސާސަކީ އިހްސާސްތައް ނުވަތަ އިމޯޝަން ބެލެންސް ކުރަން އެނގުމެވެ. ދިރިއުޅުމުގެ މަރުޙަލާތަކުގައި ދިމާވާ ގޮންޖެހުންތަކާއި އުފެދޭ ހިތްނުތަނަވަސްކަމާއި، ނައްސި ހިޔާލުތަކާއި ފިކުރުތަށް ބިނާވަނީ ވިސްނާ ފިކުރުތަކާއި އިހްސާސްތަކާއި ގުޅިފައެވެ. މިފަދަ ކަންކަމުގައި އިހްސާސްތަކަށް ބާރު ނުފޯރުވި ކޮންޓްރޯލްކޮށް ބެލެންސް ނުވާނަމަ ސްޓްރެސް، ޑިޕްރެޝަން އަދި އެންޒައިޓީފަދަ ނަފްސާނީ ގޮތުން މީހާ ބަލިކަށިވާ ކަންކަމަށް ދިއުމަކީ އެކަށީގެންވާ ކަމެކެވެ. އެހެންކަމުން މި ލިޔުމުގައި އިމޯޝަންސް ނުވަތަ އިހްސާސްތައް ހަމަޔަކަށް އަޅުވާ ބެލެންސް ކުރެވިދާނެ އުކުޅުތަކެއް ލިޔެލަމެވެ.
- އަމިއްލަ ނަފްސާމެދު ކުރެވޭ އުއްމީދުތައް
އަމިއްލަ ނަފްސާމެދު ވިސްނުމާއި ފިކުރިއްޔާތުން ކުރަހާލެވިފައިވާ ތަސްވީރާއި އަސްލު ހަގީގަތުގައި ކަންހިނގާގޮތާއި ފުށުއަރާގޮތްވުމުން ކުރެވޭ އިހްސާސްތައް ކޮންޓްރޯލް ނުކުރެވި ފުށުއަރާގޮތްވުމުން މީހާގެ ނަފްސާނީ ދުޅަހެޔޮކަމަށް އަސަރުކުރެއެވެ. މިސާލަކަށް ކަމެއް ކުރުމަށްޓަކައި އަމިއްލައަށް ޚިޔާލުކޮށް ވިސްނާފައިވަނީ އެއްގަޑިއިރުން ކަމަށް ވިއަސް އަސްލު ހަގީގަތުގައި އެކަމެއް ނިމުނީ ހަތްގަޑިއިރުން ކަމުގައި ވާނަމަ އަމިއްލަ ނަފްސާމެދު ނައްސި ޚިޔާލުތަކާއި ފިކުރުތައް ވަށާލާ އެކަމާ ވިސްނާ ފިކުރުކޮށް މީހާ މާޔޫސްވާ ހިސާބަށް ދެއެވެ.
މިކަން ހައްލު ކުރުމަށްޓަކައި ޚިޔާލާއި ފިކުރުތައް ބައްޓަން ވަކިގޮތަކަށް ކުރެވުނުކަމުގައިވިއަސް އަބަދުވެސް ވިސްނަންވީ ބޭނުންވާ ހުރިހާކަމެއް ބޭނުންވާހާ ގޮތަކަށް ނުކުރެވިދާނެ ކަމާއި ނުވެދާނެ ކަމެވެ. އެހެންކަމުން އަބަދުވެސް ކަމެއް ކުރަން ޕްލޭން ކުރާއިރު އެންމެގޮތެއް ވިސްނުމުގެ ބަދަލުގައި ތަފާތު އެކިގޮތްގޮތަށް ވެސް ކުރެވިދާނެ ޕްލޭންތަކެއް ހެދުމެވެ. އަދި ހަމަމިއާއެކު ބޭނުންވާ ލަނޑުދަނޑިތައް ހާސިލްކުރެވިދާނެތޯ އެކަށީގެންވާ ވަގުތާއި މިންވަރަށް ބަލާ އެއަމާޒަކަށް ވާސިލްވުމަށް މަސައްކަތް ކުރުމެވެ.
- އެންމެންނަށްވެސް ތިމާ ބަލައިގަނެ ޤަބޫލުކުރަންޖެހޭނެކަމަށް އިހްސާސްވުން
ތިމާއަކީ އެންމެންވެސް ބަލައިގަންނަ މަޤްބޫލް މީހަކަށްވުމަށްޓަކައި އެންމެން ރުއްސާ ހިތްހަމަޖައްސަދޭން މަސައްކަތް ކުރުމުން އިހްސާސްތައް ކޮންޓްރޯލްކޮށް ބެލެންސް ނުކުރެވެއެވެ. ޤަބޫލުކުރަންޖެހޭ އަދި ބަލައިގަންނަންޖެހޭ ހަޤީޤަތަކީ އެންމެން ތިމާ ބަލައިގަނެ އެންމެންނަށް މަޤްބޫލް ނުވެދާނެކަމެވެ. އެހެންކަމުން މީހުން ތިމާ ބަލައިނުގަނެ ޤަބޫލުނުކުރިއަސް ތިމާ އަމިއްލަ ނަފްސަށް އެންމެ ރަނގަޅުގޮތަށް ވިސްނާ ވީވަރަކުން އަމިއްލަ ނަފްސުގެ ކަންކަން ހަމަޔަކަށް އަޅުވާ ރަނގަޅު ކުރަން މަސައްކަތް ކުރުން އެންމެން ރުއްސުމުގެ ވިސްނުން މަޑުމަޑުން ގޮސް މީހާ ހަމަޔަކަށް އެޅި އިހްސާސް ބެލެންސް ކުރެވޭނެއެވެ.
- އެހެންމީހުންގެ ކާމިޔާބީއާއި ކަންކަމަށް ހަސަދަވެރިވެ ހިތްހަމަނުޖެހުން
ދިރިއުޅުމުގެ ދަތުރުގައި އެކި މީހުންނަށް ލިބޭނީ އެކިކުރިއެރުމާއި ކާމިޔާބުކަން އުފަލާއެކު ބަލައިގަނެ އެންމެންނަށްވެސް ހެޔޮދުޢާކޮށްދީ ހިތްވަރުދޭމީހަކަށް ވުމުން ތިމާއަށް ކުރިއެރުމާއި ހިތްހަމަޖެހުން ލިބޭނެއެވެ. އަބަދުވެސް ވިސްނަންވީ މާތްﷲ އެއްވެސް އިންސާނަކަށް ނުއުފުލޭވަރުގެ ބުރައެއް ނުޖައްސަވާނެކަމެވެ. އަދި ކޮންމެ ކަމެއްގައިވެސް ދިމާވާ އުފަލާއި ހިތްދަތި ކަމަކީ އަހަރުމެންގެ އަމަލުތަކާއި ކަންކަން ކިތަންމެ ރަނގަޅަށް ބެހެއްޓިނަމަވެސް އެކަމެއް ނުވަތަ އެހާލަތެއް މެދުވެރިވާން ދިމާވި އެންމެ ރަނގަޅުގޮތްކަން ބަލައިނެ ގަބޫލުކުރުމެވެ. ވީމާ، އެހެންމީހުނަށް ލިބޭ ކުރިއެރުމަށް ފާޑުކިއުމުގެ ބަދަލުގައި އަމިއްލަ ނަފްސުން ބޭނުންވާ ކަންކަމަށް ގަދައަޅާ ހިތްވަރާއި ކެތްތެރިކަމާއެކު މަސައްކަތްކޮށް ހެޔޮދުޢާކުރާށެވެ.
- ހިތާމައާއި ހިތްދަތިކަމުގެ އިހްސާސްތައް ބަލައިގަންނަން ދަތިވުން
ކޮންމެ ހާލަތެއްގައިވެސް ދިމާވާ އިހްސާސްތައް ބަލައިގަނެ އިހްސާސްތަކާއި ކުރިމަތިލައިގެން ކުރިއަށްދިއުމެވެ. މިސާލަކަށް ހިތާމަވެރި ހިތްދަތި ނުވަތަ ރުޅިއަންނަ ކަމެއް ދިމާވުމުން އެކަމާ ކުރިމަތިލުމުގެ ބަދަލުގައި އެކަންފޮރުވައި ފަސްޖެހި ސިކުނޑިތެރެއަށް މައްސަލަ ލައިގެން އުޅުމުން ނަފްސާނީ ބަލިމަޑުކަމަކަށް ދިއުން އެކަށީގެންވެއެވެ. އޭގެ ބަދަލުގައި ހައްލު ހޯދަން ވިސްނާ އެކަން އެހާލަތުގައި މެދުވެރިވިގޮތް ޤަބޫލުކޮށް ބަލައިގަނެ ކުރިއަށްއޮތްތަނުގައި އިހްސާސްތައް މެނޭޖްކޮށް ބެލެންސްކުރަން ދަސްކުރާށެވެ.
- ފާޑުކިއުންތައް ޤަބޫލު ނުކުރެވުން
އަމިއްލަ ނަފްސާގުޅޭގޮތުން މީހުން ކިޔާފާޑުކިއުންތަކާއި އަމާޒުވާ ނައްސި ބަސްތައް ބަލައި ނުގަނެ ޤަބޫލުކުރަން އުދަގޫވެ އެކަމާ ވިސްނަން ހަދައިގެން މީހާގެ އިހްސާސްތައް ކޮންޓްރޯލް ނުކުރެވޭ ފަދަ ހާލަތްތައް މެދުވެރިވެއެވެ. މިކަމުން އަރައިގަތުމަށްޓަކައި ކޮންމެ ކަހަލަ ފާޑުކިއުމެއް ލިބުނު ކަމުގައިވިއަސް އޭގެން ލިބޭ އިބްރަތާއި ފިލާވަޅުތަކަށް ބަލައި ތިމާ އަމިއްލަ ނަފްސުން ރަނގަޅު ކުރެވިދާނެކަމަށް ފެންނަކަންކަމަށް ސަމާލުކަންދީ އެކަމާ މަޝްޢޫލުވެގެން އުޅުމުން އިހްސާސްތައް ބެލެންސް ކުރަން ފަސޭހަވެއެވެ.
ދިރިއުޅުމުގެ ދަތުރުގައި އިހްސާސްތައް ބެލެންސްވުމުން:
ދިރިއުޅުމުގެ ދަތުރުނާމާގައި ތަފާތު އެތައްކަމަކާ ކުރިމަތިލާއިރު ބޭނުންނުވާ އެތައްކަމަކާއި ތަފާތު އިހްސާސްތަކާއި ގޮންޖެހުންތަކާއި ކުރިމަތިލާން ޖެހޭކަން އަބަދުވެސް ހަދާންބަހައްޓާ ހަމައެކަނި ކޮންޓްރޯލް ކުރެވޭނީ އަމިއްލަ ނަފްސުކަން، ދަނެގަނެ ކޮންޓްރޯލުން ބޭރުގައިވާ ކަންކަމަށް ބަލައިގަނެ ކޮންމެ ކަމެއްގައިވެސް ހައްލު ހޯދަން މަސައްކަތްކުރުން އިހްސާސްތައް މެނޭޖްކޮށް ކޮންޓްރޯލް ވާނެއެވެ. އަދި އެކަމުގެ ސަބަބުން އުފާވެރި ނަފްސާނީ ދުޅަހެޔޮ ހަމަޖެހޭ ދިރިއުޅުމެއް ބައްޓަން ވެގެންދާނެއެވެ.
އެޑިޓަރުގެ ނޯޓް: މިއީ ސޯޝަލް އިމޯޝަނަލް އިންޓެލިޖެންސް ކޯޗެއް އަދި ގައިޑަންސް އެންޑް ކައުންސެލަރ އެއްގެ ގޮތުގައި މަސައްކަތްކުރައްވާ ސަމާ އިބްރާހީމް ދީދީ "ޒީޓައިމްސް" އަށް ހަދިޔާ ކޮށްފައިވާ ލިޔުމެކެވެ. މި ލިޔުމުގެ ބޭނުމަކީ ކިޔުންތެރިންނަށް ދިރިއުޅުމުގެ ހުނަރުތަކާއި ހަރުދަނާ ބަދަހި ގުޅުންތަކެއް ދެމެހެއްޓުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރުމެވެ.
