އިންސާނަކަށް ލިބޭނެ އެންމެ ބޮޑު ނިޢުމަތަކީ ހިތުގެ ހަމަޖެހުމާއި ނަފްސާނީ ދުޅަހެޔޮކަމެވެ. އުފާވެރި ދިރިއުޅުމެއް ބިނާކުރުމަށްޓަކައި އެންމެ ފުރަތަމަ ކުރަންޖެހޭ ކަމަކީ ހިތް ސާފުކުރުމެވެ. މި މަގަށް ހުރަސްއަޅާ އެންމެ ނުރައްކާތެރި ދެ ސިފައަކީ ހަސަދަވެރިކަމާއި ނަފްރަތެވެ.
ހަސަދައާއި ނަފްރަތަކީ ކޮބާ؟
ހަސަދައަކީ މީހަކަށް ލިބިފައިވާ ނިޢުމަތެއް ނެތިދިއުމަށް އެދުމެވެ. ނުވަތަ އެނިޢުމަތެއް އެމީހަކަށް ލިބުމުން އެކަމާ ހިތްހަމަނުޖެހި، އެކަމުގެ ހިތްދަތިކަން އަމިއްލަ ނަފްސަށް އިހުސާސްވުމެވެ. ނަފްރަތަކީ މީހަކާ މެދު ހިތުގައި އުފެދޭ ވަރުގަދަ ނުރުހުމާއި، އެމީހަކަށް ދެރައެއް ނުވަތަ ގެއްލުމެއް ލިބުމަށް އެދޭ އިހުސާސެވެ. މިއީ ހިތުގެ ބަލިތަކުގެ ތެރެއިން ހިމެނޭ، އިންސާނާގެ އަޚުލާގާއި ދީންވެރިކަން ފުނޑުފުނޑުކޮށްލާ ދެ ސިފައެވެ.
ދުރުހެލިވުމުގެ މުހިއްމުކަން
ހަސަދައާއި ނަފްރަތުން ދުރުހެލިވުމަކީ ދީނީ ގޮތުންނާއި ދުނިޔަވީ ގޮތުންވެސް ނުހަނު މުހިއްމު ކަމެކެވެ. ކީރިތި ރަސޫލާ ﷺ ހަދީޘް ކުރައްވާފައިވާ ބަހެއްގެ މާނައިގައިވެއެވެ. "އަލިފާންގަނޑު ދަރުތައް ކައި ހުސްކުރާ ފަދައިން ހަސަދަވެރިކަން މީހާގެ ހެޔޮ އަމަލުތައް ކައި ހުސްކޮށްލައެވެ." މީގެ އިތުރުން، މިފަދަ ނުބައި ސިފަތަކުގެ ސަބަބުން އާއިލީ ގުޅުންތައް ކެނޑި، މުޖުތަމައުގެ ބަދަހިކަން ގެއްލިގެންދެއެވެ.
ދުރުހެލިވުމުން ލިބޭ ފައިދާ
- ހިތުގެ ހަމަޖެހުން: ހަސަދައާއި ނަފްރަތުން ހިތް ސާފުވުމުން، ނަފްސާނީ ބުރަކަމުން މީހާ މިންޖުވެ، ދިރިއުޅުމުގެ އުފާވެރިކަން އިހުސާސް ކުރެވެން ފަށާނެއެވެ.
- ދުޅަހެޔޮ ސިއްހަތު: ނަފްރަތާއި ހަސަދައަކީ ސްޓްރެސް އިތުރުކޮށްދޭ ކަމަކަށްވާތީ، މިއިން ދުރުވުމުން ލޭގެ ޕްރެޝަރާއި ހިތުގެ ބަލިތަކުން ރައްކާތެރިވުމަށް އެހީތެރިވެދެއެވެ.
- ގުޅުންތައް ބަދަހިވުން: މީހުންނާމެދު އޮންނަ ހިތްނުބައިކަން ދޫކޮށްލުމުން، އެކުވެރިކަމާއި ލޯބި އިތުރުވެއެވެ.
- ދީނީ ގޮތުން ކުރިއެރުން: ހިތް ސާފު މީހަކީ ﷲ ގެ ހަޟުރަތުގައި ގަދަރު އުފުލިގެންވާ މީހެކެވެ.
ދުރުހެލިވާން ކުރެވިދާނެ 05 ކަމެއް
- ޝުކުރުވެރިވުން: ތިމާއަށް ލިބިފައިވާ ނިޢުމަތްތަކަށް ބަލައި، އެކަންކަމަށް ﷲ އަށް ޝުކުރުވެރިވުން ގިނަކުރުން.
- ހެޔޮ ދުޢާކުރުން: ހަސަދަވެރިވެވޭ މީހާއަށް ހެޔޮ ރަހުމަތާއި ބަރަކާތް އެދި ދުޢާކުރުން. މިއީ ހިތުގެ ނުބައިކަން ފިލުވައިދޭނެ ކަމެކެވެ.
- ތިމާގެ ނަފްސު އިސްލާހުކުރުން: އެހެން މީހުންނަށް ލިބޭ ކުރިއެރުމާ މެދު ވިސްނުމުގެ ބަދަލުގައި، އަމިއްލަ ނަފްސު ކުރިއަރުވަން މަސައްކަތްކުރުން.
- މާފުކުރުން: މީހުންގެ ކިބައިން ފެންނަ އުނިކަންކަމާއި ކުރެވޭ ކުށްތަކަށް މާފުކުރުމުގެ އާދަ އަށަގެންނެވުން.
- މަރު ހަނދާންކުރުން: ދުނިޔޭގެ ދިރިއުޅުމަކީ ވަގުތީ އެއްޗެއްކަން ދަނެ، ބޭކާރު ހަސަދައިގައި ވަގުތު ނަގާނުލުން.
ޕްރެކްޓިކަލް ސްޓްރެޓެޖީސް - ޢަމަލީ ގޮތުން ކުރެވިދާނެ ކަންތައްތައް
- ސޯޝަލް މީޑިއާ ބޭނުންކުރުމުގައި ސަމާލުވުން: އެހެން މީހުންގެ ދިރިއުޅުމުގެ އުފާވެރި މަންޒަރުތައް ފެނުމުން ހަސަދަވެރިވެވޭނަމަ، ސޯޝަލް މީޑިއާއާ ދުރުހެލިވުން ނުވަތަ ބޭނުންކުރާ ވަގުތު މަދުކުރުން.
- މީހުންނާ މެދު ހެޔޮކޮށް ހީކުރުން (ހުސްނުއްޒަން): މީހަކު ކުރާ ކަމަކުން ނުވަތަ ބުނާ ބަހަކުން ނުރަނގަޅު މާނައެއް ނެގުމުގެ ބަދަލުގައި، އެކަމުގައި ރަނގަޅު މާނައެއް އޮވެދާނެ ކަމަށް ގަބޫލުކުރުން.
- ހަދިޔާ ދިނުން: ކީރިތި ރަސޫލާ ﷺ އިރުޝާދު ދެއްވާފައިވަނީ އެކަކު އަނެކަކަށް ހަދިޔާ ދިނުމަށެވެ. އެއީ ހިތްތަކުގައިވާ ނަފްރަތު ފިލުވައިދޭނެ ކަމެކެވެ.
އުފާވެރި ދިރިއުޅުމެއްގެ ތަޅުދަނޑިއަކީ ސާފު ހިތެކެވެ. ހަސަދައާއި ނަފްރަތުގެ ކަސްތޮޅުތަކުން ނަފްސު މިނިވަންކޮށް، އެންމެނަށް ހެޔޮއެދޭ މީހަކަށް ވުމީ ދުނިޔެއާއި އާޚިރަތުގެ ކާމިޔާބީ ލިބޭނެ މަގެކެވެ.
އެޑިޓަރުގެ ނޯޓް: މިއީ ސޯޝަލް އިމޯޝަނަލް އިންޓެލިޖެންސް ކޯޗެއް އަދި ގައިޑަންސް އެންޑް ކައުންސެލަރ އެއްގެ ގޮތުގައި މަސައްކަތްކުރައްވާ ސަމާ އިބްރާހީމް ދީދީ "ޒީޓައިމްސް" އަށް ހަދިޔާ ކޮށްފައިވާ ލިޔުމެކެވެ. މި ލިޔުމުގެ ބޭނުމަކީ ކިޔުންތެރިންނަށް ދިރިއުޅުމުގެ ހުނަރުތަކާއި ހަރުދަނާ ބަދަހި ގުޅުންތަކެއް ދެމެހެއްޓުމަށް ކުރެވިދާނެ ކަންތައްތަކުގެ މަޢުލޫމާތު ހިއްސާކުރުމެވެ.
