ދުނިޔޭގައިވާ އެންމެހާ މަހުލޫގުންގެ ތެރެއިން އެންމެ އާދަޔާ ޙިލާފް ސިކުނޑިއެއް ދެއްވާފައިވަނީ އިންސާނުންނަށެވެ. އިންސާނާގެ ހަށިގަނޑުގެ ހަކަތައިގެ ވިހި އިންސައްތަ ސިކުނޑި ބޭނުންކުރި ނަމަވެސް ސިކުނޑި ހިއްސާކުރަނީ ހަށިގަނޑުގެ ބަރުދަނުގެ އެންމެ ދެއިންސައްތައެވެ. ސިކުނޑީގައި ދައުރުވަމުންދާ ލޭގެ ސަބަބުން ސިކުނޑި އޮންނަނީ މަޑު ފިޔާތޮށި ކުލައެއްގައެވެ. 

އެހެނިހެން ޖަނަވާރުންނާއި އަޅާބަލާއިރު، އިންސާނުންގެ ސިކުނޑި އުފެދިފައިވާ ގޮތް ފުރިހަމައެވެ. ސަބަބަކީ ޖަނަވާރުންނާއި ޚިލާފަށް އިންސާނުންގެ ސިކުނޑިން މުހިންމު ބޮޑެތި މަސައްކަތްތައް ކުރަންޖެހުމެވެ. މީގެ ތެރޭގައި، ހެވާއި ނުބައި ދަނެގަތުމާއި، ކަންތައްތައް ޕްލޭންކުރުމާއި، އަނެކުންގެ އިހްސާސްތައް ދަނެގަތުމާއި، ކަންތައްތައް ނިންމުން ފަދަ ބޮޑެތި މަސައްކަތްތައް ހިމެނެއެވެ.

ސިކުނޑީގެ މަސައްކަތްތައް ކޮމްޕިއުޓަރެއްގެ މަސައްކަތާއި ވަރަށްވެސް ވައްތަރެވެ. އެހެންނަމަވެސް، ކޮމްޕިއުޓަރގެ މަސައްކަތަށްވުރެ، ސިކުނޑީގެ  މަސައްކަތް މާފުރިހަމަވެފައި ބާރުގަދައެވެ. ގިނަބަޔަކު "ވިސްނުން"  މާނަކުރަނީ، ސިކުނޑީގެ ސިގްނަލްތަކުގެ ތެރެއިން އެސިގްނަލެއް ފޮނުވާކަން އަހަރެމެންނަށް އެނގިގެން ނުވަތަ އަހަރެމެންނަށް ކޮންޓްރޯލް ކުރެވޭ ސިކުނޑީގެ ސިގްނަލްތަކަށެވެ. އެހެންނަމަވެސް ކޮންޓްރޯލުން ބޭރުގައިވާ ބައެއް ސިގްނަލްތައްވެސް ސިކުނޑިން ފޮނުވައިދެއެވެ. މިސާލަކަށް ހިތުގެ ހިނގުމާއި، ހަށިގަނޑުގެ ބައެއް މަސްތައް ކޮންޓްރޯލް ކުރުމަށްޓަކައި ފޮނުވައިދޭ ސިގްނަލްތަކެވެ.

Advertisement

ކަމެއްގެ ހައްލެއް ހޯދުމަށް ނުވަތަ، ޖަވާބެއް ހޯދުމަށް ސިކުނޑި މަސައްކަތް ކުރާގޮތަށް ބަލާލާއިރު، މިކަމުގައި، ސިކުނޑި ދެގޮތަކަށް މަސައްކަތް ކުރެއެވެ. އެއީ ވިސްނުމެއް ނުވަތަ ހިސާބު ކުރުމެއްގެ ގޮތުގައެވެ. މިގޮތުން އެންމެ ފުރަތަމަ ސިކުނޑީގައި އެކަމަކާގުޅޭގޮތުން ރައްކާކުރެވިފައިވާ މައުލޫމާތުތަށް ސިކުނޑި ނަގައިގަނެވެ. އެއަށްފަހު އެމައުލޫމާތުތަށް ފުރޭނުމަށްފަހު، އާމައުލޫމާތުތަކާއި، ކުރީގެ މައުލޫމާތުތަށް އަޅާ ކިޔާލުމަށްފަހު، އެމައްސަލައަކަށް އެންމެ އެކަށީގެންވާ ހައްލުތައް ސިކުނޑި ހޯދައެވެ. ހައްލުތައް ހޯދުމުގައި ސިކުނޑި ބައެއް ފަހަރު ހީވާ ހީވުންތަކަށްވެސް ބުރަވެއެއެވެ. ސިކުނޑިއަކީ މައުލޫމާތުތައް ރައްކާކުރުމަށްވެސް ވަރަށް ކުޅަދާނަ ގުނަވަނެކެވެ. އެކި ކަހަލަ މައުލޫމާތުތައް ސިކުނޑި ރައްކާކުރަނީ އެކިގޮތްގޮތަށެވެ. މިގޮތުން އިންސާނާގެ ހުނަރުތަކަށް ބޭނުންވާ މައުލޫމާތުތައް ވަކި ހިސާބެއްގައި ރައްކާކުރާއިރު، އެހެނިހެން މައުލޫމާތުތައް ސިކުނޑީގައި ރައްކާކުރަނީ އެކަމަށް ޚާއްސަ ކުރެވިފައިވާ ހިސާބުތަކުގައެވެ.

ދިރާސާ ކުރާ ފަރާތްތަކުން ގަބޫލު ކުރާގޮތުގައި، އަހަރެމެން ބޭނުންކުރަނީ ސިކުނޑީގެ އެއް އިންސައްތައާއި ދިހަ އިންސައްތައިގެ ދެމެދުގެ މިންވަރެކެވެ. އެހެންނަމަވެސް، ސިކުނޑީގެ ކޮންމެ ބަޔަކީވެސް ވަކި ކަމަކަށް ޚާއްސަކުރެވިފައިވަ ބައެއް ކަމުން އަހަރެމެންނަށް ސިކުނޑީގެ އެކިއެކި ބައިތައް ތަފާތު އެކި ކަންކަން ފަހިކުރުމަށް ބޭނުންކުރެވެއެވެ. މީހެއްގެ ސިކުނޑީގެ ހަރަކާތްތައް އެއްވަގުތެއްގައި އާދަޔާ ޚިލާފަށް ގިނަވުމުން އެމީހަކީ މާވިސްނުންތޫނު މީހެއް ކަމަށް ގަބޫލުކުރާ މީހުންވެސް މަދެއް ނޫނެވެ. އެހެންނަމަވެސް، އެއްފަހަރާ ގިނަމަސައްކަތްތައް ކުރުމަކީ ސިކުނޑިއަށް އެންމެ ފައިދާ ހުރިގޮތެއް ނޫނެވެ. މިކަމުގެ ސަބަބުން ސިކުނޑީގެ ނާރުތަކުގެ މައްސަލަތައް ދިމާވުމުގެ ފުރުސަތު ބޮޑުވެއެވެ. އާދައިގެ ހިޔާލްތައް ގެންގުޅޭ މީހުންނާއި އަޅާބަލާއިރު، އުފެއްދުންތެރި ހިޔާލުތައް ގެންގުޅޭ މީހުންގެ ސިކުނޑީގެ "ވޭވްސް" ތައް މަޑުމައިތިރިވެފައި ސިކުނޑީގައި މަސައްކަތްތައް މަދުކަން ފާހަގަ ކޮށްލެވެއެވެ.

ސިކުނޑީގައި ހިނގާ އާދަޔާ ޙިލާފް އަނެއް ކަމަކީ އަހަރެމެންނަށް ފެންނަ ހުވަފެންތަކެވެ. ހައިރާން ވާޖެހޭ ކަމަކީ އިންސާނާ ނިދާފަ އޮންނަ ގަޑީގައި ހަށިގަނޑުގެ ހަރަކާތްތައް ހުއްޓިފައިވިނަމަވެސް ސިކުނޑީގެ މަސައްކަތްތަކަށް އެއްވެސް ތަފާތެއް ނައަންނަކަމެވެ. މިގޮތުން ހުވަފެންތައް ފެންނަ ގަޑީގައި ސިކުނޑީގެ ހިއްސުތައް ކޮންޓްރޯލްކުރާ ބައި ވަރަށް ބޮޑަށް މަސައްކަތް ކުރެއެވެ. ދިރާސާކުރާފަރާތްތަކުން ގަބޫލު ކުރާގޮތުގައި، ހުވަފެން ފެންނަ ވަގުތަކީ ސިކުނޑިއަށް ދުވާލު ޖަމާވެފައި ހުންނަ މައުލޫމާތުތައް "އޮފްލައިން" މޯޑްގައި "ފައިލް ކޮށް" އެމައުލޫމާތުތައް ތަރުތީބު ކުރާ މުހިންމު ވަގުތުކޮޅެކެވެ.

އިންސާނާގެ ސިކުނޑިއާއި ބެހޭ ކަންތައްތަކުގެ ތެރެއިން އެންމެ ނޭނގުމެއްގައިވާ އަދި އެންމެ ހައިރާން ކުރުވާ އެއްކަމަކީ، "ކޮންޝަސްނެސް" އެވެ. ނުވަތަ އަހަރެމެންގެ އަމިއްލަވަންތަކަމާއި، އަހަރެމެންގެ އަމިއްލަނަފްސަށް ހޭލުންތެރިވުމާއި، އަމިއްލަ ނަފްސު އެނގިގަތުމުގެ ބާރެވެ. މިސިފައަކީ ސައިންސްވެރިންގެ އިތުރުން ފިލޯސަފަރުންވެސް އެންމެ ހައިރާން ކުރުވާ އެއްސިފައެއެވެ. ސިކުނޑީގެ ދިރާސާކުރާ ފަރާތްތަކުން ދާދިފަހުން ވަނީ "ކޮންޝަސްނެސް" އާއި ގުޅިފައިވާ ސިކުނޑީގެ ހިސާބު ހޯދާފައެވެ. އެހެންނަމަވެސް، އަހަރެމެންގެ ކޮންޓްރޯލްގައިވާ އަދި އަހަރެމެންގެ ކޮންޓްރޯލުން ބޭރުގައިވާ ސިކުނޑީގެ މަސައްކަތްތައް ސައިންސްވެރިންނަށް ހޯދުނު ކަމުގައި ވީނަމަވެސް،  އަމިއްލަވަންތަކަމާއި، އަހަރެމެންގެ އަމިއްލަނަފްސަށް ހޭލުންތެރިވުމާއި، އަމިއްލަ ނަފްސް އެނގިގަތުމުގެ ބާރު ސިކުޑިއަށް ލިބެނީ ކިހިނެއް ކަމާމެދު ކުރެވޭ ސުވާލުތަކަށް ވަނީ ޖަވާބު ނުލިބިފައެވެ.

މިހާހިސާބުން އުފެދިދާނެ ސުވާލަކީ އަހަރެމެންނަށް މަސްނޫއީ ސިކުނޑިއެއް އުފެއްދިދާނެ ބާއެވެ؟ ނުވަތަ އިންސާނުންގެ ސިކުޑިއާއި އެއްފެންވަރަށް މަސަކަތް ކުރެވޭ ފެންވަރުގެ ކޮމްޕިއުޓަރެއް އަހަރެމެންނަށް ތައްޔާރު ކުރެވިދާނެ ބާއެވެ؟ މިކަމާ ގުޅޭ ތަފާތު ދިރާސާތައް މިހާރުވެސް ސައިންސްވެރިން ދަނީ ކުރަމުންނެވެ. މިގޮތުން، ދިރިހުރި ސެލްތަކެއް ބޭނުން ކޮށްގެން ކަރަންޓްގެ އެހީގައި، ދަސްކުރުމުގެ ގާބިލްކަން އެއަށް ހޯދައި ދެވޭތޯ ސައިންސްވެރިން މަސައްކަތް އެބަ ކުރެއެވެ. އެހެންނަމަވެސް، މަސްނޫއީ ސިކުނޑިއެއް އުފެއްދިދާނެތޯ ކުރެވޭ ސުވާލާމެދު ބުނެވޭނީ، އިންސާނާގެ ސިކުނޑިއާއި ގާތްކުރާ ވަރުގެ  މަސްނޫއީ  އާލާތެއް  އުފެއްދުމަކީ ވަރަށްވެސް ނާދިރު ކަމެކެވެ.

ނޯޓް: މިއީ ޕްރޮފެސަރ ޑރ.ހަސަން އުގެއިލް ލިޔުއްވައިފައިވާ އަދި ކުރިން ޝާއިޢުކޮށްފައިވާ ލިޔުމެކެވެ.